ថ្នាក់ដឹកនាំរបស់ក្លិបបាល់ទាត់អង្គរថាយហ្គឺរ សមាជិកពានរង្វាន់លីគកំពូលកម្ពុជា Metfone Cambodian Leagueបានធ្វើដំណើរទៅកាន់ខេត្ត Buriram របស់ប្រទេសថៃ ដើម្បីសិក្សាមើលពីចំណុចខ្លាំងរបស់ក្រុមមួយនេះ ដែលកំពុងមានឈ្មោះបោះសំឡេងទាំងកម្រិតក្នុងប្រទេស តំបន់អាស៊ាន និងប្រចាំទ្វីបអាស៊ី។
លោក Yusuke Shinoda អ្នកចាត់ការក្រុមអង្គរថាយហ្គឺរ បានលើកឡើងថា «ថ្នាក់ដឹកនាំក្លិបចំនួន ៥ រូបរបស់យើងបានមកសិក្សាអំពីរបៀបរៀបចំការប្រកួតនៅក្នុងផ្ទះរបស់ Buriram United ដើម្បីយកចំណេះនេះទៅរៀបចំធ្វើជាម្ចាស់ផ្ទះរបស់ អង្គរថាយហ្គឺរក្នុងការប្រកួតលីគកំពូលនាពេលខាងមុខ។ យើងនឹងយកចំណេះដឹងនេះទៅរៀបចំការប្រកួតធ្វើជាម្ចាស់ផ្ទះដំបូងរបស់យើងពេលជួប បឹងកេត ថ្ងៃទី ៧ មេសា ២០១៩ ខាងមុខនៅទឹកដីកីឡដ្ឋានសៀមរាប»។ អ្នកទាំង ៥ មានអ្នកចាត់ការទូទៅ Yusuke Shinoda, Takashisa Kiyone ប្រធានទីផ្សារ, យ៉ាន់ រតនា ផ្នែកទីផ្សារ, សុខ មួយ លេខាធិការ, និង អ៊ុ ករុណា អ្នកបកប្រែភាសាជប៉ុន។
សូមបញ្ជាក់ថា កាលពីដើមឆ្នាំ២០១៨ កន្លងទៅប្រធានក្លឹបបាល់ទាត់អង្គរថាយហ្គឺរ Akihiro Kato និង អ្នកចាត់ការ Yusuke Shinoda បាននាំគ្នាធ្វើដំណើរទៅកាន់កីឡដ្ឋាន Chang Arena ម្តងមកហើយ ដើម្បីសង្កេតមើលក្រុមដែលមានមូលដ្ឋាននៅឆ្ងាយពីរាជធានីបាងកក មួយនេះ។ បុរសជនជាតិជប៉ុនទាំង២ជាផ្នែកមួយដែលស្វែងរកឱកាស យកក្លិបរបស់ខ្លួនទៅអភិវឌ្ឍន៍នៅតាមខេត្តដែលមិនឈរជើងនៅរាជធានីភ្នំពេញ។
លោក Akihiro Kato ប្រធានក្លិបអង្គរថាយហ្គឺរ ធ្លាប់បានបញ្ជាក់ជុំវិញអនាគតរបស់ក្លិបលោកថា៖«៥ទៅ១០ឆ្នាំខាងមុខ ខ្ញុំដាក់គោលដៅឲ្យអង្គរថាយហ្គឺរ ក្លាយជាក្លិបលេខ១ក្នុងតំបន់អាស៊ាន ហើយខ្ញុំរំពឹងថា កីឡាករទាំងអស់នឹងលះបង់ខ្ពស់ ដើម្បីសម្រេចទស្សនៈវិស័យរបស់យើង។ អង្គរថាយហ្គឺរ ចង់ក្លាយជានិមិត្តរូបនៃក្ដីសុបិន្ត ក្ដីសង្ឃឹមនិងកម្លាំងចិត្ត សម្រាប់ប្រជាពលរដ្ឋខេត្តសៀមរាប ក៏ដូចជាកម្ពុជាទាំងមូល»។
ក្រុមអង្គរថាយហ្គឺរ បានប្តូរឈ្មោះមកពីក្រុមត្រាយអាស៊ីភ្នំពេញ កាលពីចុងរដូវកាល២០១៤ ហើយនៅរដូវកាល២០១៥ គឺជាកំណត់ត្រាល្អរបស់ក្លិបពោលគឺ អាចឡើងដល់វគ្គ៤ក្រុមចុងក្រោយទាំងពានរង្វាន់សម្តេច ហ៊ុន សែន និងពានរង្វាន់មិត្តហ្វូនខេមបូឌានលីក ក្រោយឈរចំណាត់ថ្នាក់លេខ៣ដូចគ្នា។ ក្រុមនេះ ទទួលបានសិទ្ធិប្រើប្រាស់កីឡដ្ឋានខេត្តសៀមរាប ពីក្រសួងអប់រំយុវជននិងកីឡា កាលពីរដូវកាលឆ្នាំ២០១៧ កន្លងធ្វើជាទឹកដីរបស់ខ្លួនរាល់ការប្រកួតនានា៕
Source: Kampuchea Thmey Daily
0 Comments