ក្លិបបាល់ទាត់វិសាខា សមាជិកពានរង្វាន់លីគកំពូលកមញបូជា (Metfone Cambodian League 2018) បានប្រកាសថា សហការជាមួយនឹងសហភាពសហព័ន្ធយុវជនកម្ពុជាខេត្តព្រៃវែង (ស.ស.យ.ក) នឹងរៀបចំកម្មវិធីសប្បុរសធម៌ស្ដីពីកីឡាបាល់ទាត់ ធ្វើឡើងនៅទីលានបាល់ទាត់ ភូមិលេខ៦ សង្កាត់កំពង់លាវ ក្រុងព្រៃវែង ខេត្តព្រៃវែង នាថ្ងៃព្រហស្បតិ៍ ទី២៦ ខែកក្កដា ឆ្នាំ២០១៨ សប្ដាហ៍នេះ។
យោងតាមប្រភពព័ត៌មានរបស់ក្លិបម្ចាស់ជើងឯកពានរង្វាន់លីគលំដាប់ទី២កម្ពុជារដូវកាលឆ្នាំ២០១៧ មួយនេះបានលើកឡើងថា សិស្សានុសិស្ស និង កុមារកំព្រាដែលចូលរួមនឹងទទួលបានការបង្ហាត់បង្ហាញ ចែករំលែកបទពិសោធន៍បាល់ទាត់ពីសំណាក់ក្រុមកីឡាករក្លិប ក្រោមអធិបតីភាពឯកឧត្តម ស សុខា ប្រធានក្លិបវិសាខានិងជាប្រធានសហភាពសហព័ន្ធយុវជនកម្ពុជា ខេត្តព្រៃវែង។ ក្រៅពីនេះយុវជនទាំងអស់នឹងបានលេងល្បែងកម្សាន្ដ និង ទទួលបានសម្ភារៈកីឡាពីឯកឧត្តម ស សុខា ទៀតផង។
នេះជាលើកទី២ហើយ ដែលក្រុមដឹកនាំដោយលោក ហុក សុជីវ័ន ជាគ្រូបង្គោល បានធ្វើដំណើរទៅកាន់ខេត្តព្រៃវែង ខណៈកាលពីលើកដំបូងធ្វើឡើងនៅមុនពិធីបុណ្យចូលឆ្នាំខ្មែរ មានរៀបចំជាការចែករំលែកបទពិសោធន៍បាល់ទាត់អំឡុងពេលសង្ក្រានព្រៃវែង តែពុំមានការចែកសម្ភារៈទេ តែពេលនេះបន្ថែមកម្មវិធីពិសេសច្រើនជាងមុន។
ក្រុមវិសាខា បានបង្កើតឡើងពីថ្ងៃទី៥ ខែកុម្ភៈ ឆ្នាំ២០១៧ ក្រោមការឧបត្ថម្ភគាំទ្រពីសំណាក់ឯកឧត្ដម ស សុខា ។ បច្ចុប្បន្នក្លឹបមានកីឡាករជិត៣០នាក់ ដែលមានលោក ហុក សុចិត្រា អតីតគ្រូបង្វឹកក្រុមជម្រើសជាតិកម្ពុជា ដើរតួធ្វើជាអ្នកចាត់ការទូទៅរបស់ក្រុម ខណៈលោក ហុក សុជីវ័ន ជាប្អូនប្រុសបង្កើតធ្វើជាគ្រូបង្វឹក។ ក្រុមវិសាខា បានកសាងកីឡដ្ឋានថ្មីផ្ទាល់ខ្លួន មានទីតាំងនៅតាមផ្លូវលេខ៥៩៨ ខាងឆ្វេងដៃខ្លោងទ្វារ Grand Phnom Penh។ កីឡដ្ឋាននេះអាចផ្ទុកទស្សនិកជនប្រមាណជាង៥០០០នាក់ ដែលមានទីលានជាស្មៅធម្មជាតិ។
ក្រុមនេះជាបេក្ខភាពមួយមិនអាចមើលរំលងបានក្នុងការប្រជែងយកជើងឯកនៅឆ្នាំចាស់នេះ ខណៈឆ្លងកាត់១៤ប្រកួតមកនេះក្នុងពានរង្វាន់លីគកំពូលកម្ពុជា វិសាខា ឈរលេខ២ក្នុងតារាងរួមដែលមាន១២ក្រុមក្រោយប្រកួតឈ្នះ១១ លើកស្មើគ្នា២លើក និងចាញ់៣លើក មាន៣៥ពិន្ទុក្នុងដៃ។ សម្រាប់ប្រកួតបន្ទាប់ក្រុមវិសាខា ត្រូវប៉ះក្រុមវេស្ទើនភ្នំពេញ នៅម៉ោង៦ល្ងាចលើទីលានកីឡដ្ឋានស្តាតចាស់នៅថ្ងៃសៅរ៍ ទី៤ ខែសីហា ឆ្នាំ២០១៨ ខាងមុខ៕
Source: Kampuchea Thmey Daily
0 Comments