ភ្នំពេញ ៖ ក្រសួងកសិកម្មរុក្ខាប្រមាញ់និងនេសាទ បានបញ្ជូនក្រុមការងារចុះស្រាវជ្រាវពីផលប៉ះពាល់លើវិស័យកសិកម្មនៅតាមបណ្តារាជធានីខេត្ត ដែលរងគ្រោះដោយទឹកជំនន់ដើម្បីរៀបចំផែនការជួយដោះស្រាយនិងសង្គ្រោះដល់ប្រជាពលរដ្ឋឲ្យបានទាន់ពេលវេលា។
លោកហ៊ាន វណ្ណហន អគ្គនាយកនៃអគ្គនាយកដ្ឋានកសិកម្មនៃក្រសួងកសិកម្ម រុក្ខាប្រមាញ់និងនេសាទបានមានប្រសាសន៍ កាលពីថ្ងៃទី២៤ ខែកក្កដា ឆ្នាំ២០១៨ឲ្យដឹងថា ក្រសួងកសិកម្មបានបញ្ជូនក្រុមការងារចំនួន៣ក្រុម ចុះទៅស្រាវជ្រាវពីផលប៉ះពាល់ដោយសារគ្រោះទឹកជំនន់នៅខេត្តកោះកុង បន្ទាយមានជ័យនិងខេត្តកំពង់ស្ពឺដើម្បីវាយតម្លៃនិងធ្វើរបាយការណ៍មកក្រសួងដោះស្រាយ។
លោក ហ៊ាន វណ្ណហន បានបន្តថា ក្រុមការងារនេះនឹងចុះវាយតម្លៃ និង ពិនិត្យផ្ទាល់ពីផលប៉ះពាល់ជាក់ស្តែង ទៅលើទំហំការខូចខាតដូចជាស្រូវនិងផលដំណាំផ្សេងៗ ក៏ដូចជាណែនាំឲ្យប្រជាពលរដ្ឋដែលរងការខូចខាតទាំងស្រុង ត្រូវត្រៀមលក្ខណៈឲ្យរួចរាល់ ដើម្បីធ្វើការដាំដុះស្រូវនិងដំណាំរួមផ្សំឡើងវិញជាបន្តទៀតនៅពេលទឹកស្រកទៅវិញ។
តែយ៉ាងណាក៏ដោយ លោកអគ្គនាយកនៃអគ្គនាយកដ្ឋានកសិកម្មបានបន្ថែមទៀតថា ការផ្តល់ពូជស្រូវ ឬ ដំណាំរួមផ្សំផ្សេងៗទៀត គឺអាស្រ័យទៅលើស្ថានភាពទីតាំងដីស្រែនីមួយៗជាមុនសិនព្រោះថា ជាទូទៅស្រូវរងការលិចលង់ពេលមានទឹកជំនន់អាចមានការខូចខាត១០ ០ភាគរយស្រូវខ្លះគ្រាន់តែការលូតលាស់មិនបានល្អនិងស្រូវខ្លះទៀតលូតលាស់បានល្អទៅវិញពេលមានជំនន់។
លោកហ៊ាន វណ្ណហន បានបញ្ជាក់ថា សម្រាប់ឆ្នាំ២០១៨នេះក្រសួងកសិកម្មរុក្ខាប្រមាញ់និងនេសាទបានត្រៀមពូជស្រូវ២ពាន់តោន ពូជបន្លែ៣០តោននិងអង្ករ៥ពាន់តោនដើម្បីជួយសង្គ្រោះដល់ប្រជាកសិករនៅពេលមានគ្រោះធម្មជាតិដូចជាគ្រោះ រាំងស្ងួត ឬគ្រោះទឹកជំនន់ជាដើម។
ចំណែកលោក ឃុន សុខា ប្រធាននាយកដ្ឋានត្រៀមបង្ការនិងបណ្តុះបណ្តាលនៃគណៈកម្មាធិការជាតិគ្រប់គ្រង គ្រោះមហន្តរាយបានឲ្យដឹងថា គ្រោះទឹកជំនន់នៅតាមបណ្តាខេត្តមួយចំនួនក្នុងរយៈពេលប៉ុន្មានថ្ងៃនេះនៅមានទំហំតូចនៅឡើយ ហើយមិនមានផលប៉ះអ្វីធ្ងន់ធ្ងរនោះដែរ។
លោកកែវ វី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយបានឲ្យដឹងថា ក្នុងរយៈពេល៨ថ្ងៃ គឺចាប់ពីថ្ងៃទី១៧ រហូតដល់ថ្ងៃទី២៣ ខែកក្កដា កន្លងទៅនេះជំនន់ទឹកភ្លៀងបានប៉ះពាល់ដល់ប្រជាពលរដ្ឋជាង៧ពាន់គ្រួសារ នៅតាមបណ្តាខេត្តមួយចំនួនដូចជារាជធានីភ្នំពេញ កំពត កោះកុង ព្រះសីហនុ កែប និងបាត់ដំបងនិងលិចលង់ដំណាំស្រែចម្ការចំនួន៩២១៤ហិកតាក្នុងនោះខូចខាតមាន៩៦ហិកតា។
ជាមួយគ្នានេះដែរ ជំនន់ទឹកភ្លៀងនេះបានជម្លៀសប្រជាពលរដ្ឋទៅទីទួលមានសុវត្ថិភាពចំនួន១៤១៦គ្រួសារ ផ្ទះរងការខូចខាត៦ខ្នង សាលារៀន១០កន្លែង វត្តអារាម១០ វិហារចាម៦ បាត់គោ១៤ក្បាល លិចស្ពាន៩ ដោយក្នុងនោះ ខូចខាតស្ពានឈើ២ និងស្រះចិញ្ចឹមត្រី៧។
អ្នកនាំពាក្យគណៈកម្មការជាតិគ្រប់គ្រងគ្រោះមហន្តរាយដដែលបានបន្ថែមថា ជំនន់ទឹកភ្លៀងនេះ មិនបណ្តាលឲ្យបាត់បង់ជីវិតមនុស្សណាម្នាក់នៅឡើយទេ៕
Source: Kampuchea Thmey Daily
0 Comments