មិនត្រូវភ្លេចអតីតកាល ខ្មែររស់នៅក្រោមភ្លើងសង្គ្រាម ខុសដាច់ពីបច្ចុប្បន្នកាល ខ្មែរនៅរស់ក្រោមម្លប់សន្តិភាពសេរីភាព និងការអភិវឌ្ឍ

ភ្នំពេញ ៖ លោកយាយលោកតា លោកម៉ែលោកពុក លោកអ៊ំ លោកមីងលោកពូ លោកបង លោកប្អូនជាប្រជាពលរដ្ឋខ្មែរប្រាកដជាស្គាល់ច្បាស់ណាស់ ពីប្រវត្តិរបស់បុរសម្នាក់ដែលជាបិតាសន្តិភាពគឺគាត់បានលះបង់សាច់ស្រស់ឈាមស្រស់ប្តូរអាយុជីវិតក្នុងកាតព្វកិច្ចរំដោះជាតិមាតុភូមិដោយខិតខំប្រឹងប្រែងខ្លាំងណាស់ ទាំងឈឺទាំងជា ដើម្បីរាស្ត្រខ្មែរ ព្រោះគាត់បានលះបង់អ្វីៗគ្រប់យ៉ាងដើម្បីប្រជាជនខ្មែររស់នៅក្រោមម្លប់សន្តិភាព រស់ដោយសេចក្តីសុខ រស់ដោយសុភមង្គលយ៉ាងសុខដុមរមនា រស់ដោយភាពសប្បាយហ៊ឺហារីករាយ ក្រោយពីបញ្ចប់សង្គ្រាមរុំារ៉ៃជាច្រើនទសវត្សមក។

ផ្ទុយទៅវិញ ថ្ងៃណាក៏បិតាសន្តិភាពម្នាក់នេះ ធ្វើការ ក្នុងនាមជាអ្នកបម្រើជាតិ បម្រើប្រជាជនស្ទើរគ្មានពេលឈប់សម្រាក សូម្បីតែពេលវេលាថែរក្សាសុខភាព លំហែកាយ ឬជួបជុំក្រុមគ្រួសារគាត់ សឹងនឹងគ្មានផង។ គាត់ក៏ចង់ត្រូវការពេលវេលាឈប់សម្រាក ទទួលទានអាហារឱ្យត្រង់មាត់ ដើរលេងកម្សាន្តលេង កីឡា ហាត់ប្រាណជួបជុំគ្រួសារគាត់ ស្តាប់ភ្លេងកម្សាន្តអារម្មណ៍។ល។ ដូចប្រជារាស្ត្រខ្មែរទូទាំងប្រទេសកម្ពុជាដែរ។ ប៉ុន្តែរូបគាត់នៅមានកាតព្វកិច្ចដ៏ធំធេងបំផុតមួយមិនអាចភ្លេចបានគឺ ការមើលថែនាវាកម្ពុជាមិនឱ្យលិចលង់នៅវិនាទីណាមួយ ដោយពួកជនក្បត់ជាតិ និងជនអគតិមួយចំនួនតូចនោះឡើយ។

តើមានមនុស្សប៉ុន្មានលាននាក់យកគំរូបម្រើជាតិ បម្រើរាស្ត្រពិតប្រាកដដូចបុរសសន្តិភាពម្នាក់នេះទៅ? ជាពិសេសនៅថ្ងៃទី២៩ កក្កដា ឆ្នាំ២០១៨ថ្មីៗនេះ បុរសសន្តិភាពម្នាក់នេះ បានបំបែកឯកត្តកម្មល្បីល្បាញពេញពិភពលោក ដោយទទួលជោគជ័យភ្លូកទឹកភ្លូកដីក្នុងការបោះឆ្នោតជ្រើសតាំងតំណាងរាស្ត្រនីតិកាលទី៦ ដោយមានគាំទ្រសំឡេងឆ្នោតពីសំណាក់ប្រជាជនកម្ពុជាទូទាំងប្រទេសរហូត១២៥អាសនៈ៕