ភ្នំពេញ ៖ រដ្ឋលេខាធិការទីស្ដីការគណៈរដ្ឋមន្ត្រី លោក ផៃ ស៊ីផាន បានថ្លែងថា ការប្រកាសរបស់ទូតអាមេរិក ឲ្យពលរដ្ឋរបស់ខ្លួន ដែលស្ថិតនៅក្នុងប្រទេសកម្ពុជា មានការប្រុងប្រយ័ត្ននោះ វាជារឿងធម្មតាទៅហើយ ដោយសារសង្គមអាមេរិក តែងតែប្រឈម នឹងអំពើហិង្សា សម្លាប់មនុស្ស គ្រប់រូបភាព ជាញឹកញាប់។
លោក ផៃ ស៊ីផាន លើកឡើងបែបនេះ កាលពីព្រឹកថ្ងៃទី២៥ ខែកក្កដា ឆ្នាំ២០១៨ គឺក្រោយពីស្ថានទូតអាមេរិកប្រចាំកម្ពុជា ដោយបានណែនាំឲ្យពលរដ្ឋខ្លួន មានការប្រុងប្រយ័ត្ន និងជៀសវាងកន្លែងមានមនុស្សច្រើននៅអំឡុងថ្ងៃបោះឆ្នោត ព្រោះអាចមានការជួបប្រមូលផ្តុំផ្នែកនយោបាយ ការប្រឆាំងតវ៉ា ឬការចល័តកម្លាំងសន្តិសុខ។
លោក ផៃ ស៊ីផាន បានបញ្ជាក់យ៉ាងនេះថា “ការលើកឡើងរបស់ស្ថានទូតអាមេរិកប្រចាំព្រះរាជាណាចក្រកម្ពុជា ដែលធ្វើការណែនាំព្រមានដល់ប្រជាពលរដ្ឋអាមេរិកាំង ដែលស្ថិតនៅក្នុងព្រះរាជាណាចក្រកម្ពុជា ឲ្យធ្វើការប្រុងប្រយ័ត្នក្នុងស្ថានភាពខ្ពស់ និងជៀសវាងវត្តមាននៅក្បែរ ទីប្រជុំដែលមានវ៉ូងមនុស្សច្រើន ក្នុងកិច្ចថែរក្សាសុវត្ថិភាព របស់ប្រជាពលរដ្ឋអាមេរិកាំងនោះ គឺជាវិធានធម្មតានៃរដ្ឋាភិបាលសហរដ្ឋអាមេរិក គឺអាស្រ័យដោយសង្គមអាមេរិកាំងតែងតែប្រឈម និងភាពហិង្សា សម្លាប់មនុស្ស រាល់រូបភាពជាប្រចាំ ដែលធ្វើឲ្យរដ្ឋាភិបាលអាមេរិកាំងមានការប្រុងប្រយ័ត្នកម្រិតខ្ពស់ ក្នុងកិច្ចការពារប្រជាពលរដ្ឋរបស់គេ ពីភាពឃោរឃៅទាំងនោះ”។
តាមលោក ផៃ ស៊ីផាន ការប្រកាសព័ត៌មាននៃការណែនាំអោយប្រុងប្រយ័ត្នខ្ពស់របស់សហរដ្ឋអាមេរិក គ្រាន់តែកិច្ចការពារជាមុនប៉ុណ្ណោះ ពុំមែនឆ្លើយតបនឹងភាពជាក់ស្តែងនោះឡើយហើយជាឧទាហរណ៍ជាក់ស្តែង ក្នុងពិធីប្រកួតកីឡាអន្តរជាតិអូឡាំពិក នាប្រទេសរុស្ស៉ី ជាដើម ក៏អាមេរិក ប្រកាសបែបនេះដែរ។ លោកយល់ឃើញថា ការប្រកាសព័ត៌មានរបស់ស្ថានទូតអាមេរិកនេះ ពុំមានឥទ្ធិពល ឬឧបសគ្គណាមួយប្រឆាំង ឬបំផ្លាញដំណើរការបោះឆ្នោតសកល របស់កម្ពុជាឡើយ ហើយការបោះឆ្នោតសកលនេះ ជាការសម្រេចចិត្តខ្ពស់របស់ប្រជាពលរដ្ឋខ្មែរ ក្នុងកិច្ចថែរក្សា ដំណើរការលទ្ធិប្រជាធិបតេយ្យសេរីពហុបក្ស និងការទទួលខុសត្រូវជោគវាសនាដោយខ្លួនឯង ដែលគ្មានបរទេសណាជ្រៀតជ្រែកបានឡើយ។
ទាក់ទងបញ្ហានេះ អ្នកនាំពាក្យក្រសួងមហាផ្ទៃ នាយឧត្តមសេនីយ៍ ខៀវ សុភ័គ បានអះអាងប្រាប់អ្នកសារព័ត៌មានដែរ នៅថ្ងៃទី២៥ ខែកក្កដា ឆ្នាំ២០១៨ ដែរថា ការអំពាវនាវរបស់ស្ថានទូតអាមេរិក ជាការរអៀសខ្លួន ដោយខ្លួនឯង ប៉ុន្តែជាក់ស្តែងមិនមានបញ្ហាអ្វីកើតឡើងទេ។ នាយឧត្តមសេនីយ៍បញ្ជាក់ថា យើងដឹងហើយថា អាមេរិកធ្វើឲ្យមនុស្សមួយចំនួនមិនសូវស្រលាញ់ ដូច្នេះការអំពាវនាវឲ្យពលរដ្ឋខ្លួនប្រុងប្រយ័ត្នវាជារឿងធម្មតាទេ សម្រាប់ពលរដ្ឋអាមេរិក ព្រោះគាត់បានសាងអំពើបាបជាច្រើន នៅបណ្តាប្រទេសមួយចំនួន ដូចជានៅអ៊ីរ៉ាក់ នៅស៊ីរីជាដើម ប៉ុន្តែចំពោះកម្ពុជា គ្មានបញ្ហាអ្វីកើតឡើងទេ ពីព្រោះការងារសន្តិសុខ សមត្ថកិច្ចទាំងអស់មិនប្រហែសនោះទេ។ សមត្ថកិច្ចកម្ពុជា និងប្រជាជនកម្ពុជា នៅតែការពារពលរដ្ឋអាមេរិកជានិច្ច។
ទាក់ទងការងារសន្តិសុខ សម្រាប់ការបោះឆ្នោតនេះដែរ នាយឧត្តមសេនីយ៍ គៀត ច័ន្ទថារិទ្ធ អគ្គស្នងការរងនគរបាលជាតិ ធ្លាប់បានអះអាងថា រាជរដ្ឋាភិបាលកម្ពុជា បានត្រៀមកម្លាំងសមត្ថកិច្ចចម្រុះ ប្រមាណ១០ម៉ឺននាក់ ដើម្បីការពារសន្ដិសុខ សណ្ដាប់ធ្នាប់សាធារណៈ សម្រាប់ការបោះឆ្នោតជ្រើសតាំង តំណាងរាស្ដ្រ នីតិកាលទី៦ ខាងមុខនេះ ក្នុងនោះ មានទាំងកម្លាំងនគរបាលជាតិ កម្លាំងកងយោធពលខេមរភូមិន្ទ និងកម្លាំងកងរាជអាវុធហត្ថ រួមទាំងមានកម្លាំងប្រជាការពារផងដែរ៕
Source: Kampuchea Thmey Daily
0 Comments