សំបុកចាបនៅតាមព្រៃ តាមមាត់ទន្លេ ត្រូវបានអ្នកភូមិព្រៃខ្មែរ ស្រុករលាប្អៀរ ដាក់តាំងលក់

កំពង់ឆ្នាំង ៖ សំបុកចាបព្រៃដែលសំបូរមាននៅតាមដើមឈើនៅតាមព្រៃមាត់ទន្លេ ត្រូវបានអ្នកភូមិព្រៃខ្មែរ ឃុំរលាប្អៀរ ស្រុករលាប្អៀរ ជួលអោយគេររកមកតាំងលក់តាមដងផ្លូវជាតិលេខ៥ មានរយៈពេល២ឆ្នាំហើយ ព្រោះតែមានភ្ញៀវនៅក្នុងប្រទេសមានចំណាប់អារម្មណ៍ ទិញយកទៅតាំងនៅតាមផ្ទះដើម្បីអោយសត្វចាបស្រុករស់នៅ។

ប្អូនស្រីឈ្មោះ ទឹម ទុំ រស់នៅភូមិព្រៃខ្មែរ ដែលបានតាំងសំបុកចាបព្រៃលក់នៅមុខភូមិជាប់ផ្លូវជាតិលេខ៥ បាននិយាយអោយដឹងថា ៖ ប្អូនបានជួលអ្នកស្រុកនៅក្នុងភូមិ ដែលទៅឃ្វាលគោក្របី អោយជួយយកសំបុកចាបព្រៃ ដែលនៅតាមដើមឈើមាត់ទន្លេឬបឹងបួយកមកលក់បោះអោយគាត់ ដោយនៅក្នុងសំបុកចាប១គាត់ទិញថ្លៃ២៥០០រៀល ពេលលក់ចេញអោយអ្នកធ្វើដំណើរតាមផ្លូវជាតិលេខ៥ បានមួយថ្លៃ ៣៥០០ ទៅ៤០០០រៀល។

ដោយឡែកនៅក្នុងរដូវរំហើយនេះ គាត់លក់សំបុកចាបសរុបបានពី២០០ទៅ៣០០សំ បុកផងដែរ។ ក្រៅពីមុខរបរនេះ គាត់ក៏បានទៅច្រូតស្បូវមកក្រងជាស្លឹកកណ្តបលក់ដោយលក់ចេញក្នុង១០០កណ្តប ថ្លៃ១៥ម៉ឺនរៀល តែស្បូវកណ្តបនេះមិនសូវលក់ដាច់ទេ ព្រោះថាភាគច្រើនគេទិញយកទៅប្រក់ខ្ចុះសម្រាប់អង្គុយលេងកម្សាន្ត នៅតាមកន្លែងកម្សាន្ត។

ដោយឡែកប្អូនប្រុសឈ្មោះ សុខ សៅ អាយុ៣៨ឆ្នាំ ជាអ្នកលក់សំបុកចាបព្រៃនេះដែរ បាននិយាយអោយដឹងថា ៖ សំបុកចាបព្រៃនេះមាន២ប្រភេទ ១ប្រភេទជាសំបុកចាបញីវាធ្វើសំបុកសម្រាប់ពង ឯសំបុកចាបឈ្មោលវិញគឺមានឈើទទឹកមួយនៅមាត់សំបុក ដែលចាបឈ្មោលវាធ្វើសំបុកសម្រាប់ជ្រកភ្លៀងតែប៉ុណ្ណោះ។ ដោយឡែកនៅរដូវភ្លៀងបែបនេះពួកចាបព្រៃលែងរស់នៅតាមមាត់ទន្លេហើយព្រោះគ្មានចំណីស៊ីគឺវាឡើងទៅរស់នៅឯព្រៃភ្នំវិញ ហើយនៅរដូវរំហើយទើបវានាំគ្នាចុះមករស់នៅតាមមាត់ទន្លេវិញ ព្រោះមានស្រូវ សណ្តែក ពោត ដែលអ្នកស្រុកដាំដុះ សម្រាប់ស៊ីជាចំណី។

ប្អូនប្រុស បានបន្តអោយដឹងថា ៖ នៅក្នុងរដូវរំហើយនេះប្អូនអាចលក់សំបុកចាបព្រៃបានប្រមាណ៣០០សំបុក តែក្នុងរដូវវស្សាភ្លៀងធ្លាក់ជោកជាំបែបនេះ គេរកសំបុកចាបលែងបានហើយ។ ក្រៅពីនេះ ប្អូនបានទទួលឧបករណ៍នេសាទស្រុកស្រែនៅក្នុងខេត្តកំពង់ឆ្នាំង មកតាំងលក់នៅតាមមាត់ផ្លូវជាតិលេខ៥ គឺប៉ោងដាក់អន្ទង់ធ្វើអំពីឬស្សី ១លក់ថ្លៃ៨០០០រៀល ទ្រុងដាក់ត្រី ១ថ្លៃ១៤០០០រៀល គឺចំណេញបាន១តែ១០០០ ទៅ១៥០០រៀលតែប៉ុណ្ណោះ ហើយឧបករណ៍នេះក៏លក់ដាច់គ្រាន់បើដែរ ដែលអ្នកទីក្រុងគេនិយមទិញយកទៅតាំងលំអនៅក្នុងខ្ចុះអង្គុយលេងនៅក្នុងភូមិឋាន៕