ភ្នំពេញ ៖ មន្ត្រីជាន់ខ្ពស់ក្រសួងការពារជាតិអះអាងថា រាជរដ្ឋាភិបាលកម្ពុជានៅតែប្តេជ្ញាចិត្តខ្ពស់បន្តសកម្មភាពមនុស្សធម៌ តាមរយៈការចូលរួមបេសកកម្មរក្សាសន្តិភាពរបស់អង្គការសហប្រជាជាតិ។
នៅក្នុងពិធីទទួលដំណើរមាតុភូមិនិវត្តន៍របស់កងវិស្វកម្មព្រលានយន្តហោះលេខ១៨៩ ចំនួន ១៦៥នាក់ និងកងកម្ទេចគ្រាប់មិនទាន់ផ្ទុះលេខ១២៣ ចំនួន ១៤៤នាក់ ដែលបញ្ចប់បេសកកម្មរក្សាសន្តិភាពនៅប្រទេសម៉ាលី និងកងរាជអាវុធហត្ថលេខ៦១៩ ចំនួន ៧៣នាក់ ដែលបញ្ចប់បេសកកម្មរក្សាសន្តិភាពនៅសាធារណរដ្ឋស៊ូដង់ខាងត្បូង កាលពីរសៀលថ្ងៃទី២៣ ខែកក្កដា ឆ្នាំ២០១៨ នៅអគារមិត្តភាព នៃទីស្តីការគណៈរដ្ឋមន្ត្រី សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ តំណាងដ៏ខ្ពង់ខ្ពស់សម្តេចតេជោនាយករដ្ឋមន្ត្រី ហ៊ុន សែន នាយករដ្ឋមន្ត្រី ថ្លែងបញ្ជាក់ថា នៅក្នុងឆ្នាំ២០១៨នេះ រាជរដ្ឋាភិបាលកម្ពុជា នៅតែប្តេជ្ញាចិត្តខ្ពស់បន្តសកម្មភាពមនុស្សធម៌ តាមរយៈការចូលរួមបេសកកម្មរក្សាសន្តិភាពរបស់អង្គការសហប្រជាជាតិក្នុងលោកជាបន្តទៀត ដែលក្នុងនោះជំរុញបង្កើនការបញ្ជ្រាបការប្រើប្រាស់កម្លាំងជាស្ត្រី “យេនឌ័រ” នៅគ្រប់ផ្នែកក្នុងតំបន់បេសកកម្ម ដោយដើរតួនាទី ជានគរបាលយោធា អ្នកស៊ើបអង្កេត សង្កេតការណ៍យោធា នាយសេនាធិការ និងជាមេបញ្ជាការបេសកកម្ម។ល។ ទន្ទឹមនេះផ្តោតបន្ថែមទៅលើសកម្មភាពវិស័យមួយចំនួន ដែលកម្ពុជាមានលទ្ធភាពចូលរួម និងខិតខំធ្វើការកែលម្អ ការគ្រប់គ្រងពង្រឹងធនធានមនុស្ស ការបង្កើនចំនួនចូលរួមជាស្ត្រី ដើម្បីឲ្យស្របទៅនឹងទស្សនៈយេនឌ័រ គឺការលើកស្ទួយស្ត្រីដើម្បីសន្តិភាព និងសន្តិសុខក្នុងប្រតិបត្តិការសន្តិភាពរបស់អង្គការសហប្រជាជាតិ។ ក្នុងនាមរាជរដ្ឋាភិបាល ក្រសួងការពារជាតិ សម្តេចបានអបអរសាទរចំពោះស្នាដៃដ៏ត្រចេះត្រចង់ ដែលកងកម្លាំងមួកខៀវកម្ពុជាសម្រេចបានក្នុងការបំពេញបេសកកម្មអន្តរជាតិ ដើម្បីបុព្វហេតុសន្តិភាព និងមនុស្សធម៌នៅលើលោកនាពេលនេះ។
សម្តេចពិជ័យសេនាក៏បានផ្តាំផ្ញើសាកសួរសុខទុក្ខ និងសេចក្តីនឹករលឹកខ្លាំងបំផុតចំពោះយុទ្ធជន យុទ្ធនារី នៃកងកម្លាំងរក្សាសន្តិភាពទាំងអស់ ដែលកំពុងបំពេញបេសកកម្មរក្សាសន្តិភាពរបស់អង្គការសហប្រជាជាតិនៅក្រៅប្រទេសផងដែរ។ សម្តេចពិជ័យសេនាបន្តថា ការបញ្ចប់បេសកកម្មរក្សាសន្តិភាពប្រកបដោយជោគជ័យ និងសុវត្ថភាពនៅសាធារណរដ្ឋម៉ាលី និងសាធារណរដ្ឋស៊ូដង់ខាងត្បូងនាពេលនេះ គឺជាសមិទ្ធផលថ្មីមួយបន្ថែមទៀត ក្នុងចំណោមសមិទ្ធផលជាច្រើន ដែលកងកម្លាំងកម្ពុជាទទួលបានក្នុងការរួមចំណែកបំពេញបេសកកម្មរក្សាសន្តិភាពរបស់អង្គការសហប្រជាជាតិ។ លទ្ធផលដែលទទួលបាននេះ ក៏ជាស្នាដៃដែលមានតម្លៃមិនអាចកាត់ថ្លៃបាន ប្រកបដោយកិត្តិយសជូនជាតិមាតុភូមិនៃយើង និងជាកិត្តិយសសម្រាប់ប្រជាជាតិកម្ពុជា ដែលជាសក្ខីកម្មបញ្ជាក់ថា ប្រជាជនកម្ពុជាពិតជាមាន “សុខដុមនីយកម្មជាតិ” មានសមត្ថភាពគ្រប់គ្រាន់ក្នុងការកសាងប្រទេសជាតិរបស់ខ្លួន ដែលជាប្រទេសមួយកំពុងដើរតួនាទីយ៉ាងសកម្មដោយស្មើសិទ្ធិ ស្មើភាព ក្នុងគ្រប់កិច្ចការតំបន់ និងនៅលើឆាកអន្តរជាតិ។
លោក Alexandre Huynh តំណាងអង្គការសហប្រជាជាតិប្រចាំកម្ពុជា តាងនាមប្រព័ន្ធអង្គការសហប្រជាជាតិ បានថ្លែងអំណរគុណដល់កងកម្លាំងបេសកកម្មកម្ពុជាទាំងអស់ ដែល បានចូលរួមចំណែកយ៉ាងសកម្ម ក្នុងនោះមានយោធិននារីក្លាហានកម្ពុជា ក្នុងចំណោមបុគ្គលិករក្សាសន្តិភាព បានវិលត្រឡប់មកពីបំពេញបេសកកម្មប្រកបដោយសុវត្ថិភាពនាថ្ងៃនេះ។ វត្តមានយុទ្ធនារី គឺបញ្ជាក់ច្បាស់ឲ្យឃើញពីភាពបម្រែបម្រួលជាវិជ្ជមានផ្នែកយេនឌ័រក្នុងកងយោធពលខេមរភូមិន្ទ។
លោកបញ្ជាក់ថា ប្រតិបត្តិការរបស់អង្គការសហប្រជាជាតិមានលក្ខណៈចម្រុះក្នុងតំបន់ជាច្រើន ហើយកម្លាំងរក្សាសន្តិភាពត្រូវធ្វើការចល័តតាមទីកន្លែង ដែលសន្តិភាពមានការធ្លាក់ចុះ ប្រឈមនិងអំពើហិង្សា និងហានិភ័យដោយជម្លោះប្រដាប់អាវុធ។ ទោះបីជាពេលខ្លះកងកម្លាំងរក្សាសន្តិភាពត្រូវប្រឈមមុខនឹងហានិភ័យខ្ពស់ក៏ដោយ ក៏កងរក្សាសន្តិភាពជួយសហគមន៍ឲ្យមានស្ថេរភាព ផ្តល់ការការពារដល់ជនស៊ីវិល លើកកម្ពស់នីតិរដ្ឋ ជំរុញសិទ្ធិមនុស្ស គាំទ្រការកសាងសន្តិភាព និងជំនួយក្នុងសកម្មភាពមនុស្សធម៌។
លោកក៏បានសរសើរថា កាលពីឆ្នាំ១៩៩០ ប្រទេសកម្ពុជាធ្លាប់ទទួលការគាំទ្រពីកងកម្លាំងរក្សាសន្តិភាព ដើម្បីស្វែងរកសន្តិភាពសម្រាប់ប្រទេស និងប្រជាជនខ្លួន ប៉ុន្តែប៉ុន្មានឆ្នាំក្រោយមកនេះប្រទេសកម្ពុជា ក៏បានចាប់ផ្តើមបញ្ចេញកម្លាំងក្នុងប្រតិបត្តិការរក្សាសន្តិភាពពាសពេញពិភពលោក។
ជាងនេះទៀត កម្ពុជានៅតែបង្ហាញនូវការតាំងចិត្តរបស់ខ្លួន ក្នុងការបរិច្ចាគកងកម្លាំងក្នុងបេសកកម្មអង្គការសហប្រជាជាតិ ដើម្បីសន្តិភាព និងសន្តិសុខពាសពេញពិភពលោក៕
Source: Kampuchea Thmey Daily
0 Comments