ការប្រកួតជម្រុះដណ្តើមខ្សែក្រវាត់ជើងឯកCarabao ទម្ងន់៥៧ គីឡូក្រាម នៅសង្វៀនទូរទស្សន៍SEATV នៅរសៀលថ្ងៃសៅរ៍ទី១៦ ខែមិថុនា ឆ្នាំ២០១៨នេះ ជាការប្រកួតសប្តាហ៍ទី៣ ជុំទី២ រវាងអ្នកប្រដាល់កម្ពុជាឡុង ជិន ក្លិបខ្លារខិនមានរិទ្ធ និងអ្នកប្រដាល់ថៃ Phat Seila ហើ យ អ្នកប្រដាល់កម្ពុជាយុគ យក្សផ្លែ ក្លិបបូរីរាជសីហ៍មានរិទ្ធ ជួបអ្នកប្រដាល់ថៃ Phat Thou។
ឡុង ជិន និង Phat Seila ពួកគេទាំងពីរនាក់នេះ មិនធ្លាប់ជួបគ្នាទេកន្លងមក។តែយ៉ាងណាឡុង ជិន និង Phat Seila នេះ គេមានសមត្ថភាពប្រហាក់ប្រហែលគ្នាទេ ហើយមានមាឌប្រហែលគ្នា និងកម្ពស់ក៏ប្រហាក់ប្រហែលគ្នាដែរ គឺ១,៦០ម៉ែត្រជាងដូចគ្នា ប៉ុន្តែឡុង ជិន ចាញ់បទពិសោធន៍និងកំនត់ត្រា Phat Seila ។
Phat Seila គេមានកំនត់ត្រាប្រកួតចំនួនតែ៧៧លើកប៉ុណ្ណោះ ក្នុងនោះឈ្នះ៦៦លើក ចាញ់១០លើក និងស្មើ០១លើក។ ចំណែក ឡុង ជិន គេមានកំនត់ត្រាប្រកួត៦៧លើក ឈ្នះ៥១លើក ចាញ់១៤លើក និងស្មើ០១លើក ។ឡុង ជិនគេប្រកួតជុំទី១ (០២មិថុនា២០១៨) គេវាយឈ្នះPhat Thou ក្នុងទឹកទី១ ដែលធ្វើអោយគេបាន៣ពិន្ទុហើយ សម្រាប់ការប្រកួតជម្រុះនេះ ។ ចំណែក ការប្រកួតជុំទី១ របស់ Phat Seila (០២មិថុនា២០១៨) គឺចាញ់យុគ យក្សផ្លែ ដោយពិន្ទុ បាន១ពិន្ទុ ។
ទោះជាយ៉ាងណាក្តី សម្រាប់ការជួបគ្នានេះ ពុំអាចសន្និដ្ឋានមុនថា អ្នកណាឈ្នះ អ្នកណាចាញ់នោះឡើយ ហើយពីរនាក់នេះ ក៏មិនអាចអ្នកណាមើលស្រាលអ្នកណាបានដែរ ។
ចំពោះការជួបគ្នារវាងយុគ យក្សផ្លែ និង Phat Thou វិញ ប្រហែលជាមិនពិបាកទស្សន៍ទាយប៉ុន្មានទេ ព្រោះយក្សផ្លែ គេធ្លាប់វាយឈ្នះ Phat Thou ដោយពិន្ទុម្តងហើយមុនចូលរួមប្រកួតដណ្តើមខ្សែក្រវាត់នេះ កាលពីថ្ងៃទី១២វិច្ឆិកា២០១៧កន្លងមក ។ យក្សផ្លែគេមានផ្លែល្អជាង Phat Thou ។
យុគ យក្សផ្លែ អ្នកប្រដាល់កម្ពុជាយើងនេះ គេមានប្រវត្តិប្រកួត១៥៦លើកឈ្នះ១៣១លើក ចាញ់២១លើក និង ស្មើ០៤លើក ។ ឯ Phat Thou គេមានប្រវត្តិប្រកួតចំនួន៨៦លើក ឈ្នះ៦៨លើក ចាញ់១៧លើក និងស្មើ០១លើក ។ យ៉ាងណាសម្រាប់ការប្រកួតជុំទី២នេះ គេរំពឹងថា យក្សផ្លែនឹងរកបាន៣ពិន្ទុបន្ថែមមិនខាន ក្នុងការជួប Phat Thou នេះ ។
Phat Thou កាលពីប្រកួតក្នុងជុំដំបូង គេវាយចាញ់ឡុង ជិន ក្លិបខ្លារខិនមានរិទ្ធ ក្នុងទឹកទី១ បាន១ពិន្ទុប៉ុណ្ណោះ ឯ យក្សផ្លែ កាលពីប្រកួតជុំទី១ គេវាយឈ្នះ Phat Seila ដោយពិន្ទុ បាន៣ពិន្ទុ ។
សូមបញ្ជាក់ថា ការប្រកួតជើងឯកខារ៉ាបាវរដូវកាលទី ៦ ទម្ងន់៥៧គីឡូក្រាមលើកនេះ មានអ្នកប្រដាល់ខ្លាំងៗចំនួន ៨ រូប ចូលរួមប្រកួត គឺខ្មែរ៤នាក់ ថៃ៤នាក់ ។ អ្នកប្រដាល់ខ្មែរទាំង៤នាក់នោះ រួមមានឈុត សេរីវ៉ាន់ថង ក្លិបរាហ៊ូកីឡាខេត្តបាត់ដំបង, ធន មករា សមាគមកីឡាប្រដាល់ក្រសួងការពារជាតិ , ឡុង ជិន ក្លិបខ្លារខិនមានរិទ្ធ និង យុគ យក្សផ្លែ ក្លិបបូរីរាជសីហ៍មានរិទ្ធ ។ ឯអ្នកប្រដាល់ថៃ ៤ នាក់វិញ មាន Phat Seila, Phat Thou , Theab Kao និង Phach Yaksou ៕
Source: Kampuchea Thmey Daily
0 Comments