ភ្នំពេញ ៖ បុរសម្នាក់ ត្រូវបាននគរបាលខណ្ឌសែនសុខ ចាប់ខ្លួនតាមបណ្តឹងរបស់នារីរងគ្រោះម្នាក់ដែលបានចោទប្រកាន់ថា បុរសរូបនេះ បានចូលក្នុងផ្ទះរបស់នាងប៉ងចាប់រំលោភ តែនាងរើបម្រាស់រួច ហើយគេក៏រត់គេចខ្លួនបាត់ភ្លាមៗបន្សល់ទុក តែវ៉ែនតាម្ញូប របស់ខ្លួន ដែលជាភស្តុតាង សម្រាប់នាងយកមកប្តឹងប៉ូលិសអោយចាប់ខ្លួន នៅរសៀលថ្ងៃទី៨ ខែមិថុនា ឆ្នាំ២០១៨ ក្រោយរត់គេចខ្លួនបាន៤ថ្ងៃ។
ប៉ូលិសបានឲ្យដឹងថា ៖ ជនសង្ស័យខាងលើឈ្មោះ មាស សុភាព អាយុ២៨ឆ្នាំ មុខរបរជាងផ្សារដែក មានទីលំនៅភូមិត្រពាំងស្វាយ សង្កាត់គោកឃ្លាង ខណ្ឌសែនសុខ។
ប្រភពព័ត៌មានពីសមត្ថកិច្ច និងនាងរងគ្រោះឈ្មោះ វិន សុខហេង អាយុ១៨ឆ្នាំ មុខរបរកម្មករ រោងចក្រកាត់ដេរស្នាក់នៅផ្ទះជួលចំណុចកើតហេតុ ក្បែរផ្ទះជនសង្ស័យ បានអោយដឹងថា ៖ នៅមុនពេលកើតហេតុភាគីជនសង្ស័យ បានជួបជុំមិត្តភក្តិផឹកស៊ី រហូតដល់ម៉ោង២៣ និង៣០នាទីយប់ ក៏បានបញ្ចប់ការផឹកស៊ី និងបានបែកគ្នាទៅដេកតាមផ្ទះរៀងៗខ្លួន។
ក្រោយមកជនសង្ស័យខាងលើ (មាស សុភាព) មិនបានចូលដេកទេ ក៏បានមកលួចគាស់ទ្វារចូលបន្ទប់ស្នាក់នៅរបស់នាងរងគ្រោះ ដោយបើកមុងចូលចាប់បង្ខំនាងរំលោភ ប៉ុន្តែនាងបានរើបម្រាស់រួចស្ទុះទៅបើកកុងតាក់ភ្លើងស្គាល់មុខជនសង្ស័យ។ ភ្លាមនោះជនសង្ស័យក៏បានបើកទ្វាររត់គេចខ្លួនបាត់ ដោយបន្សល់ទុកនូវវ៉ែនតាប្រភេទម្ញូបចំនួនមួយនៅបន្ទប់របស់នាង។
លុះនៅពេលព្រឹកឡើង(ថ្ងៃទី៤ ខែមិថុនា) នាងក៏បានមកដាក់ពាក្យបណ្តឹងនៅប៉ុស្តិ៍ប៉ូលិសមូលដ្ឋាន ដោយយកវ៉ែនតានោះមកប្តឹងប៉ូលិសធ្វើជាភស្តុតាងដើម្បីរកយុត្តិធម៌។ ចាប់តាំងពីថ្ងៃនោះមក ជនសង្ស័យ បានរត់គេចខ្លួនបាត់ តែរយៈពេល ៤ថ្ងៃក្រោយមក គឺនៅថ្ងៃទី៨ ខែមិថុនា ឆ្នាំ២០១៨ ជនសង្ស័យបានបង្ហាញខ្លួននៅមុខផ្ទះស្នាក់នៅរបស់គេ។ ពេលនោះនាងបានទូរស័ព្ទមកប្តឹងប៉ូលិសមូលដ្ឋានអោយមកចាប់ខ្លួនភ្លាមៗតែម្តង យកទៅសួរនាំ។
ជនសង្ស័យ បានសារភាពប្រាប់សមត្ថកិច្ចនូវសកម្មភាពប្រព្រឹត្តខុសច្បាប់របស់ខ្លួនមកលើជនរងគ្រោះ ដោយដោះសាថា មកពីខ្លួនមានចិត្តស្រលាញ់នាងពេក តែចង់រំលងប្រពៃណី។ បច្ចុប្បន្ន ជនសង្ស័យ ត្រូវប៉ូលិសបញ្ជូនទៅតុលាការ៕
Source: Kampuchea Thmey Daily
0 Comments