ភ្នំពេញ ៖ រដ្ឋាភិបាលសាធារណរដ្ឋប្រជាមានិតចិន បានសាទរការរៀបចំការបោះឆ្នោតជ្រើសតាំងតំណាងរាស្ត្រអាណត្តិទី៦នៅកម្ពុជា ហើយសន្យាថា នឹងបន្តធ្វើកិច្ចសហប្រតិបត្តិការជាមួយរាជរដ្ឋាភិបាលកម្ពុជាជាបន្តទៅទៀត។
លោក Geng Shuang អ្នកនាំពាក្យក្រសួងការបរទេសចិនបានមានប្រសាសន៍ថា រដ្ឋាភិបាលចិនសូមចូលរួមអបអរចំពោះប្រទេសកម្ពុជាដែលបានរៀបចំការបោះឆ្នោតប្រកបដោយជោគជ័យ ហើយសង្ឃឹមថានៅអាណត្តិថ្មីនេះកម្ពុជានឹងបន្តការអភិវឌ្ឍរបស់ខ្លួនឲ្យកាន់តែរីកចម្រើនបន្ថែមទៀត។
ការសាទររបស់រដ្ឋាភិបាលចិននេះបានធ្វើឡើងនៅក្នុងសន្និសីទកាសែតប្រចាំថ្ងៃមួយនៅប្រទេសចិនកាលពីថ្ងៃទី៣០ ខែកក្កដា ឆ្នាំ២០១៨កន្លងទៅនេះ ខណៈរដ្ឋាភិបាលអាមេរិក សហភាពអឺរ៉ុប កាណាដា និងអូស្ត្រាលីបានចេញសេចក្តីប្រកាសមិនគាំទ្រការរៀបចំបោះឆ្នោតជ្រើសតាំងតំណាងរាស្ត្រអាណត្តិទី៦នោះ។
មន្ត្រីអ្នកនាំពាក្យក្រសួងការបរទេសចិនបានចាត់ទុកការបោះឆ្នោតជ្រើសតាំងសមាជិកសភានៅកម្ពុជា គឺជារឿងផ្ទៃក្នុងកម្ពុជានិងជាព្រឹត្តិការណ៍នយោបាយសំខាន់ក្នុងជីវិតនយោបាយរបស់ប្រជាជនកម្ពុជា។
យោងតាមប្រព័ន្ធសារព័ត៌មានផ្លូវការរបស់ចិន ឆាយណាដេលីដែលចេញផ្សាយនៅព្រឹកថ្ងៃទី៣១កក្កដានេះ អ្នកនាំពាក្យរូបនោះក៏បានសាទរគណបក្សប្រជាជនកម្ពុជាដែលទទួលជ័យជំនះក្នុងការបោះឆ្នោតលើកនេះផងដែរ។
លោក Geng Shuangមានជំនឿជឿជាក់ថា ក្រោមការដឹកនាំរបស់រដ្ឋសភាអាណត្តិថ្មី និងរាជរដ្ឋាភិបាលថ្មី ប្រជាជនកម្ពុជានឹងបង្កើតសមិទ្ធផលថ្មីៗក្នុងការអភិវឌ្ឍរបស់ខ្លួនហើយចិនត្រៀមខ្លួនធ្វើការជាមួយកម្ពុជាដើម្បីអនុវត្តការព្រមព្រៀងរបស់មេដឹកនាំប្រទេសទាំងពីរផងដែរ។
គួរបញ្ជាក់ថា ការបោះឆ្នោតជ្រើសតាំងតំណាងរាស្ត្រអាណត្តិទី៦ដែលបានធ្វើឡើងកាលពីថ្ងៃទី២៩កក្កដា ឆ្នាំ២០១៨កន្លងទៅនេះ មានអ្នកចូលរួមសង្កេតការណ៍បោះឆ្នោតជាតិនិងអន្តរជាតិប្រមាណជាង៩ម៉ឺននាក់មកពី៥២ប្រទេសក្នុងនោះមានអ្នកសង្កេតការណ៍មកពីប្រទេសចិនផងដែរ។
ក្រុមអ្នកចូលរួមសង្កេតការណ៍បោះឆ្នោតជាតិនិងអន្តរជាតិទាំងនោះបានអះអាងថា ការបោះឆ្នោតជ្រើសតាំងតំណាងរាស្ត្រអាណត្តិទី៦នេះបានប្រព្រឹត្តិទៅដោយរលូនគ្មានការគំរាមគហែង និងមិនមានអំពើហិង្សាកើតឡើងឡើយ៕
Source: Kampuchea Thmey Daily
0 Comments