ភ្នំពេញ ៖ សមាគម ចិនត្រកូលលីមកម្ពុជា បានការសហការគាំទ្រ ពីមូលនិធិជើងសិប្បនិម្មិតរបស់ម្ចាស់ក្សត្រីថៃ ផ្តល់ជូនជើងសិប្បនិម្មិត ដល់យោធិនពិការចំនួន១៤០នាក់ មកពីមណ្ឌលយោធិនពិការ៣១៧ តេជោភ្នំឆ័ត្រ នៅទីស្នាក់ការ សមាគមចិន ត្រកូល លីម កាលពីថ្ងៃទី១០ ខែមិថុនា ឆ្នាំ២០១៨។
កម្មវិធីនេះក៏មានការអញ្ជើញចូលរួម ពីសំណាក់ ឯកឧត្តម នាយឧត្តមសេនីយ៍ មាស សុភា អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងទ័ពជើងគោក ឯកអគ្គរាជទូតថៃ ប្រចាំព្រះរាជាណាចក្រកម្ពុជា លោកស្រីជំទាវឧកញ៉ា លីម ឈីវហូរ និងក្រុមគ្រួសារ សមាគម ត្រកូលលីម រួមជាមួយបងប្អូន យោធិនពិការផងដែរ។
លោកស្រីជំទាវឧកញ៉ា លីម ឈីវហូរ ប្រធានកិត្តិយស សមាគមចិន ត្រកូល លីម បានថ្លែងថា សមាគមចិន ត្រកូលលីម បង្កើតឡើងតាំងពីឆ្នាំ២០០១ រហូតមកដល់បច្ចុប្បន្ន មានរយៈពេល៨ឆ្នាំមកហើយ ក្នុងនោះដែរ ក៏មានសកម្មភាពជាច្រើនចូលរួមជួយដល់សង្គមជាតិ និងចូលរួមបណ្តុះគំនិត យុវជនជំនាន់ក្រោយត្រកូលលីម ចងក្រងជាក្រុម រៀនសូត្រ នូវចំណេះវិជ្ជា បទពិសោធន៍ការងារ សម្រាប់ត្រៀមខ្លួនបន្តវេន ក្នុងសមាគមនាថ្ងៃអនាគត។
លោកស្រីជំទាវឧកញ៉ា បន្តថា តាមរយៈកម្មវិធីនេះ បានបញ្ជាក់យ៉ាងច្បាស់ថា ក្រោមការដឹកនាំ ដ៏ឈ្លាសវៃ របស់ សម្តេចអគ្គមហាសេនាបតីតេជោ ហ៊ុន សែន បានធ្វើអោយព្រះរាជាណាចក្រកម្ពុជា មានការរីកចម្រើន មានការអភិវឌ្ឍ សុខសន្តិភាព នៅទូទាំងប្រទេសគ្មានអ្វីក្រឡៃបានឡើយ។
ដោយឡែកលោកនាយឧត្តមសេនីយ៍ មាស សុភា អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងទ័ពជើងគោក បានមាប្រសាសន៍ថា នេះជាលើកដំបូងហើយ ដែលភាគីពាក់ព័ន្ធ ខាងលើ បានសហការគ្នាផ្តួចផ្តើមគំនិតបង្កើតនូវកម្មវិធីនេះឡើង ក្នុងគោលបំណងជួយឧបត្ថម្ភគាំទ្រ និងជួយសម្រាលការលំបាកដល់យោធិនពិការ នៃមណ្ឌលយោធិនពិការ ៣១៧តេជោភ្នំឆ័ត្រ ក៏ដូចជាបានរួមចំណែកយ៉ាងសំខាន់ជាមួយរាជរដ្ឋាភិបាល ក្នុងការជួយដល់ ជនបាត់បង់សមត្ថភាពការងារ ហើយកម្មវិធីនេះ ក៏ស្របតាមគោលនយោបាយយុទ្ធសាស្ត្រចតុកោណដំណាក់កាលទី៣ នៃរាជរដ្ឋាភិបាលអាណត្តិទី៥ ផងដែរ។
លោកនាយឧត្តមសេនីយ៍ បន្តថា តបការស្នើសុំ សមាគមចិនត្រកូលលីម បានសហការជាមួយមូលនិធិ ជើងសិប្បនិម្មិត របស់ម្ចាស់ក្សត្រីថៃ បានរៀបចំនូវកម្មវិធីបរិច្ចាគជើង សិប្បនិម្មិត ដល់យោធិន ចំនួន១៤០នាក់ ការបរិច្ចាគជើងសិប្បនិម្មិតនេះ សរុប១៥០គ្រឿង ជើងធម្មតា ១៤០គ្រឿង និងជើងសម្រាប់ធ្វើស្រែចំការ ចំនួន១០គ្រឿង ហើយរយៈពេលនៃការផ្តល់ជូននេះ មានចំនួន៧ថ្ងៃ លោកសង្ឃឹមថាយោធិនពិកាដែលទទួលបានជើងសិប្បនិម្មិតនេះ យកទៅប្រើប្រាស់តាមតម្រូវការបស់ខ្លួន ដើម្បីរីកចម្រើនក្នុងគ្រួសារ និងប្រទេសជាតិ៕
Source: Kampuchea Thmey Daily
0 Comments