ភ្នំពេញ ៖ រដ្ឋសភាបានឆ្លើយតបសំណើរបស់ប្រធានគណបក្សសម្ព័ន្ធដើម្បីប្រជាធិបតេយ្យ (LDP) លោក ខឹម វាសនា ហើយ កាលពីថ្ងៃទី២៥ ខែកក្កដា ឆ្នាំ២០១៨ ទាក់ទងគំនូសសញ្ញាគាំទ្រគណបក្សនយោបាយនៅលើសន្លឹកឆ្នោត ដោយបានបញ្ជាក់ថា រដ្ឋសភាបញ្ចប់នីតិកាលរបស់ខ្លួនហើយ ពុំអាចចាត់ចែងការងារដទៃបានឡើយ ជាពិសេសការងារទាក់ទង គ.ជ.ប នេះបើតាមលិខិតរបស់លោក ឡេង ប៉េងឡុង។
លោក ឡេង ប៉េងឡុង បានបញ្ជាក់បែបនេះ បន្ទាប់ពីប្រធានគណបក្សសម្ព័ន្ធដើម្បីប្រជាធិបតេយ្យ (LDP) លោក ខឹម វាសនា បានស្នើទៅកាន់សម្តេចអគ្គមហាពញាចក្រី ហេង សំរិន ប្រធានរដ្ឋសភា ឲ្យមានចំណាត់ការទៅលើការងាររបស់គណៈកម្មាធិការជាតិរៀបចំការបោះឆ្នោត ដោយចង់ឲ្យមានការគូសសញ្ញាធីក (✔) តែមួយនៅលើសន្លឹកឆ្នោត។
លិខិតរបស់លោក ឡេង ប៉េងឡុង អគ្គលេខាធិការ នៃអគ្គលេខាធិការដ្ឋានរដ្ឋសភា ចុះថ្ងៃទី២៥ ខែកក្កដា ឆ្នាំ២០១៨ បានបញ្ជាក់ថា រដ្ឋសភាបានបិទបញ្ចប់សម័យប្រជុំរបស់ខ្លួន តាំងពីថ្ងៃទី០៩ ខែកក្កដា ឆ្នាំ២០១៨មកម្ល៉េះ។ បច្ចុប្បន្នរដ្ឋសភាមានសិទ្ធិត្រឹមតែអនុវត្តការងារប្រចាំថ្ងៃប៉ុណ្ណោះ ពុំអាចចាត់ចែងការងារដទៃបានឡើយ ជាពិសេសការងារពាក់ព័ន្ធនឹងស្ថាប័នដទៃ ដូចជាគណៈកម្មាធិការជាតិរៀបចំការបោះឆ្នោតជាដើម។
លោក ឡេង ប៉េងឡុង បានគូសបញ្ជាក់ក្នុងលិខិតផ្ញើជូនលោក ខឹម វាសនា ថា អនុលោមតាមមាត្រា ១៥០ថ្មី (ពីរ) នៃរដ្ឋធម្មនុញ្ញ កថាខណ្ឌទី២ ចែងថា គណៈកម្មាធិការជាតិរៀបចំការបោះឆ្នោត ត្រូវអនុវត្តសមត្ថកិច្ចរបស់ខ្លួនប្រកបដោយឯករាជ្យ និងអព្យាក្រឹត ដើម្បីធានាឲ្យការបោះឆ្នោតប្រព្រឹត្តទៅដោយសេរី ត្រឹមត្រូវ និងយុត្តិធម៌ ស្របតាមគោលការណ៍នៃលទ្ធិប្រជាធិបតេយ្យ សេរីពហុបក្ស និងមាត្រា១៣ នៃច្បាប់ស្តីពីការរៀបចំ និងការប្រព្រឹត្តទៅនៃគណៈកម្មាធិការជាតិរៀបចំការបោះឆ្នោតកថាខណ្ឌទី១ ចែងថា ប្រធាន អនុប្រធាន និងសមាជិកគណៈកម្មាធិការជាតិរៀបចំការបោះឆ្នោត ត្រូវអនុវត្តតួនាទីរបស់ខ្លួន ដោយមិនលម្អៀង ដោយឈរលើគោលការណ៍គោរពច្បាប់ ដោយមិនទទួលការគាបសង្កាត់ ការគំរាមកំហែង ការបំភិតបំភ័យ ឬ ការបង្គាប់បញ្ជាដោយផ្ទាល់ ឬដោយប្រយោលពីបុគ្គល ឬ ស្ថាប័នណាមួយឡើយ។ យោងតាមមាត្រាទាំងពីរខាងលើនេះ លោក ឡេង ប៉េងឡុង បានបញ្ជាក់ថា រដ្ឋសភាពុំមានសមត្ថកិច្ចជ្រៀតជ្រែក ឬ បង្គាប់បញ្ជាកិច្ចការរបស់គណៈកម្មាធិការជាតិរៀបចំការបោះឆ្នោត ដែលជាស្ថាប័នឯករាជ្យបានឡើយ។
សូមបញ្ជាក់ថា ថ្មីៗនេះ ប្រធានគណបក្សសម្ព័ន្ធដើម្បីប្រជាធិបតេយ្យ (LDP) លោក ខឹម វាសនា បានដាក់លិខិតទៅរដ្ឋសភា ដើម្បីស្នើសុំឲ្យរដ្ឋសភាពិនិត្យ និងកែសម្រួលការសម្រេចរបស់គណៈកម្មាធិការជាតិរៀបចំការបោះឆ្នោតស្តីពីការគូសសញ្ញាគាំទ្រគណបក្សនយោបាយនៅលើសន្លឹកឆ្នោត ហើយនៅក្នុងសន្និសីទសារព័ត៌មានមួយ កាលពីថ្ងៃទី១៩ ខែកក្កដា ឆ្នាំ២០១៨ លោក ខឹម វាសនា បានលើកឡើងថា សម្រាប់គណបក្សសម្ព័ន្ធដើម្បីប្រជាធិបតេយ្យ ជាជំហរ គឺយើងចង់ឲ្យយកសញ្ញាធីក (✔) ឬសញ្ញាប្រហាក់ប្រហែល តែយ៉ាងណាត្រូវគូសនៅលើប្រអប់បួនជ្រុងទ្រវែងតូច ហើយបើសញ្ញាអីក៏យក នៅកន្លែងណាក៏យក វាអាចបញ្ជាក់ពីអត្តសញ្ញាណរបស់អ្នកបោះឆ្នោត បាត់គោលការណ៍សម្ងាត់នៃការបោះឆ្នោត ដូច្នេះវាប៉ះពាល់ដល់លទ្ធផលនៃការបោះឆ្នោត។
ទាក់ទងបញ្ហានេះ កាលពីថ្ងៃទី១៥ ខែកក្កដា ឆ្នាំ២០១៨ អគ្គលេខាធិការគណៈកម្មាធិការជាតិរៀបចំការបោះឆ្នោត (គ.ជ.ប) លោក ទេព នីថា បានចេញលិខិតមួយប្រកាសច្រានចោលការស្នើសុំរបស់គណបក្សសម្ព័ន្ធដើម្បីប្រជាធិបតេយ្យ ដោយសំអាងហេតុថា ទី១, ការតម្រូវឲ្យអ្នកបោះឆ្នោតគូសសញ្ញាធីក (✔) តែមួយគត់ ដើម្បីគាំទ្រគណបក្សនយោបាយនៅលើសន្លឹកឆ្នោត គឺមិនឆ្លុះបញ្ចាំងអំពីបទបញ្ញត្តិ ក្នុងកថាខណ្ឌទី២ នៃមាត្រា១០៥ និងមាត្រា១២០ដែលកំណត់អំពីរបៀបគូសលើសន្លឹកឆ្នោត ដែលត្រូវចាត់ទុកជាបានការ តាមរយៈ “គំនូសសញ្ញា” នោះឡើយ។ តាមស្មារតីនៃបទបញ្ញត្តិនេះ គ្មានបានចែងតម្រូវឲ្យអ្នកបោះឆ្នោតត្រូវតែគូសសញ្ញានេះតែមួយគត់នោះឡើយ។ មានន័យថា ច្បាប់អនុញ្ញាតឲ្យអ្នកបោះឆ្នោតគូសសញ្ញាគាំទ្រទូទៅនៅលើសន្លឹកឆ្នោត វៀរលែងតែគំនូសសញ្ញាទាំងឡាយណា ដែលធ្វើអោយគេសំគាល់បាននូវអត្តសញ្ញាណរបស់អ្នកបោះឆ្នោត ដូចចែងក្នុងចំណុច៣ នៃកថាខ័ណ្ឌ៣ មាត្រា១២០ នៃច្បាប់ស្តីពីការបោះឆ្នោតជ្រើសតាំងតំណាងរាស្ត្រ (ច.ប.ត.រ)។
ទី២, ការទទួលយកជាបានការនូវគំនូសសញ្ញាគាំទ្រជាទូទៅនេះ ត្រូវបានអនុវត្តតាំងពីការបោះឆ្នោតសភាធម្មនុញ្ញឆ្នាំ១៩៩៣ ដែលរៀបចំឡើងដោយអ៊ុនតាក់មកម្ល៉េះ ហើយបទពិសោធន៍ដ៏ល្អនៃគំនូសសញ្ញាគាំទ្រជាទូទៅនេះ ក៏ត្រូវបានបន្តអនុវត្តសម្រាប់ការបោះឆ្នោតក្រោយក្រោយទៀត ក្នុងគោលបំណងធានាការពារសំឡេងគាំទ្ររបស់អ្នកបោះឆ្នោតក្នុងបរិបទនៃប្រទេសកម្ពុជា។ ទី៣, តាមការសិក្សាក្នុងបណ្ដាប្រទេសជាច្រើនលើពិភពលោក ដូចជានៅចក្រភពអង់គ្លេសជាដើម គេមិនដែលតម្រូវឲ្យអ្នកបោះឆ្នោតត្រូវតែគូសសញ្ញាគាំទ្រជាក់លាក់ណាមួយនៅលើសន្លឹកឆ្នោតនោះឡើយ។
លោក ទេព នីថា បញ្ជាក់ទៀតថា ស្ថិតក្នុងលក្ខខណ្ឌដែល គ.ជ.ប បានកំណត់នេះ គឺមិនធ្វើឲ្យប៉ះពាល់ដល់ការសម្ងាត់នៃការបោះឆ្នោតដូចមានចែងនៅក្នុងមាត្រា១០៦នោះទេ។ ជនណាដែលព្យាយាមដោយទុច្ចរិត ក្នុងគោលបំណងកត់សំគាល់ ដើម្បីឱ្យដឹងថា អ្នកបោះឆ្នោតណាម្នាក់ ឬច្រើននាក់បានបោះឆ្នោតឲ្យគណបក្សនយោបាយណាមួយ នឹងត្រូវទទួលការព្រមានពីប្រធានការិយាល័យរាប់សន្លឹកឆ្នោត។ ក្នុងករណីនៅតែធ្វើសកម្មភាពដដែលឡើងវិញជាលើកទី២ នឹងត្រូវចាត់ទុកថា ជាការរំលោភលើការសម្ងាត់នៃការបោះឆ្នោត ហើយជនដែលមានការពាក់ព័ន្ធត្រូវបណ្ដេញចេញពីការិយាល័យរាប់សន្លឹកឆ្នោត នឹងត្រូវទទួលទោសតាមច្បាប់ស្ដីពីការបោះឆ្នោត៕
Source: Kampuchea Thmey Daily
0 Comments