វៀតណាម​ដាក់​ពន្ធនាគារ​មនុស្ស​១៥​នាក់​បន្ថែម​ទៀត​ជុំវិញ​ការ​តវ៉ា​អំពី​តំបន់​សេដ្ឋកិច្ច

ប្រព័ន្ធ​ផ្សព្វផ្សាយ​រដ្ឋ​បាន​រាយការណ៍​កាលពី​ថ្ងៃ​អង្គា​រថា តុលាការ​វៀតណាម​ បាន​ផ្តន្ទាទោស​ដាក់​ពន្ធនាគារ​ដល់​បាតុករ​ចំនួន​១៥​នាក់​ ដែល​ត្រូវបាន​ចាប់ខ្លួន​អំឡុង​បាតុកម្ម​ទ្រង់ទ្រាយ​ធំ​កាលពី​ខែ​មុន​ប្រឆាំង​នឹង​តំបន់​សេដ្ឋកិច្ច​ពិសេស​នៅក្នុង​ប្រទេស​អាស៊ីអាគ្នេយ៍​មួយ​នេះ។

បើទោះបី​ជាមាន​កំណែទម្រង់​ស៊ីជម្រៅ​ក៏ដោយ ប្រទេស​វៀតណាម​ដែល​កាន់កាប់​ដោយ​របប​កុ​ម្មុយ​និ​ស្ត​គឺមាន​ការអត់ធ្មត់​តិចតួច​ណាស់​ចំពោះ​អ្នកប្រឆាំង​។ រដ្ឋធម្មនុញ្ញ​របស់​ប្រទេស​នេះ​អនុញ្ញាត​ឲ្យ​មាន​សេរីភាព​ក្នុងការ​ជួបជុំគ្នា​ប៉ុន្តែ​ការតវ៉ា​ជា​ញឹកញាប់​ត្រូវបាន​បំបែក​ដោយ​ប៉ូលិស​។​
​
មនុស្ស​យ៉ាងតិច​៣១​នាក់​ត្រូវបាន​ដាក់ពន្ធនាគារ​ដោយសារ​ការចូលរួម​ក្នុង​បាតុកម្ម​នៅ​ទូទាំងប្រទេស​ដែល​បង្កឡើង​ដោយ​ភាពភ័យខ្លាច​ថា វិនិយោគិន​មកពី​ប្រទេស​ចិន​នឹង​គ្របដណ្តប់​លើ​ការជួល​ដី​រយៈពេល​៩៩​ឆ្នាំ​សម្រាប់​ការអភិវឌ្ឍ​នៅក្នុង​តំបន់​ទាំងនោះ​។​
​
នៅក្នុង​ការកាត់ក្តី​មួយ​ដែល​បានបញ្ចប់​នៅ​យប់​ថ្ងៃ​ចន្ទ តុលាការ​ប្រជាជន​ទីក្រុង Bien Hoa នៅ​ភាគខាងត្បូង​ប្រទេស​បាន​ផ្តន្ទាទោស​បាតុករ​ឲ្យ​ជាប់ពន្ធនាគារ​រយៈពេល​ពី​៨​ទៅ​១៨​ខែ​។​
​
វិទ្យុ​សំឡេង​វៀតណាម​បាន​ផ្សាយ​ថា មនុស្ស​ចំនួន​៥​នាក់​ទៀត​ត្រូវបាន​ព្យួរទោស​ពី​១២​ទៅ​១៤​ខែ​ពីបទ “​បង្ក​អ​សណ្តាប់ធ្នាប់​សាធារណៈ​”​។​
​
របាយការណ៍​នេះ​បាន​ដកស្រង់​ការចោទប្រកាន់​ដែល​លើកឡើងថា ពួកគេ​ត្រូវបាន​ចាប់ខ្លួន​នៅពេល​ប្រមូល​ផ្តុំគ្នា​តាម​ដងផ្លូវ​កាលពី​ថ្ងៃទី​១០​ខែមិថុនា​ហើយ “​បណ្តាល​ឲ្យ​ស្ទះចរាចរណ៍​”​។​
​
ទោះបីជា​យ៉ាងណាក៏ដោយ មេធាវី​របស់​ពួកគេ​មិនអាច​ទាក់ទង​សុំ​ការបំភ្លឺ​បាន​ភ្លាមៗ​នោះទេ​។​
​កាលពី​ដើមខែ​នេះ មនុស្ស​ចំនួន​១៦​នាក់​ត្រូវបាន​ដាក់ពន្ធនាគារ​ក្រោម​ការចោទប្រកាន់​ដូចគ្នានេះ​នៅ​ខេត្ត Binh Thuan ។ ការតវ៉ា​កាលពី​ខែមិថុនា​បានប្រែក្លាយ​ទៅជា​អំពើហិង្សា​នៅក្នុង​ខេត្ត​នេះ​នៅពេល​ក្រុមអ្នកតវ៉ា​បាន​គប់​ដុំឥដ្ឋ​និង​គ្រាប់បែក​សាំង​ដាក់​ប៉ូលិស​។​
​
ការកាត់ក្តី​កាលពី​ថ្ងៃ​ចន្ទ​បាន​ធ្វើឡើង​មិន​ដល់​ពីរ​សប្តាហ៍​ផង​បន្ទាប់ពី​តុលាការក្រុង​ហូជីមិញ​បាន​បញ្ជា​ឲ្យ​ដោះលែង​និង​និរទេស​ជនជាតិ​អាមេរិក​ដើមកំណើត​វៀតណាម​ឈ្មោះ William Anh Nguyen អាយុ​៣២​ឆ្នាំ​ដែល​ក៏​ត្រូវបាន​ចាប់ខ្លួន​ពីបទ​បង្ក​អ​សណ្តាប់ធ្នាប់​សាធារណៈ​ផងដែរ​អំឡុង​បាតុកម្ម​៕ REUTERS

​

[caption id="attachment_955502" align="alignnone" width="700"] Police disperse a demonstration against a draft law on the Special Economic Zone in Hanoi, Vietnam June 10, 2018. REUTERS/Staff[/caption]

Source: Kampuchea Thmey Daily