ឆ្លងកាត់១៥ប្រកួតក្នុងចំណោម២២ប្រកួត ប្រចាំពានរង្វាន់លីគកំពូលកម្ពុជា Metfone Cambodian League 2018 ក្រុមវេស្ទើនភ្នំពេញ ដែលជាក្រុមនៅតំបន់បាតតារាងក្នុងចំណោមសមាជិកទាំង១២ក្រុម ទើបតែរកបានពិន្ទុលើកដំបូងប៉ុណ្ណោះ ពោលគឺក្រោយប្រកួតស្មើគ្នាជាមួយក្រុមក្រសួងការពារជាតិ ៣ទល់៣ កាលពីចុងសប្ដាហ៍កន្លងទៅ។
លោក FIZOL BIN A.RAZAK គ្រូបង្គោលក្លិបវេស្ទើនភ្នំពេញ អះអាងប្រាប់អ្នកសារព័ត៌មានថា លទ្ធផលស្មើគ្នានេះ ឆ្លុះបញ្ចាំងពីការខិតខំប្រឹងប្រែង និង ជាកិត្តិយសសម្រាប់កូនក្រុមទាំងអស់តែម្ដង។ លោកបន្តថា កូនក្រុមរបស់ខ្លួនស្រេកឃ្លានខ្លាំងនូវលទ្ធផលវិជ្ជមាន ហើយវាក៏បានផ្ដល់ផ្លែផ្កាជាសន្សឹមៗ ពីមួយប្រកួតទៅមួយប្រកួតទៀត។ ដូច្នេះ លោកសង្ឃឹមថា ក្រុមលោកនឹងធ្វើបានកាន់តែល្អនៅប្រកួតបន្តបន្ទាប់ ដែលនៅសល់។
គ្រូបង្វឹកជនជាតិម៉ាឡេស៊ី រូបនេះបន្តថា «សម្រាប់ខ្ញុំ នេះជាកិត្តិយសសម្រាប់កីឡាករ សម្រាប់ក្រុមទាំងមូល។ នេះជាពិន្ទុដំបូងសម្រាប់កូនក្រុមទាំងអស់ ជាមួយនឹងការខិតខំប្រឹងប្រែងក្រាញននៀល។ ពួកគេបានបង្ហាញសមត្ថភាពរបស់គេពីមួយប្រកួតទៅមួយប្រកួត។ មួយពិន្ទុនេះ គឺសម្រាប់អ្នកទាំងអស់គ្នា។ ខ្ញុំតែងតែជំរុញលើកទឹកចិត្តពួកគេ ព្រោះខ្ញុំជឿជាក់ថា ពួកគេនឹងមានអនាគតមួយដ៏ល្អធ្វើឲ្យពួកគេមានអារម្មណ៍ថា មានអ្នកនៅចាំគាំទ្រពួកគេពីក្រោយជានិច្ច»។
ទោះទទួលបានត្រឹមមួយពិន្ទុលោក RAZAK ពេញចិត្តចំពោះលទ្ធផលនេះ ព្រោះអាចលេងស្មើក្រុមដ៏ខ្លាំងដូចជាក្រសួងការពារជាតិ។ ១៥ប្រកួតមកនេះក្រុមវេស្ទើនភ្នំពេញ ប្រកួតមិនទាន់ស្គាល់ជ័យជម្នះទាល់តែសោះ តែបាន១ពិន្ទុដោយសារស្មើគ្នា១លើកនិងចាញ់១៤លើក ព្រមទាំងទាត់បាល់ចូលទីគេបាន៨គ្រាប់ និងរបូតគ្រាប់បាល់វិញចំនួន៦៨គ្រាប់។
សម្រាប់ប្រកួតបន្ទាប់ក្រុមវេស្ទើនភ្នំពេញ ត្រូវប៉ះក្រុមវិសាខា នៅវេលាម៉ោងល្ងាចថ្ងៃសៅរ៍ ទី៤ ខែសីហា ឆ្នាំ២០១៨ លើទីលានកីឡដ្ឋានកងយោធពលខេមរភូមិន្ទ (ស្តាតចាស់) ប្រចាំសប្ដាហ៍ទី១៦ នៃពានរង្វាន់លីគកំពូលកម្ពុជា៕
Source: Kampuchea Thmey Daily
0 Comments