មានប្រធានគណបក្សមួយ មិនបានឈរឈ្មោះជាបេក្ខជនតំណាងរាស្ដ្រ ហើយមិនមានឈ្មោះបោះឆ្នោតទៀតផង
ភ្នំពេញ ៖ ដំណើរការបោះឆ្នោតជ្រើសតាំងតំណាងរាស្ដ្រនីតិកាលទី៦ ឆ្នាំ២០១៨ នឹងប្រព្រឹត្តិទៅតែមួយថ្ងៃគត់ គឺនៅថ្ងៃទី២៩ ខែកក្កដា ឆ្នាំ២០១៨ ខាងមុខ ចាប់ពីម៉ោង៧ ព្រឹកដល់ម៉ោង៣រសៀល ហើយការឃោសនារកសំឡេងឆ្នោត មានរយៈពេល២១ថ្ងៃ ដោយចាប់ពីថ្ងៃទី០៧ ខែកក្កដា ដល់ថ្ងៃទី២៧ ខែកក្កដា ឆ្នាំ២០១៨ ជាមួយគ្នានេះ ការបោះពុម្ពសន្លឹកឆ្នោត ក៏ត្រូវបានបញ្ចប់ និងបានដឹកចេញទៅកាន់ការិយាល័យបោះឆ្នោតទាំង២២៩៦៧ នៅទូទាំងប្រទេសផងដែរ។
ការបោះឆ្នោតនេះ មានគណបក្សនយោបាយចំនួន២០ បានចូលរួម គឺគណបក្ស “គណបក្សខ្មែររួបរួមជាតិ” លេខរៀងទី១, គណបក្ស “គណបក្សមាតុភូមិយើង” លេខរៀងទី២, គណបក្ស “គណបក្សពន្លឺថ្មី” លេខរៀងទី៣, គណបក្ស “សញ្ជាតិកម្ពុជា” លេខរៀងទី៤, គណបក្ស “ខ្មែរក្រោក” លេខរៀងទី៥, គណបក្ស “សំបុកឃ្មុំសង្គមប្រជាធិបតេយ្យ” លេខរៀងទី៦, គណបក្ស “ប្រជាធិបតេយ្យមូលដ្ឋាន” លេខរៀងទី៧, គណបក្ស “ខ្មែរសាធារណរដ្ឋប្រជាធិបតេយ្យ” លេខរៀងទី៨, គណបក្ស “រស្មីខេមរា” លេខរៀងទី៩, គណបក្ស “សម្ព័ន្ធដើម្បីប្រជាធិបតេយ្យ” លេខរៀងទី១០, គណបក្ស “ខ្មែរសាធារណរដ្ឋ” លេខរៀងទី១១, គណបក្ស “ខ្មែរឈប់ក្រ” លេខរៀងទី១២, គណបក្ស “ហ្វ៊ុនស៊ិនប៉ិច” លេខរៀងទី១៣, គណបក្ស “ខ្មែរអភិវឌ្ឍន៍សេដ្ឋកិច្ច” លេខរៀងទី១៤, គណបក្ស “យុវជនកម្ពុជា” លេខរៀងទី១៥, គណបក្ស “ធម្មាធិបតេយ្យ” លេខរៀងទី១៦, គណបក្ស “ឆន្ទៈខ្មែរ” លេខរៀងទី១៧, គណបក្ស “ជនជាតិដើមប្រជាធិបតេយ្យកម្ពុជា” លេខរៀងទី១៨, គណបក្ស “ខ្មែរតែមួយ” លេខរៀងទី១៩ និងគណបក្ស “ប្រជាជនកម្ពុជា” លេខរៀងទី២០។
ជាមួយនឹងព័ត៌មានខាងលើនេះ មានប្រជាពលរដ្ឋមួយចំនួន ក៏មិនទាន់ដឹងពីទីតាំង ឬការិយាល័យបោះឆ្នោត របស់មេដឹកនាំ ឬប្រធានគណបក្សទាំង២០ ដែលចូលរួមប្រកួតប្រជែងនៅក្នុងការបោះឆ្នោតជ្រើសតាំងតំណាងរាស្ត្រ នីតិកាលទី៦ នេះ នៅទីណាផងដែរ ខាងក្រោមនេះ ជាទីតាំង ឬការិយាល័យបោះឆ្នោត របស់មេដឹកនាំ ឬប្រធានគណបក្សទាំង២០ គឺ
ទី១. ប្រធានគណបក្សខ្មែររួបរួមជាតិ លោក ញឹក ប៊ុនឆៃ (បេក្ខជនតំណាងរាស្ដ្រមណ្ឌលខេត្តបន្ទាយមានជ័យ) ទៅបោះឆ្នោតនៅមណ្ឌលខេត្តបន្ទាយមានជ័យ (នៅការិយាល័យ "សាលាបឋម សិក្សាសែសិន" សង្កាត់អូរអំបិល ក្រុងសិរី សោភ័ណ)។
ទី២. ប្រធានគណបក្សមាតុភូមិយើង លោក ច័ន្ទ ប៊ុនហន (បេក្ខជនតំណាងរាស្ដ្រមណ្ឌលខេត្តព្រៃវែង) ទៅបោះឆ្នោតនៅមណ្ឌលរាជធានីភ្នំពេញ (នៅការិយាល័យ "អនុវិ.+បឋម. សុធារស" សង្កាត់ទន្លេ បាសាក់ ខណ្ឌចំការមន)។
ទី៣. ប្រធានគណបក្សពន្លឺថ្មី លោក នួន សុខាវី (បេក្ខជនតំណាងរាស្ដ្រមណ្ឌលរាជធានីភ្នំពេញ) ទៅបោះឆ្នោតនៅមណ្ឌលរាជធានីភ្នំពេញ (នៅការិយាល័យ "វិទ្យាល័យ ជា ស៊ីម សាមគ្គី" សង្កាត់បឹងសាឡាង ខណ្ឌទួលគោក)។
ទី៤. ប្រធានគណបក្សសញ្ជាតិកម្ពុជា លោក សេង សុខេង (បេក្ខជនតំណាងរាស្ដ្រខេត្តកំពង់ចាម) ទៅបោះឆ្នោតនៅមណ្ឌលរាជធានីភ្នំពេញ (នៅការិយាល័យ "ក្បែរវិមានសុភមង្គល" សង្កាត់ស្ទឹងមានជ័យទី៣ ខណ្ឌមានជ័យ)។
ទី៥. ប្រធានគណបក្សខ្មែរក្រោក លោក សុខសុវណ្ណ វឌ្ឍនាសាប៊ុង (មិនឈរឈ្មោះជាបេក្ខជនតំណាងរាស្ដ្រ) ទៅបោះឆ្នោតនៅមណ្ឌលខេត្តកណ្ដាល។
ទី៦. ប្រធានគណបក្សសំបុកឃ្មុំសង្គមប្រជាធិបតេយ្យ លោក ម៉ម សូណង់ដូ (បេក្ខជនតំណាងរាស្ដ្រមណ្ឌលព្រៃវែង) ទៅបោះឆ្នោតនៅមណ្ឌលរាជធានីភ្នំពេញ (នៅការិយាល័យ "សាលារៀន វត្តដំបូកខ្ពស់" សង្កាត់បឹងទំពន់ទី២ ខណ្ឌ មានជ័យ)។
ទី៧. ប្រធានគណបក្សប្រជាធិបតេយ្យមូលដ្ឋាន លោក យ៉េង វីរៈ (បេក្ខជនតំណាងរាស្ដ្រមណ្ឌលខេត្តកំពង់ស្ពឺ) ទៅបោះឆ្នោតនៅមណ្ឌលរាជធានីភ្នំពេញ (នៅការិយាល័យ "វិទ្យាល័យ ហ៊ុន សែន បូរី១០០ខ្នង" សង្កាត់អូរបែកក្អម ខណ្ឌសែនសុខ)។
ទី៨. ប្រធានគណបក្សសាធារណរដ្ឋប្រជាធិបតេយ្យ លោកស្រី សុខ រ័ត្នសុវណ្ណបច្ចៈសីលា (មិនឈរឈ្មោះជាបេក្ខជនតំណាងរាស្ដ្រ) បោះឆ្នោតនៅមណ្ឌលខេត្តពោធិ៍សាត់ (ការិយាល័យ "សាលាបឋមសិក្សាអន្លង់ត្នោត" ឃុំអន្លង់ត្នោត ស្រុកក្រគរ)។
ទី៩. ប្រធានគណបក្សរស្មីខេមរា លោក ស៊ិន សុភាព (បេក្ខជនតំណាងរាស្ដ្រមណ្ឌលខេត្តកំពង់ស្ពឺ) បោះឆ្នោតនៅមណ្ឌលខេត្តកំពង់ស្ពឺ (នៅការិយាល័យ "បឋមសិក្សាព្រះពុទ្ធនិពាន្វ" ឃុំព្រះនិព្វាន្ត ស្រុកគងពិសី)។
ទី១០. ប្រធានគណបក្សសម្ព័ន្ធដើម្បីប្រជាធិបតេយ្យ លោក ខឹម វាសនា (មិនឈរឈ្មោះជាបេក្ខជនតំណាងរាស្ដ្រ) ទៅបោះឆ្នោតនៅមណ្ឌលរាជធានីភ្នំពេញ (នៅការិយាល័យ "សាលាវិចិត្រសិល្បៈ ក្នុងសង្កាត់ភ្នំពេញថ្មី ខណ្ឌសែនសុខ)។
ទី១១. ប្រធានគណបក្សខ្មែរសាធារណរដ្ឋ លោក លន់ ឫទ្ធិ (មិនឈរឈ្មោះជាបេក្ខជនតំណាងរាស្ដ្រ) មិនមានឈ្មោះបោះឆ្នោតនោះទេ ព្រោះមិនបានចុះឈ្មោះ។ នេះតាមការបញ្ជាក់របស់លោក អាង ផានិត ជំនួយការលោក លន់ ឫទ្ធិ។
ទី១២. ប្រធានគណបក្សខ្មែរឈប់ក្រ លោក ក្រវ៉ាញ ដារ៉ន (មិនឈរឈ្មោះជាបេក្ខជនតំណាងរាស្ដ្រ) មិនមានឈ្មោះបោះឆ្នោតនោះទេ ព្រោះមិនបានចុះឈ្មោះ។ នេះបើតាមការបញ្ជាក់របស់លោក ស៊ិន វណ្ណារិទ្ធ អគ្គលេខាធិការគណបក្សខ្មែរឈប់ក្រ។
ទី១៣. ប្រធានគណបក្សហ្វ៊ុនស៊ិនប៉ិច សម្ដេចក្រុមព្រះ នរោត្តម រណឬទ្ធិ (បេក្ខជនតំណាងរាស្ដ្រមណ្ឌលខេត្តកំពង់ចាម) យាងទៅបោះឆ្នោតនៅមណ្ឌលខេត្តកំពង់ចាម។
ទី១៤. ប្រធានគណបក្សខ្មែរអភិវឌ្ឍសេដ្ឋកិច្ច លោក ហួន រាជចំរើន (បេក្ខជនតំណាងរាស្ដ្រមណ្ឌលខេត្តកណ្ដាល) ទៅបោះឆ្នោតនៅមណ្ឌលខេត្តតាកែវ (ការិយាល័យ "សាលាវត្តស្ពឺ" ឃុំអង្គខ្នុរ ស្រុកទ្រាំង)។
ទី១៥. ប្រធានគណបក្សយុវជនកម្ពុជា លោក ពេជ្រ ស្រស់ (បេក្ខជនតំណាងរាស្ដ្រមណ្ឌលខេត្តត្បូងឃ្មុំ) ទៅបោះឆ្នោតនៅមណ្ឌលខេត្តត្បូងឃ្មុំ (នៅការិយាល័យ "បឋមសិក្សាចក" ឃុំចក ស្រុកអូររាំងឪ)។
ទី១៦. ប្រធានគណបក្សធម្មាធិបតេយ្យ លោកស្រី ពោធិតី សាវត្ថី (បេក្ខជនតំណាងរាស្ដ្រមណ្ឌលរាជធានីភ្នំពេញ) ទៅបោះឆ្នោតនៅមណ្ឌលរាជធានីភ្នំពេញ។
ទី១៧. ប្រធានគណបក្សឆន្ទៈខ្មែរ លោក គង់ មុនីកា (បេក្ខជនតំណាងរាស្ដ្រមណ្ឌលរាជធានីភ្នំពេញ) ទៅបោះឆ្នោតនៅមណ្ឌលរាជធានីភ្នំពេញ (នៅការិយាល័យ "អនុវិ.+បឋម. សុធារស" សង្កាត់ទន្លេបាសាក់ ខណ្ឌចំការមន)។
ទី១៨. ប្រធានគណបក្សគណបក្សជនជាតិដើមប្រជាធិបតេយ្យកម្ពុជា លោក ប្លាង សីន (មិនឈរឈ្មោះជាបេក្ខជនតំណាងរាស្ដ្រ) ទៅបោះឆ្នោតនៅមណ្ឌលខេត្តមណ្ឌលគិរី (នៅការិយាល័យ "បឋមសិក្សាស្រែក្លេង" ឃុំប៊ូស្រា ស្រុកពេជ្រាដា)។
ទី១៩. ប្រធានគណបក្សខ្មែរតែមួយ លោក កែម រិទ្ធិសិត (បេក្ខជនតំណាងរាស្ដ្រមណ្ឌលខេត្តតាកែវ) ទៅបោះឆ្នោតនៅមណ្ឌលរាជធានីភ្នំពេញ (នៅការិយាល័យ "ផ្លូវ១១៨ (ក្រោយផ្សារបាយយ័ន្ត)" សង្កាត់មនោរម្យ ខណ្ឌ៧មករា)។
ទី២០. ប្រធានគណបក្សប្រជាជនកម្ពុជា សម្ដេចតេជោ ហ៊ុន សែន (បេក្ខជនតំណាងរាស្ដ្រមណ្ឌលខេត្តកណ្ដាល) ទៅបោះឆ្នោតនៅមណ្ឌលខេត្តកណ្ដាល (នៅការិយាល័យ "សាលាគរុកោសល្យវិក្រិត្យការក្រុង" សង្កាត់តាខ្មៅ ក្រុងតាខ្មៅ)។
សូមបញ្ជាក់ថា ក្នុងចំណោមប្រធានគណបក្សទាំង២០ មានប្រធានគណបក្សចំនួន៦ មិនឈរជាតំណាងរាស្ដ្រ ខណៈប្រធានគណបក្សចំនួន១៤ផ្សេងទៀត ឈរឈ្មោះបេក្ខភាពតំណាងរាស្ត្រនៅ៨មណ្ឌលផ្សេងគ្នា ហើយក៏មានប្រធានគណបក្សមួយមិនឈរឈ្មោះជាបេក្ខជនតំណាងរាស្ដ្រ និងមិនមានឈ្មោះបោះឆ្នោតទៀតផង៕
Source: Kampuchea Thmey Daily
0 Comments