ព្រឹត្តិការណ៍ប្រកួតប្រដាល់គុនខ្មែរគូម៉ារ៉ាតុង ដណ្ដើមប្រាក់១០លានរៀលរបស់ ក្រុម ហ៊ុនស្រាបៀរGanzberg ក្នុងប្រភេទទម្ងន់៦៥គីឡូក្រាម នឹងចាប់ផ្ដើមនៅយប់ថ្ងៃទី០៤ ខែសីហា ឆ្នាំ២០១៨នេះហើយ នៅលើសង្វៀនSEATV។
អ្នកប្រដាល់ជើងចាស់ចំនួន០៨នាក់ មកពីសមាគមក្លិបចំនួន៨ បានចូលរួមប្រកួតក្នុងព្រឹត្តិការណ៍នេះ។ អ្នកប្រដាល់ទាំង០៨រូបនោះ ត្រូវបែងចែកជាពីរពូល មួយពូលមាន៤រូប ដែលក្នុងពូល A មានកីឡាករ ហុង ជីវ៉ុង ក្លិបមិត្តប៉ូលីស, មុត ខ្លឹមខ្មៅក្លិបមកុដរាជសីហ៍ , មាស សុជាតិ ក្លិបឃ្លាំងមឿងកីឡា និង ហ៊ឹម សារ៉ាន់សមាគមកីឡាប្រដាល់ក្រសួងការពារជាតិ។ ចំណែកពូល B មាន ង៉ែត រដ្ឋា ក្លិបតាព្រហ្មមានជ័យ, អ៊ុំ វណ្ណេត ក្លិបការិយាល័យទី៥កងទ័ពជើងគោក , សេក គឹមរួនក្លិបអង្គរមានជ័យខេត្តសៀមរាប និងកីឡាករ ហួន សុខនីម ក្លិបមហិទ្ធរិទ្ធតាដំបងដែក។
ចំពោះរូបមន្តនៃការប្រកួត គឺជាការប្រកួតជម្រុះសន្សំពិន្ទុក្នុងពូល ដោយការប្រកួតមួយលើកៗមានតែ ២ គូ ហើយព្រឹត្តិការណ៍នេះ នឹងត្រូវចាប់ផ្តើមពីថ្ងៃសៅរ៍ ទី ៤ ខែសីហា ខាងមុខនេះតទៅ ។
ការប្រកួតនេះ គឺធ្វើតាមរូបមន្តវិលជុំសន្សំពិន្ទុដោយអ្នកទាំង ៨ ត្រូវជួបគ្នាទាំងអស់ ។ការប្រកួតជម្រុះទម្លាក់ចោល ៦ នាក់ចេញទុក ១ នាក់ដែលមានពិន្ទុលើសគេក្នុងពូលនីមួយៗ ពោលគឺយកលេខ១ពូលA និងលេខ១ពូលB ដើម្បីឡើងទៅប្រកួតផ្តាច់ព្រ័ត្រដណ្តើមយកប្រាក់១០លានរៀលតែម្តង ។
សម្រាប់ការប្រកួតជម្រុះសប្តាហ៍ទី១ ថ្ងៃទី០៤សីហានេះ ជាការប្រកួតជម្រុះរវាងហុង ជីវ៉ុង ក្លិបមិត្តប៉ូលិសថិតក្នុងពូលA ជួបជាមួយង៉ែត្រ រដ្ឋា ក្លិបតាព្រហ្មមានជ័យថិតក្នុងពូលB ហើយមួយគូទៀតនោះ គឺមុត ខ្លឹមខ្មៅ ក្លិបមកុដរាជសីហ៍ក្នុងពូលA ជាមួយ អ៊ុំ វណ្ណេត ក្លិបការិយាល័យទី៥កងទ័ពជើងគោកក្នុងពូលB។
រវាងហុង ជីវ៉ុង និង ង៉ែត្រ រដ្ឋា ធ្លាប់ប៉ះគ្នា២លើកហើយកន្លងមក ដោយវាយឈ្នះចាញ់គ្នាដោយពិន្ទុម្តងម្នាក់ៗ ។ ពួកគេទាំងពីរ សុទ្ធតែមានសមត្ថភាពបច្ចេកទេសខ្ពស់ដូចគ្នា ដែលមិនមាននរណាហ៊ានមើលស្រាលគ្នានោះទេក្នុងការជួបគ្នាលើកនេះ ។ដូច្នេះ ចាំមើល តើរវាងហុង ជីវ៉ុងនិងង៉ែត្រ រដ្ឋា ជួបគ្នាលើកនេះ តើអ្នកណារកបាន៣ពិន្ទុមុន ។
ចំពោះការជួបគ្នារវាង មុត ខ្លឹមខ្មៅ និង អ៊ុំ វណ្ណេត វិញ ក៏គ្មាននរណាហ៊ានទស្សទាយ មុនថា អ្នគណាឈ្នះ អ្នកណាចាញ់ដែរ ព្រោះពួកគេទាំងពីរសុទ្ធតែជាជើងខ្លាំងដូចគ្នា មានបច្ចេកទេសនិងកលល្បិចប្រកួតសំបូរបែប ដែលម្នាក់ៗពុំអាចធ្វេសប្រហែសបាននោះឡើយ ។ ចាំមើល តើមុត ខ្លឹមខ្មៅ ឬអ៊ុំ វណ្ណេត ដែលរកបាន៣ពិន្ទុនោះ ? ។
សូមបញ្ជាក់ថា ចំពោះតម្លៃខ្លួននៃការប្រកួតនោះ ការប្រកួតនៅជុំទី១ លុយតម្លៃខ្លួនសម្រាប់អ្នកឈ្នះ៦០ម៉ឺនរៀល ចាញ់បាន ៤០ ម៉ឺនរៀល។ វគ្គផ្ដាច់ព្រ័ត្រ អ្នកដែលឈ្នះគឺទទួលបានប្រាក់រង្វាន់១០លានរៀល និងអ្នកចាញ់បាន ២ លានរៀល ។
ព្រឹត្តិការណ៍នេះ មានរយៈពេល ១១ សប្តាហ៍ ដោយចាប់ផ្តើមពីសប្តាហ៍ទី១នៃខែសីហា នឹងគ្រោងបញ្ចប់នៅថ្ងៃសៅរ៍ ទី ៦ ខែតុលា ឆ្នាំ ២០១៨៕
Source: Kampuchea Thmey Daily
0 Comments