ខ្សែបម្រើកណ្ដាល ច្រឹង ពលរដ្ឋ របស់ក្លិបក្រសួងការពារជាតិ ដែលជាផ្នែកមួយជួយឲ្យក្រុម ឈ្នះជើងឯករងពានរង្វាន់លីគកំពូលកម្ពុជា (Metfone Cambodian League) ២ឆ្នាំជាប់ៗគ្នា នៅពេលនេះកំពុងតែសម្រាកព្យាបាលរបួសរបស់ខ្លួន ខណៈរូបគេបានខកខានជួយក្រុមនៅដើមរដូវកាលឆ្នាំ២០១៨នេះ។
នៅដើមសប្ដាហ៍នេះ មានដំណឹងឆ្លើយឆ្លងគ្នាជាច្រើនរវាងកីឡាករ ច្រឹង ពលរដ្ឋ ជាមួយក្លិបក្រសួងការពារជាតិ។ ដោយដំបូងឡើយលោក ទេព ឡុងរចនា អ្នកចាត់ការទូទៅរបស់ក្លិបបានប្រាប់អ្នកសារព័ត៌មានក្នុងស្រុកថាកីឡាកររូបនេះលែងជាកីឡាករបស់លោកទៀតហើយដោយសារតែគេបានបាត់ដំណឹងសូន្យឈឹងអំឡុងពេលសម្រាកព្យាបាលរបួស។
ចំណែកកីឡាករ ច្រឹង ពលរដ្ឋ វិញបានឆ្លើយឆ្លងវិញតាមរយៈវិបសាយផ្លូវការរបស់គណៈកម្មការប្រកួតបាល់ទាត់ជាតិកម្ពុជា (CNCC) ថា ទោះបីខ្លួនមិនបានទៅចូលរួមហ្វឹកហាត់ឬមិនបានបង្ហាញខ្លួនជាមួយក្លិបមែន តែរូបគេបានសំងំហ្វឹកហាត់ខ្លួនឯងនៅក្រៅទីលាន ឬហាត់ហែលទឹកដើម្បីពង្រឹងសរសៃ gym ដើម្បីប្រមូលសាច់ដុំឡើងវិញក្រោយសម្រាករយៈពេលយូ។ រូបគេថា គេក៏ហ្វឹកហាត់ពង្រឹងផ្នែកកម្លាំងដើម្បីឲ្យសម្រួលសសៃដែរ។ យ៉ាងណារូបគេបានសន្យាថានឹងចូលហ្វឹកហាត់ក្នុងក្លិបវិញនៅថ្ងៃច័ន្ទ ដើមសប្ដាហ៍នេះ។
ងាកមកលោក ភា សុភត្រា គ្រូបង្វឹកក្រសួងការពារជាតិ វិញបានបានឆ្លើយតបនឹងការបកស្រាយរបស់ច្រឹង ពលរដ្ឋ តាមរយៈទូរទស្សន៍ BTV News ថា «ការហ្វឹកហាត់ខ្លួនឯង ទោះបីកីឡាករអាជីពក៏មានអ្នកតាមដាន និងយកចិត្តទុកដាក់ដែរ អំឡុងពេលរបួស។ ហាត់ខ្លួនឯង ប៉ុន្ដែជាមកវិញ គាត់លេងបានឬអត់ទេ? ស្គាល់ពីតាក់ទិចរបស់គ្រូ ឬក្រុមអត់? គាត់អត់ដឹងទេ។ អញ្ចឹងខ្ញុំគិតថា ការសន្យា ជាមួយនឹងការបកស្រាយរបស់គាត់ថា នឹងមកហាត់ថ្ងៃនេះ(ថ្ងៃច័ន្ទ) តែគាត់មិនបានបង្ហាញវត្តមាន ដូច្នេះមានន័យថា គាត់បានបោកប្រាសក្លិបសាជាថ្មី សូម្បីតែខ្ញុំ ក៏គាត់មិនឲ្យដំណឹងមកខ្ញុំ ព្រោះគាត់ធ្លាប់សន្យាថា យ៉ាងហោចណាស់១សប្ដាហ៍មក ២ដង»។
កីឡាករខ្សែបម្រើកណ្ដាលរូបនេះបានរងរបួសយារសរសៃជង្គង់ខាងស្តាំ នៅក្នុងប្រកួតសប្តាហ៍ទី១៧នៃពានរង្វាន់លីគកំពូលកម្ពុជា រដូវកាលឆ្នាំ២០១៧ ក្នុងជំនួបយកឈ្នះ២ទល់១ លើក្លិបខេមបូឌានថាយហ្គឺរ ម្ល៉េះ។ យ៉ាងណាក្តីអំឡុងពេលអវត្តមានកីឡាករ ច្រឹង ពលរដ្ឋ លោក ទេព ឡុងរចនា គ្រូបង្វឹករបស់ក្រុមនៅគ្រានោះ បានដាក់កីឡាករជំនួសតំណែងតំបន់កណ្តាលនេះបណ្តោះអាសន្នសិន រហូតដណ្តើមបានកៅអីវគ្គផ្ដាច់ព្រ័ត្រលីគកំពូលកម្ពុជា នៅគ្រានោះ។
សូមរំលឹកថា កីឡាកររូបនេះមានពាក្យចចាមអារ៉ាមថា ក្លិបបាល់ទាត់ Chonburi FC ដែលជាសមាជិកនៃលីគកំពូលប្រទេសថៃ តាមប្រមាញ់យកទៅចូលរួមក្រុម ក្រោយចប់ស៊ីហ្គេមឆ្នាំ២០១៧ នៅប្រទេសម៉ាឡេស៊ី តែក្រោយមកព័ត៌មាននេះក៏ស្ងប់ទៅវិញ។ មុនលីគកំពូលកម្ពុជារដូវកាលឆ្នាំ២០១៨ ក៏មានដំណឹងមកពីប្រទេសសិង្ហបុរី ថាកំពុងតែតាមចាប់អារម្មណ៍កីឡាកររូបនេះដែរ តែក៏ស្ងប់ស្ងាត់ជាបន្តទៀត។ ចុងក្រោយមានដំណឹងថាក្លិប CF La Nucíaសមាជិកពានរង្វាន់លីគលំដាប់ទី៤ របស់ប្រទេសអេស្ប៉ាញ (Tercera División) តែស្ថិតក្នុងសភាពស្ងប់ស្ងាត់ដូចគ្នា។
កីឡាករ ច្រឹង ពលរដ្ឋ ទើបមានអាយុ២២ឆ្នាំប៉ុណ្ណោះ ធ្លាប់ជាសមាជិកក្នុងក្រុមយុវជនថ្នាលប្រចាំក្លិបព្រះខ័នរាជ (ព្រះខ័នរាជស្វាយរៀង បច្ចុប្បន្ន) ហើយរូបគេត្រូវបានលោក សំ វ៉ាន់ដេត ដាក់ឈ្មោះក្នុងក្រុមឈុតធំចាប់ពីឆ្នាំ២០១០ ដល់២០១៣ ហើយចន្លោះពីឆ្នាំ២០១៣ ដល់២០១៥ រូបគេចូលរួមជាមួយក្រុមត្រាយអាស៊ី (ខេមបូឌានថាយហ្គឺរ បច្ចុប្បន្ន) ហើយចាប់ពីឆ្នាំ២០១៥ដល់បច្ចុប្បន្នរូបគេចូលរួមជាមួយក្រុមក្រសួងការពារជាតិ។ កីឡាកររូបនេះធ្លាប់ជាប់ឈ្មោះក្នុងក្រុមជម្រើសជាតិកម្ពុជា តាំងពី U16,U19,U22 និងជម្រើសជាតិផងដែរ៕
Source: Kampuchea Thmey Daily
0 Comments