ភ្នំពេញក្រោន ជាបេក្ខភាពមួយក្នុងចំណោមក្រុមខ្លាំងៗទាំង៨ដែលដណ្តើមកៅអីឡើងទៅវគ្គបន្តក្នុងពានរង្វាន់សម្ដេចអគ្គមហាសេនាបតីតេជោ ហ៊ុន សែន លើកទី១២ (Hun Sen Cup) វគ្គជម្រុះថ្នាក់ជាតិ ឆ្នាំ២០១៨ ក្រោមការរៀបចំពីសំណាក់គណៈកម្មការប្រកួតបាល់ទាត់ជាតិកម្ពុជា (CNCC) សេនាធិការរបស់សហព័ន្ធកីឡាបាល់ទាត់កម្ពុជា។
ក្រោយពីដឹកនាំក្រុមភ្នំពេញក្រោនឈ្នះទាំងពីរលើកទៅលើក្រុមអគ្គិសនីកម្ពុជាកាលពីពេលថ្មីៗ លោក Sean Sainbury ដែលជាគ្រូបង្វឹករបស់ក្រុមភ្នំពេញក្រោន បានលើកឡើងថា «ពួកយើងមានកីឡាករក្មេងៗច្រើន ពួកគេមានទេពកោសល្យល្អ ហើយខ្ញុំគិតថាលទ្ធផលនេះ គឺវាបង្ហាញពីអ្វីដែលក្លឹបបានធ្វើតាំងពីគ្រូបង្វឹកក្រុមយុវជនថ្នាល ហើយពួកគេបានធ្វើការងារបានយ៉ាងល្អ»។
គ្រូបង្វឹកជនជាតិអង់គ្លេសរូបនេះបានបន្ថែមថា «ចំពោះពានរង្វាន់សម្តេចហ៊ុន សែន ដែលតម្រូវឲ្យលេងតែកីឡាករខ្មែរសុទ្ធនោះគឺខ្ញុំយល់ថា កីឡាករខ្មែររបស់ក្រុមដទៃក៏មានគុណភាពដែរ តែយើងមានក្រុមមួយដែលល្អច្រើនជាងពួកគេទៅទៀត ដូចដែលអ្នកបានឃើញថា កីឡាករជម្រើសជាតិ អ៊ិន សូដាវីដ អង្គុយបម្រុង។ ដូច្នេះមានន័យថាយើងមានកីឡាករល្អៗច្រើនសម្រាប់ពានរង្វាន់មួយនេះ»។
ឆ្លងកាត់ការប្រកួតក្នុងពានរង្វាន់សម្តេចទាំងពីរលើកជាមួយក្រុមអគ្គិសនីកម្ពុជា ប្រចាំវគ្គ១៦ក្រុមក្រុមភ្នំពេញក្រោន ដណ្តើមបានជ័យជម្នះទាំង២លើក ក្នុងនោះប្រកួតជើងទី១ ភ្នំពេញក្រោនបានយកឈ្នះក្រុមអគ្គិសនីកម្ពុជា ក្នុងលទ្ធផល ២-១ នៅកីឡដ្ឋានអគ្គិសនី ហើយជើងទីពីរវិញក្រុមភ្នំពេញក្រោន បានយកឈ្នះក្រុមអគ្គិសនីក្នុងលទ្ធផល ៤-០ នៅដីរបស់ខ្លួនផ្ទាល់តែម្តង។
គណៈកម្មការប្រកួតបាល់ទាត់ជាតិកម្ពុជា (CNCC) បានជូនដំណឹងគូប្រកួតក្នុងវគ្គ៨ក្រុមចុងក្រោយនឹងចាប់ឆ្នោតនៅបែងចែកគូនៅថ្ងៃច័ន្ទ សប្ដាហ៍ក្រោយ ខណៈពេលនេះបានរកឃើញក្រុមខ្លាំងចំនួន៧មុនគេឡើងទៅវគ្គបន្តដោយក្នុងនោះមានក្រុមព្រះខ័នរាជស្វាយរៀង បឹងកេត ភ្នំពេញក្រោន អគ្គស្នងការដ្ឋាននគរបាលជាតិ ក្រសួងការពារជាតិ អង្គរថាយហ្គឺរនិងណាហ្គាវើល។ ចំណែក១ក្រុមទៀតកំពុងរង់ចាំអ៊ុតលទ្ធផលគូដែលនៅសល់ រវាងកោះកុង ជាមួយក្រុមយុវជនសាលាបាល់ទាត់ជាតិបាទី៕
Source: Kampuchea Thmey Daily
0 Comments