ស្ទឹងត្រែង ៖ សពពលរដ្ឋឡាវចំនួន៣០នាក់ បានរកឃើញក្នុងដងទន្លេសេកុងស្រុកសៀមប៉ាងក្រោយពីការបាក់ទំនប់វារីអគ្គិសនី ហើយត្រូវបានភាគីកម្ពុជាបញ្ជូនទៅកាន់ប្រទេសឡាវវិញកាលពីថ្ងៃទី២៩ ខែកក្កដា ឆ្នាំ២០១៨នេះ។
កម្ពុជា បានធ្វើមេត្រីភាពតាមការស្នើរបស់អាជ្ញាធរឡាវ ក្នុងការជួយរក សពពលរដ្ឋឡាវអណ្ដែតមកតាមដងទន្លេសេកុង ក្រោយពីការបាក់ទំនប់វារីអគ្គិសនីសេពានសេណាមណយ កាលពីយប់ថ្ងៃទី២៣ ខែកក្កដា ឆ្នាំ២០១៨កន្លងមកនេះ។
គ្រោះមហន្តរាយដ៏អាក្រក់បង្កដោយធម្មជាតិបណ្ដាលបាក់ទំនប់វារីអគ្គិសនីនៅខេត្តអត្តពឺប្រទេសឡាវ បានបង្កអោយលំនៅឋាន និងជីវិតប្រជាពលរដ្ឋរាប់រយនាក់ស្លាប់ និងរាប់រយនាក់ទៀតបានបាត់ខ្លួន។
តាមការអោយដឹងពីមន្ត្រីយោធាវរៈការពារព្រំដែនកម្ពុជា.ឡាវ បានអះអាងថា សពពលរដ្ឋឡាវចំនួន២៩នាក់ ត្រូវបានខាងកម្ពុជាយើងបញ្ជូនទៅអោយខាងភាគីឡាវជាបន្តបន្ទាប់។
សពពលរដ្ឋឡាវ ដែលបានបាត់ខ្លួនដោយសារបាក់ទំនប់វារីអគ្គិសនីក្នុងខេត្តអត្តពឺ ប្រទេសឡាវ បានរកឃើញអណ្តែតតាមដងទន្លេសេកុង ខាងក្រោមទន្លេសេពាន និងស្ពានអូរគុ បន្តមកដល់មុខទីបញ្ជាការវរៈសេនាតូចការពារព្រំដែន១០១ ក្នុងឃុំសន្តិភាពស្រុកសៀមប៉ាង។
នៅរសៀលថ្ងៃទី២៩ ខែកក្កដា ឆ្នាំ២០១៨ មានសពពលរដ្ឋឡាវម្នាក់ទៀតបានអណ្ដែតទៅដល់ស្រុកសៀមបូក ខេត្តស្ទឹងត្រែង ហើយត្រូវបានអគ្គកុងស៊ុលឡាវប្រចាំខេត្តស្ទឹងត្រែង ទៅទទួល និងវេចខ្ចប់នាំទៅខេត្តអត្តពឺ ប្រទេសឡាវនៅយប់ថ្ងៃទី២៩ ខែកក្កដា ឆ្នាំ២០១៨។
លោក ស៊ុំ ផន អគ្គកុងស៊ុលឡាវ ប្រចាំខេត្តស្ទឹងត្រែង ប្រទេសកម្ពុជា បានបញ្ជាក់ឲ្យដឹងថា នៅថ្ងៃទី៣០ ខែកក្កដា ឆ្នាំ២០១៨ យោងតាមរបាយការណ៍អាជ្ញាធរខេត្តអត្តពឺ ប្រទេសឡាវ ការរកឃើញសពប្រជាពលរដ្ឋរបស់ខ្លួនទាំងនៅខេត្តអត្តពឺ ប្រទេសឡាវ និងកម្ពុជា មានចំនួនតែ១១នាក់និងបាត់ខ្លួន១២១នាក់មិនទាន់រកឃើញ។
តែបើតាមរបាយការណ៍ជាក់លាក់ ដែលមន្ត្រីយោធាវរៈការពារព្រំដែនកម្ពុជា បានផ្តល់ព័ត៌មានថា មានសពពលរដ្ឋឡាវចំនួន២៩នាក់ បានរកឃើញ និងប្រគល់ជូនទៅភាគីឡាវបន្តបន្ទាប់ ហើយនៅថ្ងៃទី២៩ ខែកក្កដា ឆ្នាំ២០១៨ ខាងសមត្ថកិច្ច៧ខេត្តស្ទឹងត្រែង បានរកឃើញសពបុរសម្នាក់ទៀតនៅក្នុងដងទន្លេមេគង្គក្នុងភូមិកោះព្រះស្រុកសៀមបូកខេត្តស្ទឹងត្រែង។
ដូចនេះគិតមកដល់ថ្ងៃ៣០ ខែកក្កដា ឆ្នាំ២០១៨ សពពលរដ្ឋឡាវទាំងអស់ រកឃើញនៅស្រុកសៀមប៉ាង២៩ និងរកឃើញនៅសៀមបូកម្នាក់ សរុបមានចំនួន៣០នាក់ហើយ។
ប្រភពដដែលបន្តថា អាជ្ញាធរឡាវនៅតែបន្តអោយភាគីកម្ពុជាជួយផ្តល់ព័ត៌មាន ខណៈពលរដ្ឋរបស់ខ្លួននៅបាត់១៣១នាក់មិនទាន់រកឃើញ៕
Source: Kampuchea Thmey Daily
0 Comments