ព្រៃវែង ៖ លោក ដួង សុខេង អនុប្រធានក្រុមការងារគណបក្សប្រជាជនកម្ពុជាចុះជួយឃុំថ្មពូនស្រុកកញ្ជ្រៀច កាលពីថ្ងៃទី៩ ខែមិថុនា បានចុះទៅជួបសាកសួរសុខទុក្ខដល់ខ្នងផ្ទះប្រជាពលរដ្ឋដើម្បីចង់បានសំណូមពររបស់ពួកគាត់ពាក់ព័ន្ធក្នុងការរស់នៅប្រចាំថ្ងៃ។
លោក ដួង សុខេង បានមានប្រសាសន៍ថា នៅថ្ងៃអាទិត្យនេះ លោកបានទទួលភារកិច្ចឲ្យដឹកនាំក្រុមការងារគណបក្សប្រជាជនកម្ពុជាចុះជួយឃុំថ្មពូនស្រុកកញ្ជ្រៀច ឲ្យចុះមកតាមខ្នងផ្ទះប្រជាពលរដ្ឋក្នុងភូមិថ្មពូនដើម្បីពិនិត្យមើលស្ថានភាពទឹកលិចលើផ្លូវ ខណៈដែលមានប្រជាពលរដ្ឋមួយចំនួនលោកបានសាងសង់ផ្ទះលើប្រព័ន្ធលូប្រឡាយទឹកនៅសងខាងផ្លូវ ហើយឆ្លៀតពេលនោះក្រុមការងាររបស់លោកក៏មានភារកិច្ចចែកខិត្តប័ណ្ណព័ត៌មានបោះឆ្នោតព្រមទាំងណែនាំឲ្យបងប្អូនប្រជាពលរដ្ឋគូសឲ្យចំ ចំណុចដែលមានលេខរៀងទី២០ និងមានរូបទេវតាបាចផ្កាគឺជាលេខរៀងរបស់គណបក្សប្រជាជនកម្ពុជា។
ទន្ទឹមនឹងនោះដែរក្រុមការងារបានទទួលស្វាគមន៍ចំពោះបងប្អូនដែលជាអតីតសមាជិក សមាជិកា គណបក្សគណបក្សសង្គ្រោះជាតិចំនួន១៧គ្រួសារស្មើនឹងសមាជិក២៤នាក់ដែលបានសុំចូលរួមជីវភាពនយោបាយជាមួយគណបក្សប្រជាជនកម្ពុជាយើងវិញ។ អ្វីដែលបងប្អូនប្រជាពលរដ្ឋលោកសុំឲ្យក្រុមការងារជួយជាបន្ទាន់នោះ គឺជួយស្តារប្រឡាយនៅអមសងខាងផ្លូវឲ្យបានឆាប់ដើម្បីកុំឲ្យពេលភ្លៀងធ្លាក់ខ្លាំងត្រូវស្ទះមុខទឹកនាំឲ្យលិចលើផ្លូវព្រមទាំងផ្ទះសម្បែងប្រជាពលរដ្ឋ។ ក្នុងឱកាសនោះដែរក្រុមការងាររបស់លោកដួង សុខេង បានពន្យល់ឲ្យប្រជាពលរដ្ឋលោកត្រូវនាំគ្នាទៅបោះឆ្នោតជូនគណបក្សប្រជាជនកម្ពុជាដែលមានលេខរៀងទី២០នាថ្ងៃទី២៩ ខែកក្កដា ឆ្នាំ២០១៨ខាងមុខនេះ៕
Source: Kampuchea Thmey Daily
0 Comments