មន្ត្រីអាជ្ញាកណ្ដាលរបស់កម្ពុជា ចំនួន២រូប កំពុងតែដឹកនាំការប្រកួតនិងត្រួតពិនិត្យការប្រកួតក្នុងពានរង្វាន់ជើងឯកប្រចាំតំបន់អាស៊ាន 2018 AFF U16 Championship នៅទីក្រុងSurabaya និងទីក្រុងGresik ក្នុងប្រទេសឥណ្ឌូណេស៊ី ខណៈកម្ពុជា ក៏បញ្ជូនក្រុមទៅចូលរួមប្រកួតក្នុងពានរង្វាន់នេះដែរ។
យោងតាមប្រភពមកពីសហព័ន្ធកីឡាបាល់ទាត់កម្ពុជា បានឲ្យដឹងថា មន្ត្រីអាជ្ញាកណ្ដាលទាំង២រូបរបស់កម្ពុជានោះមានលោក ទុយ វិច្ឆិកា អ្នកវាយតម្លៃអាជ្ញាកណ្ដាល និងលោក ជី សាមឌី មន្ត្រីអាជ្ញាកណ្ដាលលើទីលានដែលទទួលស្គាល់ពីសហព័ន្ធកីឡាអន្តរជាតិ (FIFA)។ យ៉ាងណាក្តីមានអាជ្ញាកណ្ដាល២រូបទើបតែបញ្ចប់បេសកម្មក្នុងពានរង្វាន់ 2018 AFF U19 Championship ដែលធ្វើឡើងនៅប្រទេសឥណ្ឌូណេស៊ី ដែរគឺលោក ឃួន វីរៈ និងលោក គឹម ស៊ីពិសាល។
យោងតាមឯកសាររបស់សហព័ន្ធកីឡាបាល់ទាត់អាស៊ាន (AFF) បានបញ្ជាក់ថា លោក ជី សាមឌី បានដឹកនាំប្រកួតបាន១លើកហើយគឺពេលក្រុម U16ឡាវ ប្រកួតឈ្នះលើក្រុមប្រ៊ុយណេ ៣ទល់២ ប្រចាំវគ្គជម្រុះពូល B កាលពីល្ងាចថ្ងៃច័ន្ទ កន្លងទៅលើទីលានកីឡដ្ឋាន Gelora Joko Samudro Stadium ក្នុងទីក្រុង Gresik។
សម្រាប់ពានរង្វាន់ 2018 AFF U16 Championship មានក្រុមត្រៀមចូលរួមចំនួន១១ ចាប់ដំណើរការប្រកួតពីថ្ងៃទី២៩ ខែកក្កដា ដល់ថ្ងៃទី១១ ខែសីហា ឆ្នាំ២០១៨ ដោយប្រើប្រាស់ទីលានចំនួន២គឺកីឡដ្ឋាន Gelora Joko Samudro Stadium និងកីឡដ្ឋានGelora Delta Stadium។ យោងតាមការចាប់ឆ្នោតបែងចែកពូលរបស់សហព័ន្ធកីឡាបាល់ទាត់អាស៊ានមានពូល A ក្រុមម្ចាស់ផ្ទះឥណ្ឌូណេស៊ី, វៀតណាម, មីយ៉ាន់ម៉ា, កម្ពុជា, ទីម័រខាងកើត និងហ្វីលីពីន ខណៈពូល B មានថៃ, ម៉ាឡេស៊ី, សិង្ហបុរី, ឡាវ និងប្រ៊ុយណេ។ សម្រាប់ក្រុមកម្ពុជា ដឹកនាំដោយលោក Lee Tae Hoon ដែលជាអតីតគ្រូបង្វឹកក្រុមជម្រើសជាតិកម្ពុជាដែលកំពុងធ្វើជាគ្រូបង្វឹកនៅសាលាបាល់ទាត់ជាតិបាទីក្នុងខេត្តតាកែវ៕
Source: Kampuchea Thmey Daily
0 Comments