ភ្នំពេញ ៖ ក្រសួងធនធានទឹក និងឧតុនិយម បើកយុទ្ធនាការជួសជុលទ្រង់ទ្រាយធំទំនប់សណ្តរស្ទឹងព្រែកត្នោត ក្នុងភូមិសាស្ត្ររាជធានីភ្នំពេញ និងខេត្តកណ្តាល ដោយប្រើប្រាស់ គ្រឿងចក្រជិត ៥០ គ្រឿង សំរុក ជួសជុល ឲ្យរួចរាល់រយៈពេល ពីរថ្ងៃ ខណៈទឹក ស្ទឹងព្រែកត្នោត បានស្រក ងាយស្រួលឲ្យក្រុមការងារជួសជុលនិងថែទាំ។
ក្រសួងធនធានទឹកនិងឧតុនិយមបានឲ្យដឹងថា នៅព្រឹកថ្ងៃទី ២៤ ខែកក្កដា ឆ្នាំ ២០១៨ នេះ ទឹកជំនន់ស្ទឹងព្រែកត្នោត ទាំងក្នុងភូមិសាស្ត្ររាជធានីភ្នំពេញ និងខេត្តកណ្តាល បានស្រកផុតពីការព្រួយបារម្ភហើយ។ ទន្ទឹមនឹងការស្រកចុះភ្លាមនេះ លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម បានបញ្ជាឲ្យក្រុមការងារ បើកយុទ្ធនាការទ្រង់ទ្រាយធំ ជួសជុលឡើងវិញនូវទំនប់សណ្តរស្ទឹងព្រែកត្នោត ជាពិសេស គឺផ្តោតទៅលើកន្លែងដែលមានការហូរច្រោះនាពេលកន្លងមក។
ក្រសួងបន្តថា យុទ្ធនាការជួសជុលទ្រង់ទ្រាយធំនេះ ត្រូវបានធ្វើឡើងនៅ ៥ ទីតាំងសំខាន់ៗ ដោយប្រើប្រាស់គ្រឿងចក្រជិត ៥០គ្រឿង ហើយនឹងប្រើរយៈពេលយ៉ាងយូរបំផុត ០២ ថ្ងៃ ឱ្យរួចរាល់ជាស្ថាពរ។
ក្រសួងបានបញ្ជាក់ទៀតថា ការហូរច្រោះ (រន្ធនាគ) ទំនប់សណ្តរស្ទឹងព្រែកត្នោត ត្រង់ចំណុចភូមិថ្ម ឃុំទៀន ខណ្ឌដង្កោ ត្រូវបានចាត់ទុកថាជារន្ធនាគដែលធំបំផុត និងមិនដែលជួបប្រទះនាពេលកន្លងមក។ រន្ធនាគនេះមានមុខកាត់ ៣,៦០ម៉ែត្រ និងជម្រៅ ៤,៦០ ម៉ែត្រ។
គឺត្រង់ចំណុចនេះហើយ ដែលលោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម បានដឹកនាំក្រុមការងារ អន្តរាគមន៍ទប់ទល់រហូតដល់ម៉ោងជាង ០១ រំលងអធ្រាត្រ ឈានចូលថ្ងៃទី ២២ ខែកក្កដា ឆ្នាំ ២០១៨ កន្លងទៅ ។ នៅព្រឹកនេះ ក្រសួងបាន និងកំពុងបើកយុទ្ធនាការជួសជុលឡើងវិញ។
សូមរំលឹកថា ក្រោយពីមានជំនន់ទឹកភ្លៀង នៅស្ទឹងព្រែកត្នោតនិង ផ្លូវជាតិលេខ៤ កាលពីថ្មីកន្លងមកនេះលោក លឹម គានហោ រដ្ឋមន្ត្រី ក្រសួងធនធានទឹកបាន បង្កើតក្រុមការងារ២៤ម៉ោងលើ២៤ ជា៦ក្រុមដើម្បីពិនិត្យនិងតាមដានជួយអន្តរាគមន៍ប្រសិនបើមានការចាំបាច់ ក្រុមទី១៖ ត្រូវប្រចាំការតាមដានលើស្ថានភាពទឹកជំនន់ និងរបាយទឹកភ្លៀងក្នុងភូមិសាស្ត្រស្រុកភ្នំស្រួច, ក្រុមទី២៖ ត្រូវប្រចាំការនៅទ្វារទឹករលាំងជ្រៃ ហើយត្រូវបន្តបើកទ្វារទាំងអស់ទម្លាក់កំពស់ទឹកក្នុងស្ទឹងព្រែកត្នោតឲ្យទាប ដើម្បីស្រូបយកទឹកជំនន់ ពីស្ទឹងស្រែខ្លុងបានលឿន, ក្រុមទី៣៖ ដែលកំពុងប្រចាំការនៅទំនប់៧មករា (កំពង់ទួល) ត្រូវបន្តរំដោះទឹកចេញបន្ថែម ដើម្បីកុំឲ្យចាល់ទឹកដែលទម្លាក់ពីកំពង់ស្ពឺទៅ ហើយពេលទឹកពីកំពង់ស្ពឺ ទៅដល់កំពង់ទួល ក្រុមការងារត្រូវចាត់ចែងបែងចែកទឹកនេះជា០២ផ្នែក គឺមួយផ្នែកត្រូវបង្វែរចូលទៅទន្លេបាទី តាមរយៈប្រឡាយលេខ៧៨ និងតាមរយៈស្ទឹងតូច ឯមួយផ្នែកទៀត ត្រូវទម្លាក់តាមព្រែកហូរ ចូលទៅទន្លេបាសាក់។
ក្រុមទី៤ និងក្រុមទី៥៖ ត្រូវប្រចាំការតាមដានស្ថានភាពទឹក និងរបាយទឹកភ្លៀង នៅស្ទឹងតាសាល ស្ទឹងឃ្លៀច និងស្ទឹងអូរតូចៗមួយចំនួនទៀត ដែលហូរចូលស្ទឹងព្រែកត្នោត និងក្រុមទី៦៖ (ក្រុមគ្រឿងចក្រធុនធ្ងន់) ត្រូវត្រៀមលក្ខណៈ២៤ម៉ោង លើ២៤ម៉ោង ដើម្បីអន្តរាគមន៍ក្នុងករណីចាំបាច់ ក៏ដូចជាត្រៀមជួសជុលឡើងវិញជាបន្ទាន់ នូវហេដ្ឋារចនាសម្ព័ន្ធធារាសាស្ត្រ ដែលអាចរងការខូចខាតដោយទឹកជំនន់៕
Source: Kampuchea Thmey Daily
0 Comments