ពានរង្វាន់លីគកំពូលប្រទេសម៉ាឡេស៊ី (Malaysia Super League) រដូវកាលឆ្នាំ២០១៨ បានបញ្ចប់ការប្រកួតសប្ដាហ៍ទី១៧ របស់ខ្លួនថ្មីៗនេះ ស្របពេលក្រុមដែលកីឡាកររបស់កម្ពុជា ១រូបកំពុងប្រកបអាជីពនៅទីនោះ Teregganu FA របស់ ធារី ចន្ថាប៊ីន រកបាន៣ពិន្ទុបន្ថែមហើយពាក់កណ្ដាលតារាងបណ្តោះអាសន្ន។
សរុបលទ្ធផលប្រចាំសប្ដាហ៍ទី១៧នេះមាននៅថ្ងៃអង្គារ ទី ២៦ ខែមិថុនា ក្រុម Kedah ឈ្នះក្រុម PKNS ២ទល់០ ហើយក្រុម Perak ឈ្នះក្រុម Kelantan ១ទល់០ ខណៈក្រុម Pahang FA ស្មើគ្នាជាមួយក្រុម Selangor ១ទល់១ និងក្រុម Melaka Unitedចាញ់ក្រុមខ្លាំងJohor Darul Ta'zim ៤ទល់០។ ចំណែកនៅថ្ងៃពុធ ទី២៧ ខែមិថុនា វិញក្រុម Terenggan របស់ ធារី ចន្ថាប៊ីន យកឈ្នះលើក្រុម Negeri Sembilan ៣ទល់២ និងក្រុម Kuala Lumpur ស្មើគ្នាជាមួយក្រុម PKNP ១ទល់១។
លីគកំពូលម៉ាឡេស៊ី ឆ្លងកាត់១៧ប្រកួតមកនេះក្រុមTerengganu របស់ ធារី ចន្ថាប៊ីន ហាត់ឃ្លាតឆ្ងាយពីតំបន់ប្រជែងកំពូលតារាងជាមួយក្រុមខ្លាំងJorhor និងក្រុម Pahang FA ជាក្រុមចាស់របស់ ចាន់ វឌ្ឍនាកា ក្រុម Perak ក្រុមKedah និងក្រុម PKNS ជាដើម។ ចំណែកក្រុម Negeri Sembilan អតីតក្រុមរបស់ ប្រាក់ មុន្នីឧត្តម ក៏ត្រូវការពិន្ទុដែរដើម្បីគេឲ្យផុតពីតំបន់ដែលត្រូវកាត់ចេញឲ្យទៅលេងពានរង្វាន់លីគលំដាប់ទី២ របស់ម៉ាឡេស៊ី។
ពានរង្វាន់លីគកំពូលម៉ាឡេស៊ី មានក្រុមសរុបចំនួន១២ក្រុមដោយតម្រូវឲ្យក្រុមទាំងអស់ប៉ះគ្នាចំនួន២លើក (២ជុំ) ហើយក្រុមដែលមានពិន្ទុច្រើនជាងគេនៅចប់រដូវកាលនឹងឈ្នះជើងឯកនឹងទទួលកៅអីឡើងទៅលេងក្នុងពានរង្វាន់ AFC Champion League 2019 ផងដែរ។ តាមគ្រោងការប្រកួតនឹងបញ្ចប់នៅអំឡុងខែកញ្ញា ឆ្នាំ២០១៨ ខាងមុខ មុនក្រុមជម្រើសជាតិរបស់ប្រទេសនេះត្រៀមប្រកួតក្នុងពានរង្វាន់ AFF Suzuki Cup 2018។
សូមបញ្ជាក់ថា កម្ពុជា មានកីឡាករឆ្នើមៗចំនួន៤រូបចេញទៅប្រកបអាជីពនៅពានរង្វាន់លីគកំពូលប្រទេសម៉ាឡេស៊ី នៅដើមរដូវកាលឆ្នាំ២០១៨ នេះដោយក្នុងនោះមានកែវ សុខផេង លេងនៅក្លិប PKNP FC កីឡាករ ចាន់ វឌ្ឍនាកា Panhag FA និងកីឡាករ ធារី ចន្ថាប៊ីន ទៅកាន់ក្លិបTerengganu FC និងកីឡាករ ប្រាក់ មុន្នីឧត្តម លេងនៅក្លិបNegeri Sembilan។ ក្នុងចំណោមអ្នកទាំង៤មានតែកីឡាករ កែវ សុខផេង ប៉ុណ្ណោះ ដែលរកគ្រាប់បាល់ឲ្យក្រុមបានមុនគេ។ ប៉ុន្តែពេលនេះ កែវ សុខផេង ប្រាក់ មុន្នីឧត្តម និង ចាន់ វឌ្ឍនាកា ត្រូវបានក្លិបដកចេញពីបញ្ជីក្នុងក្រុម ដោយនៅសល់តែ ធារី ចន្ថាប៊ីន ម្នាក់ប៉ុណ្ណោះ៕
Source: Kampuchea Thmey Daily
0 Comments