ភ្នំពេញ ៖ បុរសវ័យចំណាស់ម្នាក់ ខណៈដែលជីវភាពកំពុងក្រខ្សត់ផង អត់មានរបរអ្វីក្រៅពីមុខរបររត់ឌុបគ្រាន់បានប្រាក់ចំណូលផ្គត់ផ្គង់ជីវភាពគ្រួសារ តែត្រូវបានចោរមកលួចកាច់.ក ម៉ូតូយកទៅបាត់ កាលពីវេលាម៉ោង១០និង៥០នាទីព្រឹក ថ្ងៃទី៣១ ខែកក្កដា ឆ្នាំ២០១៨ ស្ថិតនៅបន្ទប់ជួល ភូមិព្រៃទា សង្កាត់ចោមចៅ៣ ខណ្ឌពោធិ៍សែនជ័យ។
ម៉ូតូដែលចោរលួចបាត់ខាងលើ ម៉ាកហុងដា សេ១២៥ ស៊េរី២០១៥ ពណ៌ខ្មៅ ពាក់ស្លាកលេខ កំពង់ចាម 1G-6410 ជាម៉ូតូបង់រំលស់ មានម្ចាស់ជាជនរងគ្រោះ ឈ្មោះ សំ ស៊ាងអ៊ាន់ ភេទប្រុស អាយុ៥៨ឆ្នាំ មុខរបរ រត់ម៉ូតូឌុប ស្នាក់នៅកន្លែងកើតហេតុ មានស្រុកកំណើត ក្រុងសួង ខេត្តត្បូងឃ្មុំ។
តាមសម្តីជនរងគ្រោះបានឲ្យដឹងថា គាត់កំពុងតែអត់ផងជីវភាពគ្រួសារ រកមួយថ្ងៃ សម្រាប់រស់មួយថ្ងៃ ក្នុងរបររត់ម៉ូតូឌុប ហើយម៉ូតូនោះទៀតគាត់ទិញបង់រំលស់ជាមួយក្រុមហ៊ុន នៅសល់១ឆ្នាំទៀតទើបដាច់ មកដល់ពេលនេះ ត្រូវបានចោរមកលួចយកម៉ូតូទៅបាត់ទុក្ខជាន់លើទុក្ខរកនិយាយអ្វីមិនចេញបានត្រឹមនាំគ្នាពីរនាក់ប្ដីប្រពន្ធមកប្ដឹងសមត្ថកិច្ចឲ្យជួយស្រាវជ្រាវក្រែងអាចចៃដន្យវែកមុខរកចោរឃើញ តែដូចជាមិនងាយប៉ុន្មានទេ បើទោះរកមុខឃើញក៏មិនប្រាដកបានម៉ូតូមកវិញដែរ៕
Source: Kampuchea Thmey Daily
0 Comments