ភ្នំពេញ ៖ ប្រទេសកម្ពុជាជាប្រទេសក្នុងចំណោមប្រទេស ដែលបានបរិច្ចាគកម្លាំងមួកខៀវច្រើនជាងគេ ក្នុងសហគមន៍អាស៊ាន។ នេះបើតាមប្រសាសន៍លោក អាឡិចហ្សែនឌឺ ហ៊ូយិន (Alexandre Huynh) តំណាងអង្គការសហប្រជាជាតិប្រចាំកម្ពុជា ថ្លែងនៅក្នុងពិធីទទួលដំណើរមាតុភូមិនិវត្តន៍កងកម្លាំងកម្ពុជា ដែលបានបញ្ចប់បេសកកម្មរក្សាសន្តិភាពរបស់អង្គការសហប្រជាជាតិចំនួន ៣កង គឺកងវិស្វកម្មព្រលានយន្តហោះលេខ ១៨៩ កងកំទេចគ្រាប់មិនទាន់ផ្ទុះលេខ ១២៣ នៅសាធារណរដ្ឋម៉ាលី និងកងអាវុធហត្ថលេខ ៦១៨ នៅស៊ូដង់ខាងត្បូង ដែលពិធីនេះបានប្រព្រឹត្តទៅក្រោមអធិបតីភាពសម្តេចពិជ័យសេនា ទៀ បាញ់ ឧបនាយករដ្ឋមន្ត្រី-រដ្ឋមន្ត្រីក្រសួងការពារជាតិ និងតំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា កាលពីរសៀលថ្ងៃទី ២៣ ខែកក្កដានេះ នៅសាលប្រជុំ នៃទីស្តីការគណៈរដ្ឋមន្ត្រី។
តំណាងអង្គការសហប្រជាជាតិប្រចាំកម្ពុជា លោក អាឡិចហ្សែនឌឺ ហ៊ូយិន បានលើកឡើងថា ក្នុងសេចក្តីថ្លែងការរបស់អគ្គលេខាធិការអង្គការសហប្រជាជាតិ កាលពីថ្ងៃទី ០១ ខែមិថុនា ឆ្នាំ២០១៨ នៃទិវារក្សាសន្តិភាព ខណៈដែលលោកបានផ្តល់មេដាយដល់បុរស និងនារីចំនួន ១២៨នាក់ ដែលបានពលីជីវិត ក្នុងពេលកំពុងបេសកកម្ម ក្រោមឆត្រអង្គការសហប្រជាជាតិបានលើកឡើងថា ខណៈដែលយើងបានរម្លឹកដល់អ្នកពលីជីវិត យើងក៏នាំស្នាដៃដែលពួកគេសម្រេចបានដើម្បីសន្តិភាព និងស្ថិរភាពជុំវិញពិភពលោកអស់រយៈពេល ៧០ឆ្នាំ។ លោកសូមអរគុណដល់ការចូលរួម និងការលះបង់ ក្នុងបេសកកម្មរក្សាសន្តិភាពបន្តស្ថិតនៅជាសកម្មភាពដាច់ខាតរបស់អង្គការសហប្រជាជាតិ ហើយក៏ជាផ្នែកមួយបង្ហាញពីសកម្មភាពអន្តរជាតិ និងពហុភាគីដ៏រឹងមាំ។ ក្នុងនាមជាបុគ្គលិករក្សាសន្តិភាព គឺមានន័យថាជាអ្នកចូលរួមក្នុងបេសកកម្ម ដែលមានភាពឧត្តម ប៉ុន្តែជាការងារ ដែលប្រឈមនឹងហានិភ័យ។ គិតត្រឹមឆ្នាំនេះកម្លាំងរក្សាសន្តិភាពចំនួន ៥២នាក់ បានបាត់បង់ជីវិតអំឡុងពេលស្វែងរកសន្តិភាពក្នុងបេសកកម្ម ដែលប្រឈមនឹងគ្រោះថ្នាក់។ សាធារណរដ្ឋមាលី និងស៊ូដង់ខាងត្បូងស្ថិតក្នុងចំណោមប្រទេស ដែលប្រឈមនឹងភាពស្មុគស្មាញ ហានិភ័យ ព្រមទាំងងាយនឹងរងគ្រោះ ជាក់ស្តែងកងរក្សាសន្តិភាពបង់ក្លាដេស ដែលបាត់បង់ជីវិតកាលពីខែមុន ដោយការវាយប្រហារមកលើក្បួនយុទ្ធជនតំណាងអង្គការសហប្រជាជាតិ ខណៈពួកគេផ្តល់ការការពារដល់បុគ្គលិកមនុស្សធម៌ ដែលកំពុងផ្តល់ជំនួយមនុស្សធម៌ក្នុងរដ្ឋវ៉ាសាឌា នៃសាធារណរដ្ឋស៊ូដង់ខាងត្បូង។ ប្រទេសកម្ពុជាក៏បានលះបង់នូវតម្លៃដ៏ធំធេងក្នុងការប្តេជ្ញាដើម្បីសន្តិភាព ហើយកាលពីឆ្នាំកន្លងទៅនេះកងរក្សាសន្តិភាពកម្ពុជាចំនួន ៥នាក់ បានបាត់បង់ជីវិតក្នុងពេលបំពេញបេសកកម្មអង្គការសហប្រជាជាតិ ក្នុងសាធារណរដ្ឋអាហ្វ្រិកកណ្តាល។ អគ្គលេខាធិការអង្គការសហប្រជាជាតិ បានចូលរួមរំលែកទុក្ខដល់កងទ័ពពលី ព្រមទាំងថ្គោលទោសដល់ការសម្លាប់នេះផងដែរ។ តាងនាមឱ្យអង្គការសហប្រជាជាតិប្រចាំកម្ពុជា សូមចូលរួមរម្លឹកគុណដល់យុទ្ធជន ដែលបានពលីជីវិត ដើម្បីការពារសន្តិភាពដល់ប្រទេស ដែលជាប្រទេសមិនមែនប្រទេសរបស់ខ្លួន។ ទោះបីជាមានសោកនាដកម្មបែបនេះក៏ដោយ ក៏មិនបានរារាំងកងរក្សាសន្តិភាពកម្ពុជាមិនឱ្យធ្វើការនៅកន្លែងដែលត្រូវការពួកគេបំផុតនោះទេ។ អង្គការសហប្រជាជាតិដឹងគុណការបរិច្ចាគរបស់អ្នក។ លោកមានសេចក្តីរីករាយដោយដឹងថា ប្រទេសកម្ពុជាជាប្រទេសក្នុងចំណោមប្រទេស ដែលបានបរិច្ចាគកម្លាំងមួកខៀវច្រើនជាងគេ ក្នុងសហគមន៍អាស៊ាន។ ក្នុងឆ្នាំ១៩៩០ ប្រទេសកម្ពុជាធ្លាប់តែទទួលការគាំទ្រពីកងរក្សាសន្តិភាព ក្នុងការនាំមកនូវសន្តិភាព ប៉ុន្តែប៉ុន្មានឆ្នាំក្រោយមកប្រទេសកម្ពុជា ក៏បានចាប់ផ្តើមបញ្ជូនកម្លាំងក្នុងប្រតិបត្តិការរក្សាសន្តិភាពពាសពេញពិភពលោក។ លោកសូមកោតសរសើរដល់កងកម្លាំងរក្សាសន្តិភាពកម្ពុជា តាំងពីអតីតកាល បច្ចុប្បន្ន និងអនាគតចំពោះការតាំងចិត្ត នៅក្នុងការបរិច្ចាគបេសកកម្មអង្គការសហប្រជាជាតិ ដើម្បីសន្តិភាព និងសន្តិសុខនៅពាសពេញពិភពលោក។
បើរបាយការណ៍របស់ឯកឧត្តម នាយឧត្តមសេនីយ៍ សែម សវណ្ណនី អគ្គនាយកមជ្ឈមណ្ឌលជាតិ និងជាអនុប្រធានគណៈកម្មាធិការជាតិបានឱ្យដឹងថា នៅក្នុងរយៈពេល១២ឆ្នាំមកនេះ កម្ពុជាបានបញ្ជូនកងកម្លាំងសរុបចំនួន ៥.៤៩៨នាក់ នារីចំនួន ២៥៧នាក់ លើជំនាញបោសសំអាតមីន វិស្វកម្មសំណង់ផ្តេក-សំណង់បញ្ឈរ អាវុធហត្ថ មន្ទីរពេទ្យកម្រិត២ វិស្វកម្មព្រលានយន្តហោះ កំទេចគ្រាប់មិនទាន់ផ្ទុះ នាយទាហានសេនាធិការ និងសង្កេតការណ៍យោធា ទៅកាន់បេសកកម្មចំនួន ១០ នៅក្នុងប្រទេសចំនួន ៨ មានជាអាទិ៍ សាធារណរដ្ឋស៊ូដង់ ឆាដ អាហ្វ្រិកកណ្តាល ស៊ូដង់ខាងត្បូង លីបង់ ម៉ាលី ស៊ីរី និង សាយប្រឺស។ បច្ចុប្បន្នកម្លាំងកម្ពុជាកំពុងបំពេញបេសកកម្មរក្សាសន្តិភាពរបស់អង្គការសហប្រជាជាតិនៅប្រទេសចំនួន ៥ រួមមាន សាធារណរដ្ឋស៊ូដង់ខាងត្បូង ស៊ូដង់ លីបង់ អាហ្វ្រិកកណ្តាល និងម៉ាលី៕
Source: Kampuchea Thmey Daily
0 Comments