អាជ្ញាធរក្រិក បាននិយាយកាលពីថ្ងៃពុធថា មនុស្សយ៉ាងតិច៨១នាក់ បានស្លាប់នៅក្នុងភ្លើងឆេះព្រៃដ៏ធំនៅជុំវិញទីក្រុងអាតែន ខណៈក្រុមអ្នកជួយសង្គ្រោះបានឆែកឆេរផ្ទះដែលឆេះខ្ទេចនិងរថយន្តដែលត្រូវដុតបំផ្លាញដើម្បីរកអ្នករស់រានមានជីវិតពីអគ្គិភ័យមួយក្នុងចំណោមអគ្គិភ័យដែលសម្លាប់មនុស្សច្រើនបំផុតនៅក្នុងពិភពលោក។
អ្នកស្រុកនិងអ្នកទេសចរជាច្រើននាក់បាននាំគ្នារត់ទៅសមុទ្រដើម្បីគេចឲ្យផុតពីអណ្តាតភ្លើងនៅពេលដែលវាលេបត្របាក់តាមទីប្រជុំជននិងភូមិនានាក្បែររដ្ឋធានី។
ប្រព័ន្ធផ្សព្វផ្សាយក្រិកបានហៅគ្រោះមហន្តរាយនេះថាជា “សោកនាដកម្មជាតិ” ខណៈដែលលោកនាយករដ្ឋមន្ត្រី Alexis Tsipras បានបញ្ឈប់ដំណើរទស្សនកិច្ចរយៈពេលខ្លីទៅកាន់ប្រទេសបូស្នៀនិងបានប្រកាសពីការកាន់ទុក្ខជាតិរយៈពេលបីថ្ងៃ។
អ្នកនាំពាក្យសេវាអគ្គិភ័យលោកស្រី Stavroula Maliri បាននិយាយថា ឥឡូវនេះមនុស្សចំនួន៨១នាក់ត្រូវបានគេដឹងថាស្លាប់។ ចំនួនអ្នកស្លាប់នេះបានកើនឡើងលើសចំនួនជាង៧៧នាក់ដែលត្រូវបានសម្លាប់នៅក្នុងអគ្គិភ័យដែលសម្លាប់មនុស្សច្រើនបំផុតរបស់ក្រិកកាលឆ្នាំ២០០៧នៅកោះ Evia ភាគខាងត្បូង។
លោកស្រី Maliri បាននិយាយថា ក្រុមអ្នកពន្លត់អគ្គិភ័យបានបន្តស្វែងរកសាកសពបន្ទាប់ពីទទួលបានការហៅទូរស័ព្ទជាច្រើនលើកដែលរាយការណ៍អំពីមនុស្សដែលបាត់ខ្លួន។
លោកស្រី Maliri បាននិយាយថា វាអាចទៅរួចដែលថាអ្នកដែលមិនបានរាប់បញ្ចូលគឺប្រហែលជាស្លាប់។ លោកស្រីបានបន្ថែមថា សាច់ញាតិរបស់អ្នកដែលបាត់ខ្លួនត្រូវបានស្នើឲ្យផ្តល់សំណាក DNA ដើម្បីជួយអាជ្ញាធរក្នុងការកំណត់អត្តសញ្ញាណសាកសព។
នៅពេលអគ្គិភ័យបានផ្ទុះឡើងកាលពីយប់ថ្ងៃចន្ទ ពលរដ្ឋនិងអ្នកទេសចរត្រូវបានលេបត្របាក់ដោយអណ្តាតភ្លើងនៅផ្ទះរបស់ពួកគេឬខណៈពេលកំពុងធ្វើដំណើរដោយថ្មើរជើងឬនៅក្នុងរថយន្តរបស់ពួកគេ។ អ្នកថតរូប AFP បានឃើញសពដុតឆេះខ្លោចរបស់មនុស្សនិងសត្វឆ្កែ។
ក្រុមអ្នកជួយសង្គ្រោះបាននិយាយថា សពឆេះខ្លោចនៃមនុស្សចំនួន២៦នាក់រួមទាំងកុមារតូចៗផងដែរត្រូវបានគេរកឃើញក្នុងវីឡាមួយនៅភូមិ Mati ដែលមានចម្ងាយ៤០គីឡូម៉ែត្រភាគអាគ្នេយ៍ទីក្រុងអាតែន។
កាលពីថ្ងៃពុធក្រុមជួយសង្គ្រោះបានធ្វើការឆែកឆេរតាមផ្ទះដើម្បីស្វែងរកអ្នកនៅរស់នៅក្នុងភូមិនេះ៕ AFP
Source: Kampuchea Thmey Daily
0 Comments