ទឹកជំនន់មេគង្គលើ បានបន្តកើនឡើងលិច ចូលតាមបណ្តាព្រែក បឹងបួធម្មជាតិ នានា នៅតំបន់ទំនាបក្នុងស្រុកស៊ីធរកណ្ដាល និងស្រុកពារាំង ខេត្តព្រៃវែងហើយ

ភ្នំពេញ ៖ ស្របពេល ជំនន់ទន្លេមេគង្គ នៅផ្នែកខាងលើមានខេត្ត ស្ទឹង ត្រែង ក្រចេះ បាន បន្តការកើនឡើង បង្កឲ្យមានការលិចលង់ជាបន្តបន្ទាប់ នៅភូមិដ្ឋានរបស់ប្រជាពលរដ្ឋ ឥឡូវនេះ ទឹកទន្លេមេគង្គក្រោម ក៏បន្តហក់ឡើង លិចចូលតាមបណ្តាព្រែក បឹងបួធម្មជាតិ អាងភ្លិចទឹក និងផ្ទៃដីមួយចំនួន នៅតំបន់ទំនាបក្នុងស្រុកស៊ីធរកណ្តាល និងស្រុកពារាំង ខេត្តព្រៃវែង ជាបណ្តើរៗហើយ។ នេះបើយោងតាមសេចក្តីជូនដំណឹងរបស់ ក្រសួង ធនធានទឹក។

ក្រសួងធនធានទឹកនៅ រសៀល ថ្ងៃទី៣១ ខែកក្កដា បានជូនដំណឹងថា ទឹកទន្លេមេគង្គក្នុងខេត្តក្រចេះ បានបន្តកើនឡើងកៀកនឹងកម្រិតប្រកាសឲ្យប្រុងប្រយ័ត្នហើយ នៅវេលាថ្ងៃត្រង់នេះ ខណៈតំបន់ទំនាបមួយចំនួននៅតាមដងទន្លេ ត្រូវបានទឹកលិចចូលជាបណ្តើរៗ គិត មកដល់ម៉ោង ១២ ថ្ងៃត្រង់ ថ្ងៃទី ៣១ ខែកក្កដា ឆ្នាំ ២០១៨ នេះ។ ទឹកទន្លេមេគង្គក្នុងខេត្តក្រចេះ បានបន្តកើនឡើងដល់កម្ពស់ ២១,៥៦ ម៉ែត្រ ហើយ (កម្ពស់ប្រកាសឲ្យប្រុងប្រយ័ត្ន ២២ ម៉ែត្រ)។ ពេលនេះ ទឹកបានលិចចូលតំបន់ទំនាបមួយចំនួននៅតាមដងទន្លេក្នុងខេត្ត ជាបណ្តើរៗហើយ។ ចំណែក រដ្ឋបាលខេត្តក្រចេះ បានចេញសេចក្តីប្រកាសព័ត៌មាន ដោយអំពាវនាវដល់ប្រជាពលរដ្ឋ ឲ្យមានការប្រុងប្រយ័ត្នខ្ពស់ ចំពោះស្ថានភាពទឹកជំនន់ទន្លេមេគង្គឡើងជិតដល់ចំណុចប្រុងប្រយ័ត្នខ្ពស់ និងកងកម្លាំងទាំង៣ប្រភេទត្រៀមប្រចាំការ ដើម្បីជួយជម្លៀសប្រជាពលរដ្ឋ និងសត្វពាហនៈរកទីទួលសុវត្ថិភាព។

ក្រសួងបន្តថា សម្រាប់ខេត្ត ស្ទឹងត្រែង ជំនន់ទន្លេមេគង្គលើ បន្តកើនឡើងលិចចូលតំបន់មួយចំនួនទៀតក្នុងខេត្តស្ទឹងត្រែង ជាបន្តបន្ទាប់ គិតត្រឹម ថ្ងៃទី ៣១ ខែកក្កដា ឆ្នាំ ២០១៨ នេះ ទឹកទន្លេមេគង្គលើក្នុងខេត្តស្ទឹងត្រែង មានកម្ពស់ ១០,៨៤ ម (កម្ពស់ប្រកាសឱ្យប្រុងប្រយ័ត្ន ១០,៧០ ម) ។ តំបន់ទំនាបដែលនៅតាមដងទន្លេ ត្រូវបានទឹកលិចចូលជាបន្តបន្ទាប់។ ជាមួយគ្នានេះ លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម នាព្រឹកថ្ងៃទី ៣១ ខែកក្កដា ឆ្នាំ ២០១៨បានបញ្ចាឲ្យ មន្ទីរធនធានទឹក និងឧតុនិយមខេត្តស្ទឹងត្រែង ដំឡើងម៉ាស៊ីនបូមទឹកចល័តខ្នាតមធ្យម ចំនួន ០១ គ្រឿង ដើម្បីបូមរំដោះជំនន់ទឹកភ្លៀងចេញពីក្នុងក្រុងស្ទឹងត្រែង។ គួររំលឹកផងដែរថា នៅយប់ថ្ងៃទី ២៩ ឈានចូលថ្ងៃទី ៣០ ខែកក្កដា ក្រុងស្ទឹងត្រែង មានភ្លៀងធ្លាក់រហូតដល់ ១១២,៥ មម និងបានបង្កឲ្យមានជំនន់ទឹកភ្លៀងនៅផ្នែកខ្លះក្នុងក្រុង។

សូមរំលឹកថា កាលពីរសៀលថ្ងៃទី៣០កក្កដាក្រសួងធនធានទឹកនិងឧតុនិយម បានចេញសេចក្តីជូនដំណឹង បន្ថែម ពី ស្ថានភាពទឹក ជំនន់នៅតាមទន្លេមេគង្គ ក្នុងប្រទេសកម្ពុជា អាចបន្តកើនឡើង ២-៣ ថ្ងៃ បន្ថែមទៀត។ ក្រសួង ធនធានទឹក និង ឧតុនិយម បានប្រកាសថា គិត ត្រឹម ថ្ងៃទី ៣០ ខែកក្កដា ឆ្នាំ ២០១៨ ទឹកទន្លេ មេគង្គ ក្នុង ខេត្តក្រចេះ និង ខេត្តកំពង់ចាម បាន ហក់ ឡើង ជិត ដល់ ចំណុច ប្រកាសអាសន្ន ហើយ ទឹកទន្លេ មេគង្គ ក៏ នឹង បន្ត ឡើង រហូតដល់ ថ្ងៃទី ០៥ ខែសីហា ឆ្នាំ ២០១៨។

ក្រសួង ធនធានទឹក និង ឧតុនិយម លើក ឡើងថា បន្ទាប់ពី បានធ្វើ ការតាមដាន ព្យាករណ៍ លើ ស្ថានភាព អាកាសធាតុ និង ស្ថានភាព ទឹកជំនន់ ទន្លេមេគង្គ លើ រួចមក ក្រសួង ធនធានទឹក និង ឧតុនិយម សូម ជម្រាប ជូនដំណឹង ដល់ ក្រសួង ស្ថាប័ន ពាក់ព័ន្ធ អាជ្ញាធរ ដែនដី និង សាធារណជន មេត្តា ជ្រាបថា ដោយសារ មានការ ធ្លាក់ភ្លៀង ជា បន្តបន្ទាប់ ក្នុង កម្រិត ពី មធ្យម ទៅ ច្រើន នៅក្នុង តំបន់ អាង ទន្លេមេគង្គ ក្នុងប្រទេស ថៃ និង ប្រទេស ឡាវ បាន បង្ក ឲ្យ ទឹកទន្លេ មេគង្គ ក្នុងប្រទេស កម្ពុជា បន្ត កើនឡើង ២-៣ ថ្ងៃ បន្ថែមទៀត ។

សេចក្តីជូនដំណឹង ដដែល លើកឡើងថា យោងតាម ការព្យាករ កម្ពស់ ទឹកទន្លេ មេគង្គ លើ កម្ពុជា អាច នឹង កើន ឡើងដល់ ថ្ងៃទី ០៥ ខែសីហា ឆ្នាំ ២០១៨ ដោយ លើស កម្រិត ប្រកាស ឲ្យ ប្រុងប្រយ័ត្ន ។ ក្នុងនោះ រួមមាន ៖. នៅ ថ្ងៃទី ០៣ ខែសីហា ឆ្នាំ ២០១៨ ទន្លេមេគង្គ ខេត្តស្ទឹងត្រែង ទឹក អាច នឹង កើន ឡើងដល់ កម្ពស់ ១១,៤០ ម៉ែត្រ ( កម្ពស់ ប្រកាស ឲ្យ ប្រុងប្រយ័ត្ន ១០,៧០ ម៉ែត្រ ) ។. នៅ ថ្ងៃទី ០៤ ខែសីហា ឆ្នាំ ២០១៨ ទន្លេមេគង្គ ខេត្តក្រចេះ ទឹក អាច នឹង កើន ឡើងដល់ កម្ពស់ ២២,១៥ ម៉ែត្រ ( កម្ពស់ ប្រកាស ឲ្យ ប្រុងប្រយ័ត្ន ២២,០០ ម៉ែត្រ ). នៅ ថ្ងៃទី ០៥ ខែសីហា ឆ្នាំ ២០១៨ ទន្លេមេគង្គ ក្នុង ខេត្តកំពង់ចាម ទឹក អាច នឹង កើន ឡើងដល់ កម្ពស់ ១៥,២៥ ម៉ែត្រ ( កម្ពស់ ប្រកាស ឲ្យ ប្រុងប្រយ័ត្ន ១៥,២០ ម៉ែត្រ )។

ជាមួយគ្នានេះ ក្រសួង ធនធានទឹក និង ឧតុនិយម ក៏បាន លើកឡើងថា យោង លើ ស្ថានភាព ទឹក ដូច បាន ព្យាករ និង ជម្រាបជូន ខាងលើ សូម ក្រសួង ស្ថាប័ន ពាក់ព័ន្ធ អាជ្ញាធរ ដែនដី និង សាធារណជន មេត្តា ជ្រាប ជា ព័ត៌មាន និង បង្កើន ការប្រុងប្រយ័ត្ន ខ្ពស់ ដើម្បី ជៀសវាង នូវ គ្រោះថ្នាក់ ផ្សេងៗ ដែល អាច កើតមានឡើង ជាយថាហេតុ៕