ភ្នំពេញ ៖ គណបក្សប្រជាធិបតេយ្យមូលដ្ឋាន (GDP) នៅព្រឹកថ្ងៃទី១០ ខែមិថុនា ឆ្នាំ២០១៨ បានធ្វើសមាជ ដើម្បីជ្រើសរើសតំណែងបេក្ខភាពនាយករដ្ឋមន្ត្រីម្នាក់ ក្នុងចំណោមបេក្ខភាពចំនួន៣រូប ដែលពិធីនេះធ្វើឡើងនៅទីស្នាក់ការរបស់ខ្លួន ស្ថិតនៅផ្ទះលេខ៣៨ ផ្លូវ១៩៣២ ភូមិពោងពាយ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ហើយសំឡេងឆ្នោតបានគាំទ្រលោក យ៉ង់ សាំងកុមារ ជាបេក្ខភាពនាយករដ្ឋមន្ត្រីសម្រាប់ការបោះឆ្នោតជាតិ នាថ្ងៃទី២៩ ខែកក្កដា ខាងមុខ។
សមាជនេះមានអ្នកចូលរួមប្រមាណ១៨០នាក់ ក្រោមអធិបតីភាពលោក យ៉េង វីរៈ ប្រធានគណបក្សប្រជាធិបតេយ្យមូលដ្ឋាន (GDP) និងថ្នាក់ដឹកនាំមួយចំនួនទៀត ហើយក្នុងចំណោមបេក្ខភាពនាយករដ្ឋមន្ត្រីរួមមាន លោក សាម អ៊ីន អគ្គលេខាធិការបក្ស លោក យ៉ង់ សាំងកុមារប្រធានគណៈកម្មាធិការនាយក និងលោក ឃុន សាវឿន។ ក្នុងសមាជនោះលោក យ៉ង់ សាំងកុមារ ត្រូវបានសមាជិកបក្សបោះឆ្នោតគាំទ្រ ឲ្យធ្វើជាបេក្ខភាពនាយករដ្ឋមន្ត្រីរបស់បក្សសម្រាប់ការបោះឆ្នោតជាតិខាងមុខ ក្នុងសំឡេងនាំមុខដាច់គេ១២៧។ ដោយឡែកលោក យ៉េង វីរៈ ដែលជាប្រធានបក្ស និងលោកស្រី ប្រុក វន្នី ជាអនុប្រធាននោះ មិនឈរឈ្មោះទេ។
សូមបញ្ជាក់ថា ដំណើរការបោះឆ្នោតជ្រើសតាំងតំណាងរាស្ដ្រនីតិកាលទី៦ ឆ្នាំ២០១៨ នឹងប្រព្រឹត្តិទៅនៅថ្ងៃទី២៩ ខែកក្កដា ឆ្នាំ២០១៨ ខាងមុខ ហើយគណបក្សនយោបាយ ដែលបានចូលរួមប្រកួតប្រជែងមានចំនួន២០ រួមមាន គណបក្ស “គណបក្សខ្មែររួបរួមជាតិ” លេខរៀងទី១, គណបក្ស “គណបក្សមាតុភូមិយើង” លេខរៀងទី២, គណបក្ស “គណបក្សពន្លឺថ្មី” លេខរៀងទី៣, គណបក្ស “សញ្ជាតិកម្ពុជា” លេខរៀងទី៤, គណបក្ស “ខ្មែរក្រោក” លេខរៀងទី៥, គណបក្ស “សំបុកឃ្មុំសង្គមប្រជាធិបតេយ្យ” លេខរៀងទី៦, គណបក្ស “ប្រជាធិបតេយ្យមូលដ្ឋាន” លេខរៀងទី៧, គណបក្ស “ខ្មែរសាធារណរដ្ឋប្រជាធិបតេយ្យ” លេខរៀងទី៨, គណបក្ស “រស្មីខេមរា” លេខរៀងទី៩, គណបក្ស “សម្ព័ន្ធដើម្បីប្រជាធិបតេយ្យ” លេខរៀងទី១០, គណបក្ស “ខ្មែរសាធារណរដ្ឋ” លេខរៀងទី១១, គណបក្ស “ខ្មែរឈប់ក្រ” លេខរៀងទី១២, គណបក្ស “ហ្វ៊ុនស៊ិនប៉ិច” លេខរៀងទី១៣, គណបក្ស “ខ្មែរអភិវឌ្ឍន៍សេដ្ឋកិច្ច” លេខរៀងទី១៤, គណបក្ស “យុវជនកម្ពុជា” លេខរៀងទី១៥, គណបក្ស “ធម្មាធិបតេយ្យ” លេខរៀងទី១៦, គណបក្ស “ឆន្ទៈខ្មែរ” លេខរៀងទី១៧, គណបក្ស “ជនជាតិដើមប្រជាធិបតេយ្យកម្ពុជា” លេខរៀងទី១៨, គណបក្ស “ខ្មែរតែមួយ” លេខរៀងទី១៩ និងគណបក្ស “ប្រជាជនកម្ពុជា” លេខរៀងទី២០៕
Source: Kampuchea Thmey Daily
0 Comments