អាជ្ញាធរក្រុងស្ទឹងត្រែង ប្រកាសឱ្យប្រជាពលរដ្ឋនៅក្នុងក្រុងលើកកម្ពស់សុវត្ថិភាពនៅពេលទឹកទន្លេមេគង្គឡើងលើសកម្រិតប្រកាសអាសន្ននៅថ្ងៃនេះ

ស្ទឹងត្រែង ៖ មកដល់ថ្ងៃទី៣១ ខែកក្កដា ឆ្នាំ២០១៨នេះ លោកម៉ុម សារឿន អភិបាលខេត្តស្ទឹងត្រែងនៅតែបន្តឱ្យកម្លាំងប្រដាប់អាវុធទាំង៣ប្រភេទ រួមនឹងអាជ្ញាធរឃុំសង្កាត់ចាត់ចែងកម្លាំងប្រជាការពារប្រចាំការ នៅតាមទីទួលសុវត្ថិភាព និងតំបន់គោលដៅ បើមានបញ្ហាប្រឈម ត្រូវផ្តល់ព័ត៌មានឱ្យបានឆាប់ជូនអាជ្ញាធរ ដែលនៅជិតដើម្បីយើងរួមគ្នាជួយប្រជាពលរដ្ឋយើងឱ្យទាន់ពេលវេលា ក្នុងពេល ដែលទឹកមានកម្ពស់ជិត១១ម៉ែត្រ។

លោកអភិបាលខេត្តបញ្ជាក់ថា ៖ កម្ពស់ទឹកទន្លេមេគង្គនេះ ប្រជាពលរដ្ឋយើងត្រូវប្រុងប្រយ័ត្នរៀងៗខ្លួន ព្រោះអាជ្ញាធរបានធ្វើសេចក្តីប្រកាសរួចមកហើយ ឱ្យអាជ្ញាធរភូមិឃុំនីមួយៗ ប្រកាសឱ្យប្រជាពលរដ្ឋ មើលថែកូនចៅ- បរិភោគទឹកស្អាត - ចំណីអាហារមានអនាម័យ -និងប្រុងប្រយ័ត្នចំពោះសត្វមានពិស ទិចឬខាំ។

លោកដែង ភារម្យ ចៅសង្កាត់ស្រះឬស្សីក្រុងស្ទឹងត្រែងបានបញ្ជាក់ថា ៖ ផលប៉ះពាល់ពីទឹកជំនន់នេះអាជ្ញាធរ បានប្រកាសឱ្យប្រុងប្រយ័ត្នជាញឹកញាប់ ហើយបើតាមការពិនិត្យសន្ទុះទឹក ដែលកំពុងជំរុញឡើងនេះគួរឱ្យមានការព្រួយបារម្ភ ព្រោះវានៅតែបន្តឡើងជាងមួយសប្ដាហ៍មកហើយ។

លោកចៅសង្កាត់បញ្ជាក់ថា ៖ តាមសន្ទះទឹកបានហូរចូលក្រុងខ្លះៗហើយ ព្រោះនៅសង្កាត់សាមគ្គីប្រជាពលរដ្ឋនៅតាជួរមាត់ទន្លេមួយចំនួននៅចំណុចជួរមាត់ទន្លេទាំងអស់ ត្រូវរកទីទួលសុវត្ថិភាពជាពិសេសនៅតាមតំបន់ទំនាប ចំណែកនៅក្នុងក្រុងអាចប៉ះពាល់ប្រជាពលរដ្ឋ រួមមាន-ភូមិព្រែក- ភូមិកណ្តាល-នឹងភូមិស្ពានថ្ម ក្នុង សង្កាត់ស្ទឹងត្រែង - ភូមិថ្មលាត ភូមិស្រែពោធិ ភូមិលើក្នុងសង្កាត់ស្រះឬស្សី- ភូមិខាំផាន់ ភូមិកោះខនឌិន ភូមិហាងខូបាន ភូមិហាងខូសួន ភូមិថ្មី ក្នុងសង្កាត់សាមគ្គី។

លោកស្រី លក្ខិណា ប្រជាពលរដ្ឋនៅភូមិស្ពានថ្មសង្កាត់ក្រុងស្ទឹងត្រែងបានបញ្ជាក់ថា ៖ ប្រជាពលរដ្ឋយើងបានប្រុងប្រយ័ត្នគ្រប់ៗគ្នាហើយ ចំណែកខ្លះទៀតក៏បានជម្លៀសចេញពីផ្ទះទី ទួលសុវត្ថិភាពបញ្ចៀសពីគ្រោះទឹកជំនន់លិចផ្ទះសម្បែង កុំឱ្យកើតគ្រោះថ្នាក់។

លោកប៉ាង ប៉េងប្រធានមន្ទីរធនធានទឹកបានបញ្ជាក់ថា ៖ ទឹកទន្លេមេគង្គបានឡើងដល់លើសកម្រិតប្រកាសអាសន្នកម្ពស់១០,៨៤ម៉ែត្រនៅព្រឹកថ្ងៃទី៣១ កក្កដា។ នេះបើតាមការព្យាកររបស់ក្រសួងធនធានទឹក ដូចនេះចូរ បងប្អូនប្រុងប្រយ័ត្ន និងអាចជម្លៀសទ្រព្យសម្បត្តិ សត្វចិញ្ចឹមផ្សេងៗទៅរកទីទួលសុវត្ថិភាពឱ្យបានជាមុន។

សូមបញ្ជាក់ថា ៖ ក្នុងកម្រិតកម្ពស់ទឹក១១ម៉ែត្រនេះ ភូមិទាំងចំនួន៨១នៅតាមដងទន្លេមេគង្គ នឹងត្រូវលិច ផ្លូវធ្វើដំណើរមួយចំនួន ក៏ត្រូវកាត់ផ្តាច់ ក្នុងពេលដែលផលដំណាំបានលិចលង់ទៅហើយនោះ៕