គណបក្សប្រជាជនកម្ពុជាដែលគិតមកដល់ពេលនេះមានអាយុកាល ៦៧ ឆ្នាំ ពិនិត្យជារួមប្រវត្តិនៃសកម្មភាពនយោបាយរបស់គណបក្សប្រជាជនកម្ពុជាចាប់តាំងពីថ្ងៃកំណើតរបស់ខ្លួនមកទល់បច្ចុប្បន្ននេះ គឺបានធ្វើការងារជាច្រើនប្រកបដោយភាពក្លាហានមោះមុតឥតរាថយនៅលើមាគ៌ាគោលនយោបាយមួយដែលមានគោលដៅច្បាស់លាស់មានភាពប្រាកដនិយម និងមានចក្ខុវិស័យវែងឆ្ងាយ ប្រកបដោយភាពគ្រប់ជ្រុងជ្រោយ និងសង្គតិភាព។
នៅក្នុងសកម្មភាពជាប្រវត្តិសាស្ត្រចាប់ពីកកើតមកដល់បច្ចុប្បន្នគណបក្សប្រជាជនកម្ពុជាបានធ្វើការងារដើម្បីបុព្វហេតុជាសារវន្តចម្បងៗ៤យ៉ាងគឺ កិច្ចការពារឯករាជ្យអធិបតេយ្យ និងបូរណភាពទឹកដី ដ៏ពេញលេញរបស់កម្ពុជា ព្រមទាំងកិត្យានុភាពដ៏ខ្ពស់ត្រដែតរបស់ជាតិនៅលើឆាកអន្តរជាតិ;ការតស៊ូរំដោះប្រជាជនពីរបបប្រល័យពូជសាសន៍ប៉ុលពត ដ៏សាហាវឃោរឃៅ និងការការពារដាច់ខាត មិនឲ្យការកាប់សម្លាប់សោកនាដកម្មការបំផ្លិចបំផ្លាញ និងទុក្ខវេទនាពីអតីតកាលនោះ ឤចវិលត្រឡប់មកវិញជាថ្មីម្តងទៀត ,ការតស៊ូពុះពារនូវការលំបាកជាមួយនឹងការលះបង់គ្រប់បែបយ៉ាង ដើម្បីដណ្តើមយកមកជូនប្រទេសជាតិនិងប្រជាជនកម្ពុជា នូវសុខសន្តិភាពស្ថិរភាព និងការបង្រួបបង្រួមជាតិពេញលេញ នៅក្រោមដំបូលនៃរដ្ឋធម្មនុញ្ញតែមួយព្រះមហាក្សត្រតែមួយអង្គ និងរាជរដ្ឋាភិបាលតែមួយ នៅក្នុងព្រះរាជាណាចក្រកម្ពុជាមួយ ដែលគ្មានការបែកបាក់ និង គ្មានការបែងចែកទឹកដីជាតំបន់ត្រួតត្រាច្រើនផ្សេងគ្នា; និងការស្តារ និងការអភិវឌ្ឍប្រទេសជាតិ ព្រមទាំងការលើកកម្ពស់ជីវភាពរស់នៅរបស់ប្រជាជន ឈានឆ្ពោះទៅកាន់វិបុលភាពចម្រើនរុងរឿង តាមរយៈការកសាងជាជំហានៗនូវសង្គមកម្ពុជាមួយ ដែលមានសុខសន្តិភាពស្ថិរភាពសណ្តាប់ធ្នាប់សង្គម,មានការគោរពយ៉ាងខ្ជាប់ខ្ជួននូវគោលការណ៍ប្រជាធិបតេយ្យ នីតិរដ្ឋព្រមទាំងសិទ្ធិ និង សេចក្តីថ្លៃថ្នូររបស់មនុស្ស,មានការអភិវឌ្ឍប្រកបដោយចីរភាព បរិយាប័ន្ន និងសមធម៌,មានកោសិកាផ្សារភ្ជាប់គ្នា,មានប្រជាជនប្រកបដោយចំណេះដឹងខ្ពស់ និងវប្បធម៌ជ្រៅជ្រះ ហើយមានជីវភាពសមរម្យ និងមានការរស់នៅប្រកបដោយភាពសុខដុមរមនា ទាំងនៅក្នុងសង្គមជាតិ ទាំងនៅក្នុងក្រុមគ្រួសារ។
ក្នុងបុព្វហេតុដ៏ឧត្តុង្គឧត្តមនេះគណបក្សប្រជាជនកម្ពុជាបានដឹកនាំប្រទេសជាតិឆ្លងកាត់បណ្តាដំណាក់កាលដ៏លំបាកស្មុគស្មាញជាច្រើនដែលធ្វើឲ្យកម្ពុជាសម្រេចបាននូវការផ្លាស់ប្តូរមុខមាត់ថ្មីដ៏គួរជាទីមោទនៈបំផុត។
យើងពិនិត្យត្រឹមរយៈពេលជិត ៤០ ឆ្នាំកន្លងទៅនេះតើមានអ្វីដែលប្រែប្រួលនោះ ? យើងអាចប្រៀបធៀបបច្ចុប្បន្នទៅអតីតកាលរបស់កម្ពុជា ,កម្ពុជាដែលពីមុនល្បីថា ជាវាលពិឃាត,ជាតំបន់អសន្តិសុខ, ជាចម្ការមីនដែលគេភ័យខ្លាចគ្រប់គ្នាឥទ្បូវនេះបានក្លាយទៅជា«កោះសន្តិភាព»និងជាតំបន់ទេសចរណ៍ប្រកបដោយប្រជាប្រិយភាពនៅក្នុងតំបន់ឤស៊ីអាគ្នេយ៍ដែលទទួលបានភ្ញៀវទេសចររាប់លាននាក់ក្នុងមួយឆ្នាំ។ កម្ពុជាដែលពីមុនល្បីក្នុងការប្រើប្រាស់ឤវុធដើម្បីដណ្តើមអំណាចគ្នា និងក្នុងការផ្លាស់ប្តូររដ្ឋាភិបាលឥទ្បូវនេះបានក្លាយទៅជាប្រទេសមួយដែលគោរពយ៉ាងខ្ជាប់ខ្ជួននូវគោលការណ៍នៃលទ្ធិប្រជាធិបតេយ្យសេរីពហុបក្ស តាមរយៈការរៀបចំយ៉ាងទៀងទាត់នូវការបោះឆ្នោតដោយសេរី ត្រឹមត្រូវ និងយុត្តិធម៌ និងជារដ្ឋអធិបតេយ្យដែលមានឯករាជ្យ និងបូរណភាពទឹកដីពេញលេញ។ កម្ពុជាដែលពីមុនជាប្រទេសត្រូវទទួលរងការហ៊ុមព័ទ្ធនិងឯកោទាំងខាងនយោបាយ និងសេដ្ឋកិច្ចឥទ្បូវនេះបានក្លាយជាប្រទេសមួយដែលកំពុងសមាហរណកម្មខ្លួនយ៉ាងសកម្មទៅក្នុងរចនាសម្ព័ន្ធ និងនិម្មាបនកម្មតំបន់ និងពិភពលោកនិងជាប្រទេសដែលកំពុងតែដើរតួនាទីយ៉ាងសកម្មដោយស្មើសិទ្ធិ និងស្មើភាព ក្នុងគ្រប់កិច្ចការតំបន់ និងនៅលើឆាកអន្តរជាតិ។
កម្ពុជា ដែលពីមុនជាប្រទេសអន់ថយខាងផ្នែកសេដ្ឋកិច្ចគ្របដណ្តប់ទៅដោយភាពក្រីក្រ និងមានអសន្តិសុខ ស្បៀងឥទ្បូវនេះបានក្លាយជាប្រទេសនាំស្បៀងចេញហើយស្ថិតនៅក្នុងចំណោមប្រទេសឯកទគ្គៈលើពិភពលោកដែលសម្រេចបានកំណើនសេដ្ឋកិច្ចខ្ពស់ និងជាប្រទេសដែលសម្រេចបាននូវវឌ្ឍនភាពដ៏ល្អប្រសើរក្នុងការកាត់បន្ថយភាពក្រីក្រក៏ដូចជាការកែលម្អសូចនាករផ្នែកសង្គមកិច្ចហើយបានឆ្លងកាត់ដោយជោគជ័យពីចំណាត់ថ្នាក់នៃប្រទេសមានចំណូលទាប ក្លាយទៅជាប្រទេសមានចំណូលមធ្យមកម្រិតទាប កាលពីពេលថ្មីៗកន្លងទៅ។
សមិទ្ធផលដ៏ធំធេងច្រើនរាប់មិនអស់ដែលកម្ពុជាសម្រេចបានកន្លងមកក្រោមការដឹកនាំរបស់គណបក្សប្រជាជនកម្ពុជា។ ជាពិសេសក្នុងរយៈពេលជាង ២ ទសវត្សរ៍ចុងក្រោយនេះគឺជាសក្ខីភាពដ៏ប្រចក្សមិនឤចបដិសេធបានដែលបញ្ជាក់អំពីសមត្ថភាពដ៏ពិតប្រាកដរបស់គណបក្សប្រជាជនកម្ពុជាក្នុងការដឹកនាំការពារកសាង និងអភិវឌ្ឍជាតិនៃយើង។
នៅក្នុងនីតិកាលទី៦ សម្រាប់ការដឹកនាំរាជរដ្ឋាភិបាលគណបក្សប្រជាជនកម្ពុជាបានប្រកាសជូនជនរួមជាតិនិងសុំការគាំទ្រពីជនរួមជាតិលើ «កម្មវិធីនយោបាយសម្រាប់ការកសាងនិងការពារមាតុភូមិ ឆ្នាំ ២០១៨-២០២៣» ដែលជាត្រីវិស័យសម្រាប់តម្រង់ទិសសកម្មភាពរបស់គណបក្ស ក្នុងការបន្តបំពេញភារកិច្ចបម្រើជាតិនិងប្រជាជនរយៈពេល ៥ ឆ្នាំទៅមុខ ។ កម្មវិធីនយោបាយនេះបានកំណត់គោលដៅធំៗជាយុទ្ធសាស្ត្រ៖ គោរពនិងការពាររដ្ឋធម្មនុញ្ញនៃព្រះរាជាណាចក្រកម្ពុជាការពាររបបរាជានិយម និងរាល់សមិទ្ធផលរបស់ជាតិឲ្យបានគង់វង្សស្ថិតស្ថេរជានិរន្តរ៍លើកកម្ពស់លទ្ធិប្រជាធិបតេយ្យសេរីពហុបក្ស និងការគោរពសិទ្ធិមនុស្ស ។ការពារឯករាជ្យ អធិបតេយ្យ បូរណភាពទឹកដី និងសន្តិភាពយ៉ាងរឹងមាំ មិនឲ្យកម្លាំងណាមករំលោភ បំពាន និងបំផ្លាញបានឡើយប្រឆាំងដាច់ខាតការជ្រៀតជ្រែករបស់បរទេសចូលកិច្ចការផ្ទៃក្នុងរបស់កម្ពុជា។ កសាងព្រះរាជាណាចក្រកម្ពុជាជារដ្ឋដ៏រឹងមាំ និងជឿនលឿន ដោយផ្អែកលើច្បាប់ធានាការអនុវត្តច្បាប់ដោយស្មើភាពសម្រាប់ពលរដ្ឋគ្រប់រូប។ បន្តអភិវឌ្ឍសេដ្ឋកិច្ច-សង្គម ឲ្យកាន់តែរីកចម្រើនខ្លាំងក្លានិងកាន់តែមានមូលដ្ឋានរឹងមាំដែលធានាឲ្យប្រជាជនមានជីវភាពរស់នៅយ៉ាងសមរម្យ ថ្លៃថ្នូរ ដោយចាកផុតពីភាពក្រីក្រ,ពីគ្រោះអវិជ្ជា,ពីជំងឺតម្កាត់នានា,ពីការកេងប្រវ័ញ្ចនិងពីអំពើហិង្សាគ្រប់រូបភាព។
ពង្រឹងពង្រីកចំណងមិត្តភាព និងកិច្ចសហប្រតិបត្តិការល្អប្រសើរ រវាងព្រះរាជាណាចក្រកម្ពុជា ជាមួយគ្រប់ប្រទេស និងអង្គការអន្តរជាតិនានា។
ការបោះឆ្នោតជ្រើសតាំងតំណាងរាស្ត្រ នីតិកាលទី ៦ នាថ្ងៃទី ២៩ ខែ កក្កដា ឆ្នាំ ២០១៨ ខាងមុខនេះគឺពិតជាព្រឹត្តិការណ៍នយោបាយជាប្រវត្តិសាស្ត្រមួយដែលមានសារៈសំខាន់ជាទីបំផុតចំពោះជាតិ។ ការសម្រេចចិត្តខាងនយោបាយរបស់ប្រជាពលរដ្ឋនៅក្នុងការបោះឆ្នោតនេះដើម្បីជ្រើសរើសយកគណបក្សណាមួយឱ្យបន្តដឹកនាំប្រទេសគឺមានលក្ខណៈកំណត់ចំពោះជោគវាសនាអនាគតរបស់ជាតិនិងប្រជាជនផ្ទាល់ ។ការសម្រេចចិត្តត្រឹមត្រូវនឹងនាំមកនូវការរីកចម្រើនលូតលាស់វិបុលភាពនិងសេចក្តីសុខក្សេមក្សាន្តរបស់ប្រជាជាតិបន្តទៀត។ ផ្ទុយទៅវិញការសម្រេចចិត្តខុសនឹងធ្វើឲ្យប្រទេសជាតិជួបប្រឈមនឹងដំណើរថយក្រោយ ហើយប្រជាជនក៏ត្រូវប្រឈមឡើងវិញនឹងវិនាសកម្មគ្រោះមហន្តរាយនិងសោនាដកម្មដែលកម្ពុជាធ្លាប់ហែលឆ្លងកាត់យ៉ាងលំបាកលំបិនពីក្នុងអតីតកាលកន្លងទៅថ្មីៗ។
សង្ឃឹមថា ប្រជាជនកម្ពុជាដែលបានមើលឃើញជាក់ស្តែងរួចហើយនូវការរស់ឡើងវិញ ការរីកចម្រើននិងភាពរឹងមាំរបស់ប្រទេសជាតិនៅក្នុងសុខសន្តិភាព ស្ថិរភាព និងការអភិវឌ្ឍនាពេលបច្ចុប្បន្នក្រោមការដឹកនាំរបស់គណបក្សប្រជាជនកម្ពុជាពិតជាមានសុភវិនិច្ឆ័យគ្រប់គ្រាន់ក្នុងការជ្រើសគណបក្សនយោបាយ និងឥស្សរជននយោបាយ ដើម្បីបន្តដឹកនាំប្រទេសជាតិសម្រាប់នីតិកាលទី ៦ តាមរយៈការបោះឆ្នោត នាថ្ងៃទី ២៩ ខែ កក្កដា ខាងមុខនេះ៕
Source: Kampuchea Thmey Daily
0 Comments