ភ្នំពេញ ៖ ស្ត្រីក្រមុំចាស់ម្នាក់ បានសម្រេចយកកន្សែងមកចង.កសម្លាប់ខ្លួននឹងចម្រឹងបង្អួចស្លាប់ ទាល់តែធំក្លិនស្អុយទៅហើយ ទើបមានការភ្ញាក់ផ្អើលក្នុងបន្ទប់ ជួលផ្ទះលេខ៣២Eo ផ្លូវ១៧៨ ភូមិ៩ សង្កាត់ជ័យជំនះ ខណ្ឌដូនពេញកាលពីថ្ងៃទី២៨ ខែកក្កដា ឆ្នាំ២០១៨នេះ។
សមត្ថកិច្ចបានឲ្យដឹងថា សពជនរងគ្រោះឈ្មោះ អ៊ុក ចាន់ធីដា អាយុ៦៣ឆ្នាំ ជាក្រមុំចាស់មិនយកប្ដី ស្នាក់នៅកន្លែងហេតុ និងទីកន្លែងកំណើត សង្កាត់លេខ៥ ក្រុងភ្នំពេញ ធ្វើអត្តឃាតដោយចង.ក សម្លាប់ខ្លួន ដោយប្រើកន្សែងចងទៅលើចម្រឹងបង្អួចថ្ម និងឡើងជាន់កៅអី។
បើតាមស្ត្រីជាម្ចាស់ផ្ទះជួលឈ្មោះ ហ៊ុល គន្ធា អាយុ៣៦ឆ្នាំ បានឲ្យដឹងថា មុនកើតហេតុ គាត់បានយកសម្លកកូរមួយចានឲ្យស្ត្រីរងគ្រោះ ព្រោះស្រឡាញ់រាប់អានគ្នា ដោយស្ត្រីរងគ្រោះបានជួលបន្ទប់របស់គាត់អស់រយៈពេលប្រហែលជិត២ឆ្នាំហើយ មកតែពេលមកដល់ មិនឃើញគាត់នៅខាងក្រោម រួចក៏ឡើងគោះទ្វារបន្ទប់ជួល មិនឮឆ្លើយតបតែមានក្លិនស្អុយសាយភាយចេញមកក្រៅ រួចក៏ទាញទ្វារកញ្ចក់បង្អួចបើកមើល ស្រាប់តែឃើញស្ត្រីជាអ្នកជួលបន្ទប់នោះស្លាប់ពីរបីថ្ងៃមកហើយ ក៏ប្ដឹងសមត្ថកិច្ចអាជ្ញាធរចុះមកត្រួតពិនិត្យកន្លែងកើតហេតុ។
ស្ត្រីជាម្ចាស់ផ្ទះជួលរូបនោះបានបញ្ជាក់ថា ស្ត្រីរងគ្រោះនេះគាត់មានជំងឺប្រចាំកាយ ហើយតែងតែទិញថ្នាំពេទ្យម្ដងៗ សុទ្ធតែជាង១០០ដុល្លារឯណោះ តែមិនដឹងថា ឈឺអ្វីទេព្រោះជនរងគ្រោះមិនដែលប្រាប់។
បើតាមមន្ត្រីការិយាល័យនគរបាលបច្ចេកទេសកោសល្យវិច័យ បានធ្វើការសន្និដ្ឋានថា ស្ត្រីជនរងគ្រោះពិតជាបានធ្វើអត្តឃាតដោយចង.កសម្លាប់ខ្លួនប្រាកដមែន ហើយសពបានប្រគល់ឲ្យទៅស្ត្រីជាប្អូនបង្កើតសពមានឈ្មោះ អ៊ុក សុម៉ាលី អាយុ៦១ឆ្នាំមុខរបរនៅផ្ទះ ស្នាក់នៅផ្ទះលេខ៣២E1 តាមផ្លូវ១៧៨ ក្រុម៩ សង្កាត់ជ័យជំនះ ខណ្ឌដូនពេញបញ្ជូនទៅវត្តសំបូរមាស ស្ថិតនៅសង្កាត់ដង្កោ ខណ្ឌដង្កោ ដើម្បីធ្វើបុណ្យតាមប្រពៃណី៕
Source: Kampuchea Thmey Daily
0 Comments