ស្របពេលមានការសង្ស័យចំពោះទំនាក់ទំនងរបស់គាត់ជាមួយលោកគីមជុងអ៊ុន, លោកប្រធានាធិបតីសហរដ្ឋអាមេរិកដូណាល់ត្រាំ បានកោតសរសើរមេដឹកនាំកូរ៉េខាងជើងកាលពីថ្ងៃសុក្រសម្រាប់ការបញ្ជូនត្រឡប់នូវអដ្ឋិធាតុដែលគេជឿថា ជារបស់កងទ័ពអាមេរិកជាង៥០នាក់។
លោក ត្រាំ បានចង្អុលបង្ហាញថា ការប្រគល់ប្រអប់ចំនួន៥៥ដែលគេនិយាយថាមានផ្ទុកអដ្ឋិធាតុទាហានអាមេរិកដែលត្រូវសម្លាប់អំឡុងសង្គ្រាមកូរ៉េគឺជាភស្តុតាងថា គោលការណ៍របស់គាត់ចំពោះបុរសខ្លាំងរបស់កូរ៉េខាងជើងគឺទទួលបានផ្លែផ្កាហើយ។
លោក ត្រាំ បាននិយាយក្នុងអំឡុងពេលបង្ហាញខ្លួននៅសេតវិមានថា “ខ្ញុំចង់អរគុណដល់លោកប្រធានគីមដែលបានរក្សាពាក្យសំដីរបស់គាត់”។
លោកត្រាំបានកោតសរសើរកិច្ចប្រជុំកំពូលកាលពីខែមិថុនាជាមួយលោកគីមនៅប្រទេសសិង្ហបុរីថាជាការបញ្ចប់ការគំរាមកំហែងនុយក្លេអ៊ែររបស់កូរ៉េខាងជើងប្រកបដោយប្រសិទ្ធភាព។
ខណៈពេលដែលលោកត្រាំកំពុងទទួលរងការរិះគន់ថា ដំណើរជឿនលឿនក្រោយកិច្ចប្រជុំទទួលបានលទ្ធផលតិចតួចនោះ គាត់បានស្វាគមន៍ការធ្វើមាតុភូមិនិវត្តន៍នៃអដ្ឋិធាតុទាំងនេះថាជាភស្ដុតាងដែលថា កិច្ចពិភាក្សាបានទទួលជោគជ័យ។ ការធ្វើមាតុភូមិនិវត្តន៍នេះបានកើតឡើងចំខួបលើកទី៦៥នៃការបញ្ចប់សង្គ្រាម។
អ្នកនាំពាក្យសេតវិមានលោកស្រី Sarah Sanders បាននិយាយថា រដ្ឋបាលត្រូវបានលើកទឹកចិត្តដោយសកម្មភាពរបស់កូរ៉េខាងជើងនិងសន្ទុះសម្រាប់ការផ្លាស់ប្តូរជាវិជ្ជមាន។
គួរបញ្ជាក់ឡើងវិញថា ជនជាតិអាមេរិកជាង៣៥,០០០នាក់ត្រូវបានសម្លាប់ក្នុងអំឡុងសង្គ្រាម ឆ្នាំ១៩៥០-៥៣និង៧,៧០០នាក់នៅតែត្រូវបានគេចុះបញ្ជីថាបាត់ខ្លួនដែលភាគច្រើននៅក្នុងប្រទេសកូរ៉េខាងជើង។
យន្តហោះដឹកទំនិញ C-17 របស់យោធាអាមេរិកដែលផ្ទុកអដ្ឋិធាតុទាហានអាមេរិកជាង៥០នាក់បានចុះចតនៅឯមូលដ្ឋានទ័ពអាកាសអាមេរិកក្នុងប្រទេសកូរ៉េខាងត្បូងកាលពីថ្ងៃព្រហស្បតិ៍៕ AFP
Source: Kampuchea Thmey Daily
0 Comments