ក្រុមបាល់ទាត់អាស៊ីអឺរ៉ុប សមាជិកពានរង្វាន់លីគកំពូលកម្ពុជា Metfone Cambodian League 2018 បានសម្រេចត្រៀមផ្លាស់ប្ដូរកីឡាករបរទេសនៅក្នុងក្រុម អំឡុងពេលទីផ្សារដោះដូរកីឡាករបើកទ្វារនៅចុងខែមិថុនានេះ ក្រោយការចាកចេញរបស់ខ្សែប្រយុទ្ធជនជាតិនីហ្សេរីយ៉ា Okereke Timothy ផ្លាស់ទៅលេងនៅក្លិបមួយក្នុងលីគលំដាប់ទី២ប្រទេសម៉ាឡេស៊ី (Malaysia Premier League)។
លោក សុក វាសនា គ្រូបង្វឹករបស់ក្រុមអាស៊ីអឺរ៉ុប បានប្រាប់អ្នកសារព័ត៌មានថា ដោយសារការចាកចេញរបស់កីឡាករ Timothy លោកកំពុងសម្លឹងមើលកីឡាករបរទេសបន្ថែមអាចម្នាក់ឬ២នាក់ មកបំពេញចន្លោះប្រហោងក្នុងក្លិប។ លោកកំពុងសម្លឹងឃើញកីឡាករម្នាក់នៅលីគលំដាប់ទី២របស់មីយ៉ាន់ម៉ា ដោយកីឡាកររូបនោះធ្លាប់មកធ្វើតេស្តជាមួយអាស៊ីអឺរ៉ុប កន្លងមកម្តងហើយ តែដោយសារកីឡាករក្នុងក្រុមមានពេញកូតាហើយ ទើបលោក សម្រេចចិត្តមិនទាន់យករូបគេ។
យោងតាមគោលការរបស់សហព័ន្ធកីឡាបាល់ទាត់កម្ពុជា ស្របតាមសហព័ន្ធកីឡាបាល់ទាត់អាស៊ី កំណត់ថា ក្លិបជាសមាជិកលីគរបស់ខ្លួនអាចចុះបញ្ជីកីឡាករបរទេសបាន៥នាក់ ប៉ុន្តែក្នុងនោះត្រូវមានកីឡាករអាស៊ី ១រូប (រូបមន្ត ៤+១)។ កាលពីជុំទី១កន្លងទៅក្រុមអាស៊ីអឺរ៉ុប បានចុះបញ្ជីកីឡាករបរទេសចំនួន៥នាក់ដោយក្នុងនោះមានខ្សែបម្រើនីហ្សេរីយ៉ា Momoh Degule ខ្សែប្រយុទ្ធកាម៉េរូន Befolo Mbarga Privat ខ្សែប្រយុទ្ធអ៊ីរ៉ង់ Hedayati Mohamad ខ្សែប្រយុទ្ធនីហ្សេរីយ៉ា Okereke Timothy និងខ្សែការពារជប៉ុន Tomohiro Masaki។
ចំណែកទីផ្សាដោះដូរជើងទី២សម្រាប់លីគកំពូលកម្ពុជា នឹងចាប់ផ្តើមបើកទ្វាចាប់ពីថ្ងៃទី១៥ ដល់៣០ ខែមិថុនា ខាងមុខ ខណៈលោក សុក វាសនា មិនទាន់អាចចុះបញ្ជីកីឡាករបន្ថែមបានទេដើម្បីប្រើប្រាស់ក្នុងប្រកួតប៉ុន្មានសប្តាហ៍ខាងមុខ។ ក្រុមអាស៊ីអឺរ៉ុប កំពុងដឹកនាំដោយលោក សុក វាសនា ដោយពេលនេះកំពុងឈរចំណាត់ថ្នាក់លេខ៨បណ្តោះអាសន្នក្នុងតារាងរួមដែលមានក្រុមចំនួន១២ ក្រោយប្រកួតបាន៨លើក ឈ្នះបាន២លើក ស្មើគ្នា៣លើក និងចាញ់៣លើក មាន៩ពិន្ទុក្នុងដៃ។
ក្រុមអាស៊ីអឺរ៉ុប បានបញ្ចប់រដូវកាលឆ្នាំ២០១៧ របស់ខ្លួនដោយឈរចំណាត់ថ្នាក់លេខ១០ ក្នុងចំណោមសមាជិកទាំង១២ ក្នុងលីគកំពូលកម្ពុជា ក្រោយប្រកួតបាន២២លើក ឈ្នះ៥លើក ស្មើ៣លើកនិងចាញ់១៤លើកមាន១៨ពិន្ទុក្នុងដៃ។ ពានរង្វាន់សំខាន់ៗដែលអាស៊ីអឺរ៉ុប ត្រូវចូលរួមប្រកួតនៅរដូវកាលនេះមានពានរង្វាន់ជើងឯកលីគកំពូលកម្ពុជា ពានរង្វាន់សម្តេចតេជោ ហ៊ុន សែន និងពានរង្វាន់ជើងឯកសាកលវិទ្យាល័យថ្នាក់ជាតិ ផងដែរ៕
Source: Kampuchea Thmey Daily
0 Comments