ក្រុមមន្ត្រីបាននិយាយនៅថ្ងៃអង្គារថា មនុស្សជាង៥០០នាក់និងអ្នកនាំផ្លូវរបស់ពួកគេ ត្រូវបានជម្លៀសចេញប្រកបដោយជោគជ័យពីភ្នំភ្លើងឥណ្ឌូនេស៊ី បន្ទាប់ពីការរញ្ជួយដីដ៏សាហាវមួយ បានបង្កឲ្យមានការបាក់ដី ដែលធ្វើឲ្យពួកគេត្រូវជាប់គាំងនៅលើភ្នំ។
ភក់និងថ្មរាប់តោនបានធ្លាក់ចុះពីភ្នំ Rinjani នៅក្នុងការរញ្ជួយដីកម្រិត៦.៤រ៉ិចទ័រដែលបានកើតឡើងកាលពីព្រឹកថ្ងៃអាទិត្យនិងត្រូវបានបន្តដោយការរញ្ជួយជាច្រើនលើកដែលជាហេតុបិទផ្លូវឡើងភ្នំ។
យោងតាមមន្ត្រីស្វែងរកនិងជួយសង្គ្រោះបានឲ្យដឹងថា អ្នកឡើងភ្នំដែលជាប់គាំងចំនួន៥៦០នាក់ត្រូវបានគេគិតថាបានរួមបញ្ចូលជាមួយពលរដ្ឋមកពីសហរដ្ឋអាមេរិក បារាំង ហូឡង់ ថៃនិងអាល្លឺម៉ង់ក៏ដូចជាបណ្តាប្រទេសផ្សេងៗទៀតផងដែរ។
អ្នកនាំពាក្យទីភ្នាក់ងារគ្រោះមហន្តរាយជាតិលោក Sutopo Purwo Nugroho បានប្រាប់ AFP ថា “អ្នកឡើងភ្នំចំនួន៥៤៣នាក់ត្រូវបានជម្លៀសចេញហើយពួកគេបានមកដល់កាលពីយប់មិញ។ពេលនេះមានមនុស្ស៦នាក់ហើយបានចាកចេញ ពួកគេមានសុខភាពល្អនិងមានសុវត្ថិភាព”។
អ្នកឡើងភ្នំអាចចាប់ផ្តើមចុះពីភ្នំមកវិញកាលពីថ្ងៃចន្ទបន្ទាប់ពីអ្នកនាំផ្លូវបានរកឃើញផ្លូវជំនួសមួយដែលមិនរងផលប៉ះពាល់ដោយការបាក់ដី។
មនុស្សយ៉ាងតិច១៦នាក់ត្រូវបានសម្លាប់ក្នុងការរញ្ជួយដីនៅទូទាំងតំបន់ដែលរងផលប៉ះពាល់លើកោះ Lombok ខណៈដែលអគាររាប់រយត្រូវបានបំផ្លាញរួមទាំងគ្លីនិកសុខភាពមួយផងដែរ។
ការរញ្ជួយដីនេះបានបង្កភាពភ័យខ្លាចនៅលើកោះលំហែកាយមួយនេះហើយបានជំរុញឲ្យអ្នកស្រុកនិងភ្ញៀវទេសចររត់ចេញក្រៅផ្ទះនិងសណ្ឋាគាររបស់ពួកគេ។
ឧទ្ធម្ភាគចក្រនិងក្រុមស្វែងរកត្រូវបានដាក់ពង្រាយដើម្បីរុករកលើជម្រាលភ្នំភ្លើងហើយទម្លាក់ស្បៀងអាហារសម្រាប់អ្នកដែលនៅជាប់លើភ្នំ៕ AFP
Source: Kampuchea Thmey Daily
0 Comments