ក្លិប​Teregganu FA របស់ ធា​រី ចន្ថា​ប៊ី​ន ប៉ះ​អតីត​ក្រុម​របស់ ប្រាក់ មុន្នី​ឧ​ត្ត​ម នៅ​សប្ដាហ៍​ទី​១៧ លី​គ​កំពូល​ម៉ាឡេស៊ី

ពានរង្វាន់​លី​គ​កំពូល​ប្រទេស​ម៉ាឡេស៊ី (Malaysia Super League) រដូវ​កាល​ឆ្នាំ​២០១៨ នឹង​បន្ត​ប្រកួត​សប្ដាហ៍​ទី​១៧ របស់​ខ្លួន​នៅ​ពាក់កណ្ដាល​សប្ដាហ៍​នេះ ស្រប​ពេល​ក្រុម​ដែល​កីឡាករ​របស់​កម្ពុជា ១​រូប​កំពុង​ប្រកប​អាជីព​នៅ​ទីនោះ Teregganu FA របស់ ធា​រី ចន្ថា​ប៊ី​ន ត្រូវ​ប៉ះ​ក្រុម Negeri Sembilan ជា​អតីត​ក្រុម​ដែល​កីឡាករ ប្រាក់ មុន្នី​ឧ​ត្ត​ម ធ្លាប់​ប្រកប​អាជីព​កាលពី​ជើង​ទី​១​។

​កម្មវិធី​ប្រកួត​បន្ទាប់​សប្ដាហ៍​ទី​១៧ នេះ​ធ្វើឡើង​នៅ​ពាក់កណ្ដាល​សប្ដាហ៍​នេះ​ដូចគ្នា​ដោយ​នៅ​ថ្ងៃ​អង្គារ ទី ២៦ ខែមិថុនា ក្រុម Kedah ប៉ះ​ក្រុម PKNS ហើយ​ក្រុម Perak ជួប​ក្រុម Kelantan ខណៈ​ក្រុម Pahang FA ប៉ះ​ក្រុម Selangor និង​ក្រុម Melaka United ទទួល​ក្រុម​ខ្លាំង​Johor Darul Ta'zim​។ ចំណែក​នៅ​ថ្ងៃ​ពុធ ទី​២៧ ខែមិថុនា វិញ​ក្រុម Terenggan របស់ ធា​រី ចន្ថា​ប៊ី​ន ជួប​ក្រុម Negeri Sembilan និង​ក្រុម Kuala Lumpur ប៉ះ​ក្រុម PKNP​។ ការប្រកួត​ទាំងអស់​ធ្វើឡើង​នៅ​ម៉ោង​៨​យប់​នៅ​ម៉ាឡេស៊ី ដូចគ្នា។



​លី​គ​កំពូល​ម៉ាឡេស៊ី ឆ្លងកាត់​១៧​ប្រកួត​មកនេះ​ក្រុម​Terengganu របស់ ធា​រី ចន្ថា​ប៊ី​ន ហាត់​ឃ្លាតឆ្ងាយ​ពី​តំបន់​ប្រជែង​កំពូល​តារាង​ជាមួយ​ក្រុម​ខ្លាំង​Jorhor និង​ក្រុម Pahang FA ជា​ក្រុម​ចាស់​របស់ ចាន់ វឌ្ឍនាកា ក្រុម Perak ក្រុម​Kedah និង​ក្រុម PKNS ជាដើម​។ ចំណែក​ក្រុម Negeri Sembilan អតីត​ក្រុម​របស់ ប្រាក់ មុន្នី​ឧ​ត្ត​ម ក៏​ត្រូវ​ការ​ពិន្ទុ​ដែរ​ដើម្បី​គេច​ឲ្យ​ផុតពី​តំបន់​ដែល​ត្រូវ​កាត់ចេញ​ឲ្យ​ទៅលេង​ពានរង្វាន់​លី​គ​លំដាប់​ទី​២ របស់​ម៉ាឡេស៊ី​។

ពានរង្វាន់​លី​គ​កំពូល​ម៉ាឡេស៊ី មាន​ក្រុម​សរុប​ចំនួន​១២​ក្រុម​ ដោយ​តម្រូវ​ឲ្យ​ក្រុម​ទាំងអស់​ប៉ះគ្នា​ចំនួន​២​លើក (២​ជុំ​) ហើយ​ក្រុម​ដែល​មាន​ពិន្ទុ​ច្រើន​ជាង​គេ​នៅ​ចប់​រដូវ​កាល​នឹង​ឈ្នះ​ជើងឯក​នឹង​ទទួល​កៅអី​ឡើង​ទៅលេង​ក្នុង​ពានរង្វាន់ AFC Champion League 2019 ផងដែរ​។ តាម​គ្រោង​ការប្រកួត​នឹង​បញ្ចប់​នៅ​អំឡុង​ខែកញ្ញា ឆ្នាំ​២០១៨ ខាងមុខ មុន​ក្រុម​ជម្រើសជាតិ​របស់​ប្រទេស​នេះ​ត្រៀម​ប្រកួត​ក្នុង​ពានរង្វាន់ AFF Suzuki Cup 2018​។

សូម​បញ្ជាក់​ថា ​កម្ពុជា មាន​កីឡាករ​ឆ្នើមៗ​ចំនួន​៤​រូប​ចេញទៅ​ប្រកប​អាជីព​នៅ​ពានរង្វាន់​លី​គ​កំពូល​ប្រទេស​ម៉ាឡេស៊ី នៅ​ដើមរដូវ​កាល​ឆ្នាំ​២០១៨ នេះ​ដោយ​ក្នុង​នោះ​មាន​កែវ សុខ​ផេង លេង​នៅ​ក្លិប PKNP FC កីឡាករ ចាន់ វឌ្ឍនាកា Panhag FA និង​កីឡាករ ធា​រី ចន្ថា​ប៊ី​ន ទៅកាន់​ក្លិប​Terengganu FC និង​កីឡាករ ប្រាក់ មុន្នី​ឧ​ត្ត​ម លេង​នៅ​ក្លិប​Negeri Sembilan​។ ក្នុងចំណោម​អ្នក​ទាំង​៤​មានតែ​កីឡាករ កែវ សុខ​ផេង ប៉ុណ្ណោះ ដែល​រក​គ្រាប់​បាល់​ឱ្យ​ក្រុម​បាន​មុនគេ​។ ប៉ុន្តែ​ពេលនេះ កែវ សុខ​ផេង ប្រាក់ មុន្នី​ឧ​ត្ត​ម និង ចាន់ វឌ្ឍនាកា ត្រូវ​បាន​ក្លិប​ដកចេញ​ពី​បញ្ជី​ក្នុង​ក្រុម ដោយ​នៅសល់តែ ធា​រី ចន្ថា​ប៊ី​ន ម្នាក់​ប៉ុណ្ណោះ​៕

Source: Kampuchea Thmey Daily