ក្លិបបាល់ទាត់វិសាខា សមាជិកពានរង្វាន់លីគកំពូលកម្ពុជា បានសហការជាមួយនឹងសហភាពសហព័ន្ធយុវជនកម្ពុជាខេត្តព្រៃវែង (ស.ស.យ.ក) រៀបចំកម្មវិធីសប្បុរសធម៌ស្ដីពីកីឡាបាល់ទាត់ ធ្វើឡើងនៅទីលានបាល់ទាត់ភូមិលេខ៦ សង្កាត់កំពង់លាវ ក្រុងព្រៃវែង ខេត្តព្រៃវែង នាថ្ងៃព្រហស្បតិ៍ ទី២៦ ខែកក្កដា ឆ្នាំ២០១៨ សប្ដាហ៍នេះ ដោយជោគជ័យ ដែលមានកុមារចូលរួមសរុបជាង១០០នាក់ ខណៈថ្នាក់ដឹកនាំក្លិបគ្រោងបន្តធ្វើសកម្មភាពដូចគ្នានេះនៅខេត្តផ្សេងៗទៀត។
លោក ហុក សុចិត្រា អ្នកចាត់ការទូទៅរបស់ក្លិបបាល់ទាត់វិសាខា បានលើកឡើងក្រោយបញ្ចប់សកម្មភាពនេះដោយជោគជ័យថា ៖ «ជាទិសដៅរបស់ក្លិប។ យើងមានទិសដៅ២គឺទី១ ជម្រុះឱ្យក្លិបជាក្លិបអាជីព និងទី២គឺចូលរួមក្នុងការងារសង្គម។ នៅពេលក្លិបទំនេរគឺយើងចូលរួម។ យើងធ្វើនេះគឺគោលដៅ១ផ្តល់បទពិសោធន៍ឱ្យក្មេង។ យើងត្រៀមប៉ុន្មានខេត្តទៀត ដូចជាបាត់ដំបង បន្ទាយមានជ័យ នៅខែបន្តបន្ទាប់។ ការធ្វើនេះគឺជាបង្ហាញពីមូលដ្ឋានបាល់ទាត់»។
ចំណែកលោក ប៉ាវ សុធី អនុប្រធានមន្ទីរអប់រំ យុវជន និង កីឡា ខេត្តព្រៃវែង វិញបានបង្ហាញទស្សនៈវិជ្ជាមានថា ៖ «ដំណើរមកដល់របស់ក្លិបបាល់ទាត់វិសាខានេះគឺធ្វើឱ្យកុមារជាច្រើនបានស្គាល់ក្លិបវិសាខា ទី២គឺបំផុសអោយកុមារចូលចិត្តកីឡាជាពិសេសគឺបាល់ទាត់តែម្តង។ ពេលគាត់បានជួបកីឡាករល្បីៗឃើញថាគាត់ពេញចិត្តនិងរីករាយក្នុងការលេងជាមួយគ្នា»។
ដោយឡែកឯកឧត្តម ស សុខា ប្រធានក្លិបបាល់ទាត់វិសាខា វិញបានលើកឡើងជុំវិញសកម្មភាពរបស់ក្លិបនៅតាមខេត្តថា ៖ «នេះជាលើកទី២ហើយដែលយើងធ្វើឡើងនៅទឹកដីខេត្តព្រៃវែង ហើយគោលដៅបន្ទាប់នៅខេត្តផ្សេងគឺយើងបន្តធ្វើឡើងដោយធ្វើយ៉ាងណាឱ្យកុមារស្គាល់បាល់ទាត់។ គោលដៅស៊ីហ្គេមឆ្នាំ២០២៣ របស់យើងគឺចេញធ្វើសកម្មភាពពីនេះ តទៅដោយមិនចាំបាច់ដល់ពេលនោះទើបយើងធ្វើនោះទេ»។
នេះជាលើកទី២ហើយ ដែលក្រុមដឹកនាំដោយលោក ហុក សុជីវ័ន ជាគ្រូបង្គោល បានធ្វើដំណើរទៅកាន់ខេត្តព្រៃវែង ខណៈកាលពីលើកដំបូងធ្វើឡើងនៅមុនពិធីបុណ្យចូលឆ្នាំខ្មែរ មានរៀបចំជាការចែករំលែកបទពិសោធន៍បាល់ទាត់អំឡុងពេលសង្ក្រាន្តព្រៃវែង តែពុំមានការចែកសម្ភារៈទេ តែពេលនេះបន្ថែមកម្មវិធីពិសេសច្រើនជាងមុន។
ក្រុមវិសាខា បានបង្កើតឡើងពីថ្ងៃទី៥ ខែកុម្ភៈ ឆ្នាំ២០១៧ ក្រោមការឧបត្ថម្ភគាំទ្រពីសំណាក់ឯកឧត្ដម ស សុខា។ បច្ចុប្បន្នក្លឹបមានកីឡាករជិត៣០នាក់ ដែលមានលោក ហុក សុចិត្រា អតីតគ្រូបង្វឹកក្រុមជម្រើសជាតិកម្ពុជា ដើរតួធ្វើជាអ្នកចាត់ការទូទៅរបស់ក្រុម ខណៈលោក ហុក សុជីវ័ន ជាប្អូនប្រុសបង្កើតធ្វើជាគ្រូបង្វឹក។ ក្រុមវិសាខា បានកសាងកីឡដ្ឋានថ្មីផ្ទាល់ខ្លួន មានទីតាំងនៅតាមផ្លូវលេខ៥៩៨ ខាងឆ្វេងដៃខ្លោងទ្វារ Grand Phnom Penh។ កីឡដ្ឋាននេះអាចផ្ទុកទស្សនិកជនប្រមាណជាង៥០០០នាក់ ដែលមានទីលានជាស្មៅធម្មជាតិ។
ក្រុមនេះជាបេក្ខភាពមួយមិនអាចមើលរំលងបានក្នុងការប្រជែងយកជើងឯកនៅឆ្នាំចាស់នេះ ខណៈឆ្លងកាត់១៤ប្រកួតមកនេះក្នុងពានរង្វាន់លីគកំពូលកម្ពុជា វិសាខា ឈរលេខ២ក្នុងតារាងរួមដែលមាន១២ក្រុមក្រោយប្រកួតឈ្នះ១១ លើកស្មើគ្នា២លើក និងចាញ់៣លើក មាន៣៥ពិន្ទុក្នុងដៃ។ សម្រាប់ប្រកួតបន្ទាប់ក្រុមវិសាខា ត្រូវប៉ះក្រុមវេស្ទើនភ្នំពេញ នៅម៉ោង៦ល្ងាចលើទីលានកីឡដ្ឋានស្តាតចាស់នៅថ្ងៃសៅរ៍ ទី៤ ខែសីហា ឆ្នាំ២០១៨ ខាងមុខ៕
Source: Kampuchea Thmey Daily
0 Comments