ប្រធានាធិបតីទួរគីលោក Recep Tayyip Erdogan បានឈ្នះការបោះឆ្នោត ដែលមានការប្រកួតប្រជែងយ៉ាងតឹងតែង ដោយបន្តការក្តោបក្តាប់អំណាចរយៈពេល១៥ឆ្នាំរបស់គាត់ ខណៈដែលគណបក្សប្រឆាំង បានធ្វើការតវ៉ាអំពីការរាប់សន្លឹកឆ្នោត។ នេះបើយោងតាមការលើកឡើងនៅថ្ងៃចន្ទរបស់អាជ្ញាធររៀបចំការបោះឆ្នោត។
អ្នកបោះឆ្នោតទួរគី បានបោះឆ្នោតជាលើកដំបូងសម្រាប់ទាំងការបោះឆ្នោតជ្រើសរើសប្រធានាធិបតីនិងសភាក្នុងការបោះឆ្នោតជាបន្ទាន់មួយ ខណៈលោក Erdogan កំពុងស្វែងរកជ័យជម្នះជុំទី១ និងរកសំឡេងភាគច្រើនសម្រាប់គណបក្សយុត្តិធម៌និងការអភិវឌ្ឍន៍ (AKP) របស់គាត់ ដែលកំពុងកាន់អំណាច។
ការបោះឆ្នោតនេះមានកម្រិតខ្ពស់ខណៈដែលប្រធានាធិបតីថ្មីនឹងពង្រីកអំណាចជាលើកដំបូងដោយគ្មានសូម្បីតែនាយករដ្ឋមន្ត្រីមួយរូបក្រោមរដ្ឋធម្មនុញ្ញថ្មីដែលបានយល់ព្រមនៅក្នុងការធ្វើប្រជាមតិកាលពីខែមេសាឆ្នាំ២០១៧ដែលគាំទ្រដោយលោក Erdogan ប៉ុន្តែគណបក្សប្រឆាំងបាននិយាយថា វានឹងផ្តល់អំណាចផ្តាច់ការ។
ប្រមុខអាជ្ញាធរបោះឆ្នោតទួរគីលោក Sadi Guven បាននិយាយថា លោក Erdogan បានផ្តួលគូប្រជែងដែលនៅជិតបំផុតរបស់គាត់ឈ្មោះ Muharrem Ince ជាមួយសំឡេងភាគច្រើនដាច់ខាតជាងពាក់កណ្តាលនៃការបោះឆ្នោតដោយមិនចាំបាច់ត្រូវបោះឆ្នោតជុំទីពីរ។
លោក Erdogan បានថ្លែងអំពីការទទួលជ័យជម្នះនៅលំនៅដ្ឋានក្រុងអ៊ីស្តង់ប៊ុលរបស់គាត់ថា “ខ្ញុំត្រូវបានប្រទេសជាតិប្រគល់ឲ្យនូវភារកិច្ចនិងកាតព្វកិច្ចរបស់ប្រធានាធិបតី”។ លោកបានសន្យាថា ប្រព័ន្ធប្រធានាធិបតីថ្មីនឹងត្រូវបានអនុវត្ត “យ៉ាងឆាប់រហ័ស”។ លោកបានបន្ថែមថា “ប្រទេសទួរគីបានផ្តល់មេរៀនមួយក្នុងលទ្ធិប្រជាធិបតេយ្យដល់ពិភពលោកទាំងមូល”។
ទីភ្នាក់ងារព័ត៌មានរដ្ឋ Anadolu បានចុះផ្សាយដោយផ្អែកលើការរាប់សន្លឹកឆ្នោត៩៩ភាគរយថា លោក Erdogan ទទួលបានសំឡេង៥២,៥ភាគរយនៅក្នុងការបោះឆ្នោតប្រធានាធិបតីខណៈលោក Ince នៃគណបក្សសាធារណរដ្ឋប្រជាមានិត (CHP) ទទួលបានសំឡេង៣១,៥ភាគរយ។
បើសិនជាត្រូវបានបញ្ជាក់មែននោះ តួលេខនេះនឹងបង្ហាញថា ការបោះឆ្នោតរបស់លោក Erdogan មានកម្រិតប្រហាក់ប្រហែលឬខ្លាំងជាងជ័យជម្នះនៃការបោះឆ្នោតឆ្នាំ២០១៤ដែលគាត់បានឈ្នះអាណត្តិទី១របស់គាត់បន្ទាប់ពីធ្វើជានាយករដ្ឋមន្ត្រីអស់រយៈពេលជាងមួយទសវត្ស៕ AFP
[caption id="attachment_935553" align="aligncenter" width="960"]
[/caption]Source: Kampuchea Thmey Daily
0 Comments