ជនភៀសខ្លួនអ៊ីរ៉ាក់ម្នាក់នៅប្រទេសបារាំងដែលត្រូវបានគេចាត់ទុកថាជាអតីតសមាជិកជាន់ខ្ពស់នៃក្រុមរដ្ឋឥស្លាម គឺត្រូវបានចាប់ខ្លួននៅក្នុងទីក្រុងប៉ារីស និងត្រូវបានចោទប្រកាន់ពីបទសង្ស័យ “ឧក្រិដ្ឋកម្មសង្គ្រាម” អំពីការជាប់ពាក់ព័ន្ធក្នុងការសម្លាប់រង្គាលនៅក្នុងប្រទេសរបស់គាត់។
បុរសវ័យ៣៣ឆ្នាំ ដែលគេហៅថា Ahmed H គឺត្រូវបានគេចោទប្រកាន់ថា បានចូលរួមក្នុងការចាប់ខ្លួននិងសម្លាប់យុវជនប្រមាណ១,៧០០នាក់ ដែលភាគច្រើនជាកងទ័ពនិកាយស៊ីអ៊ីត ដែលត្រូវបានកេណ្ឌពីមូលដ្ឋានយោធា Speicher ទៅកាន់ភាគខាងជើងទីក្រុង Tikrit កាលពីឆ្នាំ២០១៤។
រដ្ឋអាជ្ញាក្រុងប៉ារីសបាននិយាយថា លោក Ahmed H ត្រូវបានចាប់ខ្លួនកាលពីខែមីនា ហើយត្រូវបានចោទប្រកាន់នៅប៉ុន្មានថ្ងៃក្រោយមកលើបទចោទប្រកាន់ជាច្រើនរួមទាំង “ការសម្លាប់ពាក់ព័ន្ធនឹងក្រុមភេរវករ” និង “បទឧក្រិដ្ឋសង្គ្រាម” ផងដែរហើយត្រូវបានឃុំខ្លួនមុនការជំនុំជម្រះ។
ករណីនេះបានគូសបញ្ជាក់អំពីការភ័យខ្លាចរបស់ទីភ្នាក់ងារចារកម្មលោកខាងលិចដែលថា ពួកជីហាដអាចទាញយកផលប្រយោជន៍ពីវិបត្តិអន្តោប្រវេសន៍ដើម្បីចូលខ្លួនទៅកាន់ទ្វីបអឺរ៉ុប។
ប្រភពមួយដែលជិតស្និទ្ធនឹងការស៊ើបអង្កេតបានប្រាប់ AFP កាលពីថ្ងៃព្រហស្បតិ៍ថា លោក Ahmed H បានទៅដល់ប្រទេសបារាំងនៅរដូវក្តៅឆ្នាំ២០១៦ហើយបានទទួលឋានៈជាជនភៀសខ្លួននៅមួយឆ្នាំក្រោយនិងត្រូវបានផ្តល់ប័ណ្ណស្នាក់នៅរយៈពេល១០ឆ្នាំ។
មិនយូរប៉ុន្មានបន្ទាប់ពីទទួលបានឋានៈជាជនភៀសខ្លួន លោក Ahmed H ត្រូវបានកំណត់អត្តសញ្ញាណនិងតាមដានដោយសេវាស៊ើបការណ៍សម្ងាត់ដែលបន្ទាប់មកបានជូនដំណឹងទៅអាជ្ញាធរតុលាការ។
អាជ្ញាធរបារាំងបានដកហូតឋានៈការពារខ្លួនរបស់គាត់ចាប់តាំងពីការជាប់ឃុំឃាំងរបស់គាត់។
មេធាវីរបស់គាត់ឈ្មោះ Mohamed El Monsaf Hamdi មិនចង់ធ្វើអត្ថាធិប្បាយភ្លាមៗទេនៅពេលទាក់ទងដោយ AFP ។
គួរបញ្ជាក់ថា ការសម្លាប់រង្គាល Camp Speicher ត្រូវបានគេចាត់ទុកថាជាឧក្រិដ្ឋកម្មដ៏អាក្រក់បំផុតមួយរបស់ក្រុម IS បន្ទាប់ពីវាបានដណ្តើមយកផ្នែកធំៗនៃប្រទេសអ៊ីរ៉ាក់ក្នុងឆ្នាំ២០១៤។
កន្លែងមួយក្នុងចំណោមកន្លែងសម្លាប់រង្គាលគឺជាអតីតអគាររបស់ប៉ូលិសនៅក្នុងបរិវេណវិមានរបស់អតីតប្រធានាធិបតីសាដាមហ៊ូសេនក្នុងទីក្រុង Tikrit៕ AFP
Source: Kampuchea Thmey Daily
0 Comments