ក្រុមបាល់ទាត់អាស៊ីអឺរ៉ុប ប៉ះវិសាខា ហើយក្រុមអង្គរថាយហ្គឺរទទួលព្រះខ័នរាជស្វាយរៀង និងក្រុមបឹងកេតជួបក្រុមសូលទីឡូអង្គរ នៅល្ងាចថ្ងៃសៅរ៍ ទី២១ ខែកក្កដា ឆ្នាំ២០១៨ នេះ ប្រចាំសប្ដាហ៍ទី១៥ នៃពានរង្វាន់លីគកំពូលកម្ពុជារដូវកាលឆ្នាំ២០១៨ Metfone Cambodian League 2018។
*អាស៊ីអឺរ៉ុបប៉ះវិសាខា
ក្រុមបាល់ទាត់អាស៊ីអឺរ៉ុប ត្រូវបើកទ្វាកីឡដ្ឋាន AEU Sport Park របស់ខ្លួនម្តុំអរិយក្សត្រទទួលក្រុមវិសាខា នៅវេលាម៉ោង៣ល្ងាច ហើយប្រកួតនេះមានផ្សាយផ្ទាល់នៅលើទំព័រហ្វេសប៊ុករបស់គណៈកម្មការប្រកួតបាល់ទាត់ជាតិកម្ពុជា (CNCC) ផងដែរ។ ក្រុមអាស៊ីអឺរ៉ុប កំពុងដឹកនាំដោយលោក សុក វាសនា ពេលនេះកំពុងឈរចំណាត់ថ្នាក់លេខ៨បណ្តោះអាសន្នក្នុងតារាងរួមដែលមានក្រុមចំនួន១២ ក្រោយប្រកួតបាន១៤លើក ឈ្នះបាន៥លើក ស្មើគ្នា៣លើក និងចាញ់៦លើក មាន១៨ពិន្ទុក្នុងដៃ។ ខ្សែប្រយុទ្ធកាម៉េរូន Befolo Mbarga Privat ជាកីឡាករឆ្នើមម្នាក់ក្នុងក្រុមក្រោយរកគ្រាប់បាន១៧គ្រាប់ម្នាក់ឯងកន្លងមកនេះ។
ចំណែកក្រុមវិសាខា វិញកំពុងតែត្រូវការពិន្ទុជាខ្លាំង ដើម្បីប្រជែងនៅតំបន់កំពូលតារាងក្រោយប្រកួតបាន១៤លើកឈ្នះបាន១០លើក ស្មើគ្នាបាន២លើកនិងចាញ់២លើកមាន៣២ពិន្ទុ និងកំពុងតែឈរចំណាត់ថ្នាក់លេខ៣បណ្តោះអាសន្នក្នុងចំណោមក្លិបទាំង១២។ លោក ហុក សុជីវ័ន្ត គ្រូបង្វឹករបស់វិសាខា បានរំពឹងថា កូនក្រុមអាចបន្តជ័យជម្នះថែមទៀតដើម្បីដណ្តើមកៅអីកំពូលតារាង។
*អង្គរថាយហ្គឺរ ប៉ះព្រះខ័នរាជស្វាយរៀង
ក្រុមបាល់ទាត់អង្គរថាយហ្គឺរ ត្រូវប៉ះក្រុមព្រះខ័នរាជស្វាយរៀង នៅវេលាម៉ោង៣និង៣០នាទីល្ងាចលើទីលានកីឡដ្ឋានខេត្តសៀមរាប។ ប្រកួតនេះមានផ្សាយផ្ទាល់នៅលើប៉ុស្តិ៍ទូរទស្សន៍ BTV News ផងដែរ។ ក្រុមអង្គរថាយហ្គឺរ ឆ្លងកាត់ប្រកួត១៤លើកមកនេះឈ្នះបាន៣ លើកស្មើគ្នាបាន៣លើក និងចាញ់៨លើកមាន១២ពិន្ទុ។ ក្រុមនេះកំពុងតែដឹកនាំដោយលោក Oriol Mahedano ដែលជាគ្រូបង្វឹកសញ្ជាតិអេស្ប៉ាញ កាន់អាជ្ញាប័ណ្ណគ្រូបង្វឹកកម្រិត UEFA A licence ដែលមានសមាជិក២៥នាក់។ លោក Akihiro Kato ដែលជាប្រធានក្លិបបានដាក់គោលដៅយកកៅអីនៅតំបន់ក្រុមខ្លាំងទាំង៤ប្រចាំរដូវកាល (Top4) នៅឆ្នាំនេះ ខណៈនៅឆ្នាំ២០២០ ក្លិបចង់ប្រជែងយកជើងឯក។
សម្រាប់ក្រុមព្រះខ័នរាជស្វាយរៀង វិញមួយរយៈចុងក្រោយនេះហាក់ជួបបញ្ហារឿងកីឡាកររបួសនិងកីឡាករសំខាន់ៗជាប់ពិន័យពីសំណាក់គណៈកម្មការវិន័យរបស់សហព័ន្ធកីឡាបាល់ទាត់កម្ពុជា។ លោក Conor Nestor គ្រូបង្គោលក្លិបព្រះខ័នរាជស្វាយរៀង សរសើរកូនក្រុមក្នុងប្រកួតចុងក្រោយដែលធ្វើបានល្អ។ យ៉ាងណាលោកបានដោះដូរកីឡាករគួរឲ្យភ្ញាក់ផ្អើលមួយដើម្បីត្រៀមជើងទី២នេះ។ ក្រុមព្រះខ័នរាជស្វាយរៀង កំពុងតែឈរចំណាត់ថ្នាក់លេខ៦បណ្តោះអាសន្នក្នុងចំណោមក្លិបទាំង១២ បន្ទាប់ពីឈ្នះបាន៦លើកស្មើគ្នា២លើកនិងចាញ់៦លើក។
*បឹងកេត ប៉ះសូលទីឡូអង្គរក្រុមបឹងកេត ត្រូវបើកទ្វាពហុកីឡដ្ឋានជាតិក្នុងរាជធានីភ្នំពេញ ទទួលក្រុមសូលទីឡូអង្គរ នៅវេលាម៉ោង៦ល្ងាច ខណៈសារព័ត៌មានកម្ពុជាថ្មី នឹងផ្សាយផ្ទាល់តាមទំព័រហ្វេសប៊ុកពីប្រកួតនេះផងដែរ។ ក្រុមបឹងកេត កំពុងតែឈរកំពូលតារាង ក្រោយឆ្លងកាត់១៤ប្រកួត ឈ្នះរហូតដល់១១ប្រកួត និងស្មើគ្នា៣ប្រកួតមាន៣៣ពិន្ទុ។ លោក ហៅ សុជាតិ ដែលជាគ្រូបង្វឹកកំពុងតែឈឺក្បាលរឿងកីឡាករសំខាន់មួយចំនួនដែលចាកចេញ ប៉ុន្តែលោកបាននាំយកកីឡាករសំខាន់ៗមកប៉ះប៉ូវវិញដើម្បីរក្សាកៅអីកំពូលតារាង។ មិនតែប៉ុណ្ណោះលោកបានសម្លឹងឃើញក្រុមណាហ្គាវើល ជាគូប្រជែងមិនអាចមើលរំលងបានក្នុងការដណ្តើមជើងឯកនៅឆ្នាំនេះ។
ងាកមកមើលក្រុមសូលទីឡូអង្គរ ក្រោមការដឹកនាំរបស់គ្រូបង្វឹកជនជាតិជប៉ុន Yuki Matsuda កំពុងតែត្រូវការពិន្ទុគេចឲ្យផុតពីតំបន់គ្រោះថ្នាក់។ គ្រូបង្វឹករូបនេះទើបតែបញ្ចប់វគ្គសិក្សាគ្រូបង្វឹកបាល់ទាត់កម្រិត AFC A License នៅប្រទេសសិង្ហបុរី កាលពីដើមឆ្នាំ។ ១៤ប្រកួតកន្លងមកក្រុមសូលទីឡូអង្គរ ឈ្នះបាន៤លើក ស្មើគ្នា២លើកនិងចាញ់ដល់ទៅ៨លើក។
ចំណែកប្រកួតផ្សេងទៀតប្រចាំសប្ដាហ៍ទី១៥ នេះនឹងបន្តឡើងនៅថ្ងៃអាទិត្យ ទី២២ ខែកក្កដា ដោយក្រុមវេស្ទើនភ្នំពេញ ជួបក្រុមក្រសួងការពារជាតិ នៅម៉ោង៣រសៀលលើទីលានកីឡដ្ឋានវេស្ទើន មានផ្សាយផ្ទាល់លើទំព័រហ្វេសប៊ុករបស់ CNCC និងក្រុមអគ្គស្នងការដ្ឋាននគរបាលជាតិ ប៉ះក្រុមអគ្គីសនីកម្ពុជា នៅម៉ោង៦ល្ងាចលើទីលានពហុកីឡដ្ឋានជាតិ មានផ្សាយផ្ទាល់តាមទំព័រហ្វេសប៊ុករបស់កម្ពុជា៕
Source: Kampuchea Thmey Daily
0 Comments