ភ្នំពេញ ៖ ទីតាំងសិប្បកម្មកាត់ដេរមួយកន្លែងត្រូវបានភ្លើងឆាបឆេះក្នុងឃ្លាំងផ្ទុកកំណាត់ ដោយសង្ស័យជាករណីផ្ទុះសេខ្សែភ្លើងបង្កឲ្យមានការភ្ញាក់ផ្អើលដល់កម្មករ និង ថៅកែរត់ជនជើងគ្នាតែមិនមានរងគ្រោះថ្នាក់អ្វីឡើយ ដែលហេតុការណ៍នេះកើតឡើង កាលវេលាម៉ោង១១យប់ ថ្ងៃទី២៧ ខែកក្កដា ឆ្នាំ២០១៨ នៅចំណុចផ្ទះលេខ៩៣ជាន់ទី១ និងតាមបណ្ដោយផ្លូវលេខ២៨ ដែលស្ថិតនៅបុរី ពិភពថ្មីភូមិត្រពាំងថ្លឹង សង្កាត់ចោមចៅ១ ខណ្ឌពោធិ៍សែនជ័យ។
ម្ចាស់ផ្ទះឈ្មោះឌី ចរិយា ភេទស្រី អាយុ៣៨ឆ្នាំ មុខរបរថៅកែសិប្បកម្មខាងលើរស់នៅ ជិតផ្ទះកើតហេតុ។
តាមប្រភពព័ត៌មានពីស្រី្តជាម្ចាស់សិប្បកម្មបានឲ្យដឹងថា នៅមុនពេលកើតហេតុរូបនាងមិនបានសំរាកនៅកន្លែងកើតហេតុនោះឡើយ ដោយអោយបងស្រីជាជនជាតិចិន នឹងកម្មករប្រមាណ៥ទៅ៦នាក់ ដែលដេកសំរាកនៅកន្លែងសិប្បកម្មនោះជាប្រចាំ បន្ទាប់មកស្រាប់តែ បងស្រីជនជាតិចិនបានខលតាមទូរស័ព្ទប្រាប់គាត់ ថាភ្លើងឆេះ ឃ្លាំងផ្ទុកកំណាត់បាត់ទៅហើយ។
ពេលនោះនាងក៏បានខលប្តឹងទៅដើម្បីហៅកម្លាំងសមត្ថកិច្ច និងសន្តិសុខនិងរថយន្ដពន្លត់អគ្គិភ័យដើម្បីឲ្យជួយអន្តរាគមន៍។ បន្ទាប់មករថយន្ដពន្លត់អគ្គីភ័យរបស់ស្នងការនគរបាលរាជធានីភ្នំពេញ ក៏បានចេញមកជួយភ្លាមផងដែរ។
ពេលនោះ កម្លាំងសន្តិសុខនិងសមត្ថកិច្ចបានទៅដល់កន្លែងកើតហេតុ ដោយឃើញភ្លើងកំពុងឆេះ កម្លាំងសមត្ថកិច្ចនិងសន្តិសុខ បានយក បំពង់ពន្លត់អគ្គិភ័យដើម្បីចូលទៅបាញ់អស់ប្រមាណជាង១០បំពង់តែមិនរលត់។ នៅពេលភ្លាមៗនោះរថយន្តពន្លត់អគ្គិភ័យរបស់ស្នងការនគរបាលរាជធានីភ្នំពេញ បានមកដល់យ៉ាងលឿននិងបានជួយបាញ់ទឹកពន្លត់បានទាន់ពេលវេលា។
បើតាមសំដីសមត្ថកិច្ចនគរបាលប៉ុស្តិ៍ចោមចៅ១ បានឲ្យដឹងថា រថយន្ដពន្លត់អគ្គិភ័យរបស់ស្នងការនគរបាលរាជធានីភ្នំពេញបានមកដល់ ចំនួន១០គ្រឿង ហើយបានបាញ់ទឹកអស់ចំនួន៤គ្រឿង និងប្រើពេលវេលាអស់ប្រមាណ២០នាទី ព្រោះភ្លើងទើបតែបានឆេះតិចតួចប៉ុន្តែកំណាត់ឆេះ ងំហើយកម្លាំងពួកគាត់ បាញ់ទឹកទាន់តែជោគទើបឈប់។
ជាចុងក្រោយ ម្ចាស់សិប្បកម្មកាត់ដេរខាងលើបានអគុណដល់សមត្ថកិច្ចដែលបានមកជួយពន្លត់ទាន់ពេលវេលាមិនបណ្ដាលឲ្យមានការខូចខាតសម្ភារៈច្រើន៕
Source: Kampuchea Thmey Daily
0 Comments