សេចក្តីរាយការណ៍​ ​៖​ កូរ៉េខាងជើង​កំពុង​អភិវឌ្ឍ​មី​ស៊ី​ល​ថ្មី

កាសែត Washington Post បាន​រាយការណ៍​កាលពី​ថ្ងៃ​ចន្ទ​ថា ទីភ្នាក់ងារ​ស៊ើបការណ៍​សម្ងាត់​អាមេរិក​បាន​រកឃើញថា ប្រទេស​កូរ៉េខាងជើង​កំពុង​ផលិត​មី​ស៊ី​ល​ថ្មី​។ ការលើកឡើង​នេះ​គឺ​ផ្អែកលើ​រូបថត​ផ្កាយរណប ​ដែល​ថត​ក្នុង​រយៈពេល​ប៉ុន្មាន​សប្តាហ៍​ថ្មីៗ ​និង​ភស្តុតាង​ថ្មី​ផ្សេងទៀត។

កាសែត​នេះ​ បាន​រាយការណ៍​ដោយ​លើកឡើង​ប្រភព​ជិតស្និទ្ធ​នឹង​ការ​ស៊ើបការណ៍​ថា ក្នុង​រយៈពេល​ប៉ុន្មាន​សប្តាហ៍​បន្ទាប់ពី​ជំនួប​កំពូល​វាង​លោក​ប្រធានាធិបតី ដូ​ណា​ល់ ត្រាំ និង​មេដឹកនាំ​កូរ៉េខាងជើង​លោក គីម ជុង​អ៊ុន​, ក្រុង​ព្យុងយ៉ាង​ហាក់ដូចជា​កំពុង​អភិវឌ្ឍ​យ៉ាងហោចណាស់​មី​ស៊ី​ល​ឆ្លង​ទ្វីប (ICBM) មួយ​គ្រាប់​ឬ​ពីរ​គ្រាប់​។​
​
រោងចក្រ​នៅ​ខាងក្រៅ​ទីក្រុង​ព្យុងយ៉ាង​ក្នុង​តំបន់ Sanumdong គឺជា​កន្លែង​ដែល​ការងារ​កំពុងដំណើរកា​រ​ដើម្បី​ផលិត ICBM ដំបូង​របស់​កូរ៉េខាងជើង​ដែលមាន​សមត្ថភាព​ឈានដល់​សហរដ្ឋអាមេរិក​។​
​ការផលិត​មី​ស៊ី​ល​ថ្មី​ដែល​ត្រូវបាន​រាយការណ៍​នេះ​គឺ​បាន​កើតឡើង​បន្ទាប់ពី​ការផ្តល់​សក្ខីកម្ម​របស់​រដ្ឋមន្ដ្រីការបរទេស​លោក Mike Pompeo កាលពី​សប្តាហ៍​មុន​ដែល​លោក​បាន​ប្រាប់​សមាជិក​ព្រឹទ្ធសភា​ថា ក្រុង​ព្យុងយ៉ាង​បន្តធ្វើ​សម្ភារៈ​នុយក្លេអ៊ែរ​ប៉ុន្តែ​មិនបាន​បង្ហាញថា​តើ​រដ្ឋ​មួយ​នេះ​កំពុង​ផលិត​មី​ស៊ី​ល​ថ្មី​ដែរ​ឬ​អត់​។​
​
កាសែត​រាយការណ៍​ថា រូបភាព​ពី​ទីភ្នាក់ងារ​ស៊ើប​ការ​ភូមិសាស្ត្រ​ជាតិ​បានបង្ហាញ​ពី​ការងារ​ផលិត ICBM ប្រភេទ Hwasong-15 យ៉ាងហោចណាស់​មួយគ្រា​ប់​កំពុង​បន្ត​នៅ​រោងចក្រ​Sanumdong​។​
​មន្ត្រី​អាមេរិក​ម្នាក់​បាន​ប្រាប់​កាសែត​នេះ​ថា “​យើង​ឃើញ​ពួកគេ​ធ្វើការ​ដូច​កាលពីមុន​អញ្ចឹង​”​។​
​
ប៉ុន្តែ​នៅ​ស្ថានីយ៍​បាញ់​បង្ហោះ​ផ្កាយរណប Sohae លើ​ឆ្នេរ​ភាគ​ខាងលិច​របស់​កូរ៉េខាងជើង​, កម្មករ​អាច​ត្រូវបាន​គេ​មើលឃើញ​កំពុង​រុះរើ​ម៉ាស៊ីន​ធ្វើតេស្ត​ស្របតាម​ការសន្យា​ដែល​លោក​គីម​ធ្វើឡើង​ចំពោះ​លោក​ត្រាំ​នៅក្នុង​កិច្ចប្រជុំ​កំពូល​៕ AFP

​

Source: Kampuchea Thmey Daily