សហព័ន្ធខ្មែរកីឡាប្រណាំងទោចក្រយានបានឲ្យដឹងថា កីឡាករមួយរូប និង គ្រូបង្វឹកមួយរូប នឹងចេញទៅបោះជំរំហ្វឹកហាត់នៅសាធារណរដ្ឋកូរ៉េ(ខាងត្បូង)រយៈពេល៣០ថ្ងៃ។
នេះជាការបោះជំរំហ្វឹកហាត់កម្រិតពិភពលោក ដែលរៀបចំឡើងដោយសហព័ន្ធអន្តរជាតិតែម្ដង។ការបោះជំរំនេះ មានរយៈពេល៣០ថ្ងៃ គឺពីថ្ងៃទី២១ ខែសីហា និងត្រឡប់មកវិញនៅថ្ងៃទី ២០ កញ្ញា។
លោក វង្ស ខាន់ពៅ អគ្គលេខាធិការសហព័ន្ធខ្មែរកីឡាទោចក្រយាន បានឱ្យដឹងថា ៖ នេះជាលើកទី ៣ ហើយ ដែលមជ្ឈមណ្ឌលកីឡាប្រណាំងកង់ដ៏ធំរបស់កូរ៉េមួយនេះ បានជួយឲ្យក្រុមកង់កម្ពុជា បានទៅបោះជំរំហ្វឹកហាត់កម្រិតពិភពលោកនេះ។
២លើកកន្លងមក សហព័ន្ធបានបញ្ជូនក្រុមកីឡាការិនីទៅចូលរួម ដែលលើកទី១ មានរយៈពេល ៥០ ថ្ងៃ លើកទី ២ មានរយៈពេល ៣០ ថ្ងៃដូច លើកទី ៣ នេះដែរ។
លោក អគ្គលេខាធិការសហព័ន្ធខ្មែរកីឡាទោចក្រយាន បានបញ្ជាក់ថា ការទៅបោះជំរំនេះ វាមានប្រយោជន៍ទាំងគ្រូបង្វឹក និងកីឡាកររបស់យើង ព្រោះក្នុងពេលបោះជំរំនោះ កីឡាករត្រូវហ្វឹកហាត់កម្មវិធីផ្សេងៗ ក្រោមការបង្ហាត់បង្ហាញពីគ្រូជំនាញកម្រិតពិភពលោកមកពីអង់គ្លេស ហេតុនេះគ្រូបង្វឹករបស់យើង នឹងទទួលបានចំណេះដឹង និងបច្ចេកទេសទំនើប ពីការបោះជំរំនេះមកបង្ហាត់ដល់អត្តពលិកកម្ពុជាវិញ។
លោក វង្ស ខាន់ពៅ ក៍បានចាត់ទុកការចេញទៅបោះជំរំរយៈពេល ៣០ ថ្ងៃ នៅកូរ៉េ នេះថា វាជាពេលវេលាដ៏មានប្រយោជន៍ ដែលនឹងជួយឲ្យគ្រូបង្វឹក និង កីឡាករ ទទួលបានទាំងបទពិសោធន៍និងចំណេះដឹងថ្មី យកមកអភិវឌ្ឍវិស័យកីឡាប្រណាំងកម្ពុជានៅកម្ពុជា ឲ្យកាន់តែមានការរីកចម្រើន ដើម្បីឆ្ពោះទៅកាន់ការប្រកួតស៊ីហ្គេម ឆ្នាំ ២០២៣ នៅកម្ពុជា៕
Source: Kampuchea Thmey Daily
0 Comments