ភ្នំពេញ ៖ រដ្ឋាភិបាលកូរ៉េ តាមរយៈទីភ្នាក់ងារសហប្រតិបត្តិការអន្តរជាតិកូរ៉េ (កយកា)បានផ្ដល់អាហារូបករណ៍ ដល់មន្ដ្រីរាជការវ័យក្មេងកម្ពុជាចំនួន១៤រូប ដើម្បីទៅបន្ដការសិក្សាថ្នាក់អនុបណ្ឌិតជំនាញផ្នែកអប់រំ និងបច្ចេកទេសនៅក្នុងប្រទេសកូរ៉េរយៈពេល២ឆ្នាំ ចាប់ពីឆ្នាំ២០១៨ ដល់ឆ្នាំ២០២០ខាងមុខនេះ។
លោក ចុង យុនហ្គីល (Jeong Yun Gil) ប្រធានតំណាងការិយាល័យ កយកា ប្រចាំកម្ពុជា បានមានប្រសាសន៍ក្នុងពិធីតម្រង់ទិសដល់មន្ត្រីរាជការមកពីស្ថាប័នផ្សេងៗ ដែលត្រូវជ្រើសរើសសម្រាប់កម្មវិធីអាហារូបករណ៍ទៅសិក្សានៅសាធារណរដ្ឋកូរ៉េ ថ្នាក់អនុបណ្ឌិតសម្រាប់ ឆ្នាំសិក្សា ២០១៨-២០២០កាលពីព្រឹកថ្ងៃទី២៤ ខែកក្កដា ថាការផ្ដល់អាហារូបករណ៍នេះ គឺជាឱកាសមួយដ៏ល្អសម្រាប់មន្ដ្រីរាជការវ័យក្មេងកម្ពុជាក្នុងការ ទទួលបាននូវការអប់រំ និងជំនាញបច្ចេកទេស សម្រាប់ការសិក្សាលើមុខវិជ្ជាផ្សេងៗគ្នា តាមសាកល វិទ្យាល័យល្បីៗនៅប្រទេសកូរ៉េចំនួន១៣ នៅក្នុងវិស័យកសិកម្ម វិស័យអភិវឌ្ឍជនបទ វិស័យអប់រំ វិស័យអភិបាលកិច្ច វិស័យបច្ចេកវិទ្យា និងវិស័យបរិស្ថាន និងថាមពល។
លោក ចុង យុនហ្គីល បានជំរុញដល់បេក្ខភាព ជាប់អាហារូបករណ៍ទាំងអស់ ត្រូវប្រើប្រាស់ឱកាសដ៏ល្អនេះដើម្បីរៀនសូត្រពីការអភិវឌ្ឍន៍របស់ប្រទេស កូរ៉េ ក្នុងអំឡុងពេលស្នាក់នៅ និងសិក្សារៀនសូត ព្រមទាំងចែករំលែកបទពិសោធន៍របស់ខ្លួននៅក្នុង ប្រទេសកម្ពុជាសម្រាប់ការអភិវឌ្ឍប្រកបដោយចីរភាព។ លោកបានបន្ថែមថា ការផ្ដល់អាហារូបករណ៍នេះ គឺបានផ្ដល់ជូនដល់មន្ត្រីរាជការវ័យក្មេងកម្ពុជា ដែលមានទេពកោសល្យ និងជួយអភិវឌ្ឍន៍លើជំនាញ វិជ្ជាជីវៈ និងចំណេះដឹងនៅតាមក្រសួង ស្ថាប័នរបស់រាជរដ្ឋាភិបាល ដែលដើរតួនាទីយ៉ាងសំខាន់នៅក្នុង ប្រទេសកម្ពុជា។
កញ្ញា ម៉េង ហ៊ុយទៀង ជាបេក្ខភាពជាប់អាហារូបករណ៍ថ្នាក់អនុបណ្ឌិតទៅសិក្សានៅប្រទេសកូរ៉េ ផ្នែកអប់រំ បាននិយាយថា អាហារូបករណ៍នេះពិតជាមានសារៈសំខាន់ណាស់ក្នុងការផ្ដល់ឱកាសដល់ មន្ដ្រីរាជការកម្ពុជាទៅបន្ដការសិក្សាថ្នាក់អនុបណ្ឌិតនៅប្រទេសកូរ៉េ ដើម្បីទទួលបាននូវចំណេះដឹង បទពិសោធន៍ ជំនាញបច្ចេកវិទ្យា និងប្រព័ន្ធអប់រំនៅក្នុងប្រទេសកូរ៉េ ដែលមានការរីកចម្រើន។
កញ្ញា បានបន្ដថា ការជ្រើសរើសយកមុខវិជ្ជាអប់រំនេះ ដោយមើលឃើញថា ការអប់រំនេះគឺពិតជាដើរតួនាទី សំខាន់ ក្នុងការបណ្ដុះបណ្ដាលធនធានមនុស្ស និងធ្វើការអភិឌ្ឍប្រទេសជាតិ។
ចំណែក លោក ចេង បូរមី ជាបេក្ខជនជាប់អាហារូបករណ៍ដែលសិក្សាលើផ្នែកអភិវឌ្ឍន៍ ទីក្រុងបានឲ្យដឹងថា ការទៅសិក្សាលើជំនាញនេះនៅក្នុងប្រទេសកូរ៉េ នឹងទទួលបាននូវបទពិសោធន៍ ចំណេះដឹង និងបច្ចេកទេសល្អៗនៅក្នុងប្រទេសកូរ៉េ ហើយអាចស្វែងយល់អំពីសិល្បៈ វប្បធម៌ និងការរស់នៅរបស់ប្រជាជន ក៏ដូចជាសិស្ស និស្សិតកូរ៉ែ ជាពិសេសពេលត្រឡប់មកកម្ពុជា នឹងយកចំណេះ ជំនាញទាំងអស់នេះ មកធ្វើការអភិវឌ្ឍប្រទេសកម្ពុជា ដើម្បីធ្វើយ៉ាងណាឲ្យមានការីកចម្រើនដូច ប្រទេសកូរ៉េដែរ។
កម្មវិធីអាហារូបករណ៍របស់កយកា គឺជាកម្មវិធីដែលទទួលបានមូលនិធិយ៉ាងពេញលេញ ដែលគាំទ្រដោយរដ្ឋាភិបាល នៃសាធារណរដ្ឋកូរ៉េ បានចាប់ផ្តើមនៅក្នុងប្រទេសកម្ពុជាចាប់តាំងពី ឆ្នាំ១៩៩៤មក ដើម្បីចែករំលែកបទពិសោធន៍ពីការអភិវឌ្ឍន៍របស់កូរ៉េ ដល់ប្រទេសកម្ពុជា និងចូលរួម ចំណែកដល់តម្រូវការអភិវឌ្ឍន៍ សម្រាប់រយៈពេលវែងរបស់ប្រទេសកម្ពុជា។
គួរបញ្ជាក់ថា ចាប់តាំងពីឆ្នាំ១៩៩៤រហូតមកដល់ពេលនេះ រដ្ឋាភិបាលកូរ៉េ តាមរយៈទីភ្នាក់ងារសហប្រតិបត្តិការអន្តរជាតិកូរ៉េ(កយកា)បានផ្ដល់អាហារូបករណ៍ ដល់ មន្ដ្រីរាជការវ័យក្មេងកម្ពុជាចំនួន១៦០រូប៕
Source: Kampuchea Thmey Daily
0 Comments