ភ្នំពេញ ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃកម្ពុជានៅថ្ងៃទី ១៩ ខែកក្កដា ឆ្នាំ២០១៨នេះ បានចេញសេចក្ដីណែនាំដល់ក្រសួង ស្ថាប័នពាក់ព័ន្ធ អាជ្ញាធរដែនដី នៅទូទាំងប្រទេសកម្ពុជា ឲ្យធ្វើការត្រៀមបង្ការដើម្បីកាត់បន្ថយហានិភ័យគ្រោះមហន្ដរាយទឹកជំនន់ដែលបាននិងកំពុងកើតឡើងនៅពេលនេះ។
នៅក្នុងសេចក្តីណែនាំរបស់សម្ដេចតេជោ ហ៊ុន សែន នារសៀលថ្ងៃទី១៩ខែកក្កដា ឆ្នាំ២០១៨នេះ បានថ្លែងបញ្ជាក់ថា «យោងតាមការអង្កេតតាមដាន នូវព្យាករណ៍អាកាសធាតុ ដែលបានបង្ហាញដោយក្រសួងធនធានទឹកនិងឧតុនិយម ឥទ្ធិពលរបស់ប្រព័ន្ធសម្ពាធទាបមកលើព្រះរាជាណាចក្រកម្ពុជា មានភ្លៀងធ្លាក់ជាបន្ដបន្ទាប់ បានធ្វើឲ្យខេត្តមួយចំនួនកំពុងរងឥទិ្ធពលទឹកភ្លៀង ដូចជាខេត្តកំពត ខេត្តព្រះសីហនុ ខេត្តកោះកុង ខេត្តកំពង់ស្ពឺ ខេត្តបាត់ដំបង ខេត្តប៉ៃលិន ប្រឈមនឹងការជន់លិច។ ដោយឡែក តំបន់ផ្ទៃរងទឹកភ្លៀងរបស់ទន្លេមេគង្គ ក្នុងប្រទេសឡាវ និងប្រទេសថៃ ក៏មានភ្លៀងធ្លាក់ច្រើនបង្កឲ្យទឹកទន្លេមេគង្គហក់ឡើងផងដែរ»។
តាមរយៈសេចក្ដីណែនាំនេះ សម្ដេចតេជោ ហ៊ុន សែន បានឲ្យក្រសួង ស្ថាប័នពាក់ព័ន្ធ អាជ្ញាធរដែនដីរាជធានី-ខេត្ត ត្រូវបង្កើនការយកចិត្តទុកដាក់ ប្រុងប្រយ័ត្នខ្ពស់បំផុត នឹងត្រូវមានការរៀបចំទុកជាមុន ដោយប្រើប្រាស់កម្លាំងសរុប មធ្យោបាយសរុប នៅពេលមានទឹកជំនន់កើនឡើង ត្រូវជម្លៀសប្រជាពលរដ្ឋទៅកាន់ទីទួលមានសុវត្ថិភាពបញ្ចៀសឲ្យខាងតែបាននូវការប៉ះពាល់អាយុជីវិត និង ការខូចខាតផ្សេងៗ ដែលកើតមានឡើងដោយយថាហេតុ ។
គណៈកម្មាធិការជាតិគ្រប់គ្រងគ្រោះមហន្តរាយបានប្រកាសនៅថ្ងៃទី ១៩ ខែកក្កដានេះថា ជំនន់ទឹកភ្លៀង បានកើតឡើងនៅខេត្តចំនួន ៧ រួមមាន៖ ខេត្តកោះកុង ប៉ៃលិន បាត់ដំបង កំពត ព្រះសីហនុ កែប និងខេត្តកំពង់ស្ពឺ។ ជំនន់ទឹកភ្លៀងដែលបង្កឡើងដោយឥទ្ធិពលខ្យល់មុសុងនិរតីក្នុងរយៈពេលប៉ុន្មានថ្ងៃនេះ នាំឲ្យប្រជាពលរដ្ឋ ១៦៨១ គ្រួសាររងគ្រោះ និងត្រូវជម្លៀសទៅកាន់ទីទួលសុវត្ថិភាព ហើយក៏ប៉ះពាល់ដំណាំស្រូវ និងដំណាំចំការរាប់ពាន់ហិកតា។ ចំណែកនៅផ្លូវជាតិលេខ៤ ទឹកបានស្រកអស់ហើយ នៅព្រឹកថ្ងៃទី១៩កក្កដានេះចរាចរណ៍ ក៏បានបើកឲ្យឆ្លងកាត់ឡើងវិញដែរ។
របាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ បានលើកបង្ហាញពីការប៉ះពាល់ និងខូចខាត ក្នុងខេត្តទាំង ៧ ដោយសារជំនន់ទឹកភ្លៀង ។ ក្នុងនោះ នៅខេត្តកំពង់ស្ពឺ ប៉ះពាល់ខ្លាំង ពិសេសស្រុកភ្នំស្រួច ដោយយោងតាមរបាយការណ៍របស់ខេត្ត គឺប៉ះពាល់ ៨ឃុំ រួមមាន៖ ប្រជាជនរងគ្រោះ ២៣០ គ្រួសារ ប៉ះពាល់ដំណាំស្រូវ ១១៥៧ ហិកតា ប៉ះពាល់ចំការស្វាយ ២៣២ ហិកតា។ បច្ចុប្បន្ន កំពុងមានការព្រួយបារម្ភចំពោះកម្រិតទឹកឡើងដល់ ៧,៦០ ម៉ែត្រ គិតត្រឹមម៉ោង ៨ព្រឹក ថ្ងៃទី១៩ ខែកក្កដា ហើយបើឡើងដល់ ៧,៨០ ម៉ែត្រ នឹងត្រូវលិចផ្សារកំពង់ស្ពឺ។ ចំពោះទឹក ដែលហូរធ្លាក់តាមស្ទឹងព្រែកត្នោត ពុំទាន់មានបញ្ហាទេ ដោយក្រសួងជំនាញ បានបង្វែរទឹកមុនសភាពការណ៍កើតឡើង ឲ្យទឹកហូរធ្លាក់ទៅអាងស្តុកទឹកទន្លេបាទី។
ចំណែកនៅខេត្តព្រះសីហនុ គណៈកម្មាធិការជាតិគ្រប់គ្រងគ្រោះមហន្តរាយ លើកឡើងថា ចំណុចដែលប្រឈមខ្លាំង គឺត្រង់ចំណុចស្ពានសំរោង ភូមិស្ទឹងសំរោង ឃុំអូរបាក់រទេះ ស្រុកកំពង់សីលា ដែលកាលពីព្រឹកថ្ងៃទី១៨ ខែកក្កដា ត្រូវបានទឹកលិចប្រវែងប្រមាណ ៩០០ ម៉ែត្រ កម្ពស់ប្រមាណ ១,៧០ម៉ែត្រ ហើយរហូតដល់វេលាម៉ោង ១៩:៥០ នាទីយប់ថ្ងៃទី១៨ ខែកក្កដា ទឹកបានស្រកនៅត្រឹម ០,៥០ម៉ែត្រ។ ទឹកលិចនៅស្រុកកំពង់សីលា ខេត្តព្រះសីហនុ មានប្រជាជនប៉ះពាល់ចំនួន ៣ ភូមិ ស្មើប្រមាណ ៩០០ គ្រួសារ។
នៅខេត្តកំពត ក៏ត្រូវបានគណៈកម្មាធិការជាតិគ្រប់គ្រងគ្រោះមហន្តរាយ លើកឡើងថា មានភ្លៀងធ្លាក់ច្រើន នៅតាមផ្លូវជាតិលេខ៣ និងផ្លូវជាតិលេខ៤១ ដោយនៅតាមដងផ្លូវ មានទឹកពេញព្រៀប។ គិតត្រឹមម៉ោង ១៩និង០០ ថ្ងៃទី១៨ ខែកក្កដា ប្រព័ន្ធប្រកាសឲ្យដឹងមុនគ្រោះទឹកជំនន់ នៅភូមិអណ្តូងជីមីន ឃុំកំពង់ក្រែង ស្រុកទឹកឈូ ឡើងដល់ ៨,២ ម៉ែត្រ ដែលជាកម្រិតប្រកាសអាសន្ន។
នៅខេត្តកែប សភាពការណ៍ជំនន់ទឹកភ្លៀង ត្រូវបានគណៈកម្មាធិការគ្រប់គ្រងគ្រោះមហន្តរាយ លើកឡើងថា អាចគ្រប់គ្រងបាន នឹងត្រូវតាមដានបន្តទៀត។
ខេត្តកោះកុង ជំនន់ទឹកភ្លៀង បានប៉ះពាល់ចំនួន ៥ ឃុំ នៅស្រុកចំនួន ៤ ដោយប្រជាជនចំនួនប្រមាណ ៥៥១ គ្រួសារ ត្រូវបានជម្លៀសទៅកាន់ទីទួលសុវត្ថិភាព។
នៅខេត្តប៉ៃលិន មានភ្លៀងធ្លាក់តិច ប៉ុន្តែនៅតាមស្ទឹង អូរ ព្រែក មានទឹកពេញទាំងអស់ដោយសារទឹកភ្លៀងហូរធ្លាក់ពីប្រទេសថៃក្នុងខេត្តត្រាត។
នៅខេត្តបាត់ដំបង គណៈកម្មាធិការជាតិគ្រប់គ្រងគ្រោះមហន្តរាយ ក៏បានលើកឡើងថា មានការបាក់ច្រាំងនៅស្ទឹងសង្កែ បណ្តោយប្រមាណ ១០០ ម៉ែត្រ និងចម្ងាយពីមាត់ស្ទឹងទៅចំណីផ្លូវ ប្រមាណ ៣០ ម៉ែត្រ នឹងកំពុងត្រូវបានជួសជុលឡើងវិញ។ នៅស្រុកសំឡូត ទឹកជំនន់ បានលិចភូមិចំនួន ៤ និងប៉ះពាល់ខូចខាត ៣ ឃុំ គឺឃុំព្រែកនរិន្ទ ឃុំព្រែកខ្ពប ឃុំព្រែកហ្លួង ក្នុងស្រុកឯកភ្នំ ដែលរួមមាន៖ ស្រូវកំពុងចេញផ្កា ខូចខាតទាំងស្រុង ៥០ ហិកតា ស្រូវប្រឈមការខូចខាតប្រមាណ ១០០៧ ហិកតា និងផ្ទះលិចទឹក ១០៩ ខ្នង។ ចំពោះទំនប់សេកសក និងទំនប់គង្ហត ក៏កំពុងមានការព្រួយបារម្ភ។ នៅចំណុចស្ពានបឹងអូរជាង ក្នុងឃុំកំរៀង ស្រុកកំរៀង មានប្រេះដី នៅគល់ស្ពាន។
ក្នុងរបាយការណ៍ដដែល លោក ញឹម វណ្ណដា ទេសរដ្ឋមន្ត្រីទទួលបន្ទុកអនុប្រធានប្រចាំការ និងជាប្រធានគណៈកម្មាធិការប្រតិបត្តិនៃគណៈកម្មាធិការជាតិគ្រប់គ្រងគ្រោះមហន្តរាយ បានស្នើសម្តេចតេជោនាយករដ្ឋមន្ត្រី ហ៊ុន សែន ថា បន្ទាប់ពីការបោះឆ្នោតសាកល សូមសម្តេចតេជោមេត្តាអនុញ្ញាតឲ្យក្រសួងជំនាញ លើកផ្លូវជាតិលេខ៤ ត្រង់ចំណុចស្ពានសំរោង កម្ពស់ ២,៥ ម៉ែត្រ ប្រវែងប្រមាណ ២៥០០ ម៉ែត្រ និងធ្វើស្ពានថ្មីប្រវែង ១០០ ម៉ែត្រ ជំនួសស្ពានសព្វថ្ងៃចំនួនពីរ ដែលស្ពានមួយៗ ប្រវែង ៣០ ម៉ែត្រ ដើម្បីធានាសុវត្ថិភាព ដោយក្នុងនោះ ក្រសួងសាធារណការ និងដឹកជញ្ជូន ក្រសួងអភិវឌ្ឍន៍ជនបទ និងក្រសួងហិរញ្ញវត្ថុ ក៏បានចុះទៅពិនិត្យរួចផងដែរ៕
Source: Kampuchea Thmey Daily
0 Comments