បុរសជនជាតិអង់គ្លេសម្នាក់ ដែលរងការបំពុលដោយសារធាតុ Novichok បាននិយាយនៅក្នុងបទសម្ភាសន៍ ដែលចេញផ្សាយកាលពីថ្ងៃអង្គារថា គាត់មានសំណាងណាស់ ដែលនៅរស់ បន្ទាប់ពីបានផ្តល់ដបទឹកអប់មួយ ដែលមានភ្នាក់ងារបំផ្លាញសរសៃប្រសាទទៅឲ្យមិត្តស្រីរបស់គាត់ ដែលក្រោយមកបានស្លាប់។
លោក Charlie Rowley អាយុ៤៥ឆ្នាំបាននិយាយថា គាត់មានការភ្ញាក់ផ្អើលយ៉ាងខ្លាំងដែលគាត់នៅរស់បន្ទាប់ពីបានកាន់សារធាតុប្រេងនេះប៉ុន្តែគាត់នៅតែមានទុក្ខសោកចំពោះការស្លាប់នៃដៃគូរបស់គាត់ឈ្មោះ Dawn Sturgess អាយុ៤៤ឆ្នាំដែលមានកូន៣នាក់។
អ្នកទាំងពីរបានធ្លាក់ខ្លួនឈឺនៅទីក្រុង Amesbury ជិតទីក្រុង Salisbury នៃប្រទេសអង់គ្លេសភាគអាគ្នេយ៍ដែលជាកន្លែងអតីតចារកម្មរុស្ស៊ីនិងកូនស្រីរបស់គាត់ត្រូវបានបំពុលជាមួយសារធាតុ Novichok កាលពីខែមីនាប៉ុន្តែបានរួចជីវិត។
នៅក្នុងបទសម្ភាសន៍ជាមួយទូរទស្សន៍ ITV News លោក Rowley បាននិយាយថា គាត់មិនអាចចាំបានទេថាតើគាត់បានរើសដបទឹកអប់នៅកន្លែងណាប៉ុន្តែបាននិយាយថា វានៅតែស្ថិតនៅក្នុងប្រអប់និងច្រកក្នុងថង់ប្លាស្ទិក។
នៅពេលដែលគាត់បានផ្តល់វាជាអំណោយមួយទៅឲ្យនាង Sturgess, នាងបានស្គាល់ដបនិងផលិតផលនេះថាជារបស់ប្រេនហើយបានបាញ់វានៅលើក.ដៃរបស់នាង។
ក្នុងរយៈពេល១៥នាទី Dawn និយាយថា នាងឈឺក្បាលហើយនាងបានដួលនៅក្នុងបន្ទប់ទឹក។
លោក Rowley ក៏បានបាញ់ខ្លះនៅលើដៃរបស់គាត់ផងដែរប៉ុន្តែបានលាងវាចេញ។ គាត់បាននិយាយថា “វាមានសារធាតុប្រេងហើយខ្ញុំបានធុំក្លិនវា វាមិនមានជាក្លិនទឹកអប់ទេ”។
អ្នកទាំងពីរនាក់បានធ្លាក់ខ្លួនឈឺហើយត្រូវបានបញ្ជូនទៅមន្ទីរពេទ្យនៅថ្ងៃនោះគឺថ្ងៃទី៣០ខែមិថុនា។
ពីរបីថ្ងៃក្រោយមក អាជ្ញាធរបានបញ្ជាក់ថា ពួកគេបានប៉ះទៅនឹងសារធាតុ Novichok ដែលជាភ្នាក់ងារបំផ្លាញប្រព័ន្ធប្រសាទថ្នាក់យោធាដែលត្រូវបានបង្កើតឡើងដោយសហភាពសូវៀតអំឡុងសង្គ្រាមត្រជាក់។
នាង Sturgess បានស្លាប់នៅថ្ងៃទី៩ខែកក្កដាចំណែកលោក Rowley ត្រូវបានអនុញ្ញាតឲ្យចេញពីមន្ទីរពេទ្យកាលពីថ្ងៃសុក្រ។
ប៉ូលិសកំពុងចាត់ទុកការស្លាប់របស់ Sturgess ថាជាករណីឃាតកម្មហើយនិយាយថា ការជាប់ពាក់ព័ន្ធនឹងការបំពុលលើលោក Sergei Skripal និងកូនស្រីរបស់គាត់ឈ្មោះ Yulia កាលពីថ្ងៃទី៤ខែមីនាគឺជាចំណុចសំខាន់មួយនៃការស៊ើបអង្កេត៕ AFP
Source: Kampuchea Thmey Daily
0 Comments