ភ្នំពេញ ៖ ជនសង្ស័យជួញដូរគ្រឿងញៀនដ៏សកម្មនៅប្លុកតាន់ប៉ាម្នាក់ត្រូវបានកម្លាំងសមត្ថកិច្ចមូលដ្ឋានដាក់កម្លាំងសម្ងាត់ចាប់បង្ក្រាបទាល់តែបាន កាលពីនៅថ្ងៃសៅរ៍ ១រោច ខែទុតិយាសាឍ ឆ្នាំច សំរឹទ្ធិស័ក ព.ស២៥៦២ ថ្ងៃទី២៨ ខែកក្កដា ឆ្នាំ២០១៨ វេលាម៉ោង២២និង១៥នាទីនេះ។
សមត្ថកិច្ចបានឲ្យដឹងថា កម្លាំងផ្នែកព្រហ្មទណ្ឌសហការជាមួយកម្លាំងប៉ុស្តិ៍នគរបាលរដ្ឋបាលផ្សារថ្មីទី៣ នៃអធិការដ្ឋាននគរបាលខណ្ឌដូនពេញ បានធ្វើការឃាត់ខ្លួនជនសង្ស័យរូបនោះពីបទជួញដូរដោយខុសច្បាប់នូវសារធាតុញៀននៅចំណុចប្លុកតាន់ប៉ា ជាន់ទី៣ ផ្លូវលេខ៤៩ ភូមិ៨ សង្កាត់ផ្សារថ្មីទី៣ ខណ្ឌដូនពេញ រាជធានីភ្នំពេញ។
ដែលជនសង្ស័យត្រូវឃាត់ខ្លួនឈ្មោះ ខាត់ សុខន ភេទប្រុស អាយុ៣៦ឆ្នាំ ជនជាតិខ្មែរ មុខរបរនឹងទីលំនៅមិនពិតប្រាកដត្រូវបានដកហូតវត្ថុតាងមានម្ស៉ៅក្រាមពណ៌សថ្លា ជាគ្រឿងញៀនចំនួន០១កញ្ចប់ធំ និង០៦កញ្ចប់តូច ថង់ផ្លាស្ទិចមួយចំនួន លុយខ្មែរ៣០០០០រៀលទូរស័ព្ទដៃ០១គ្រឿងម៉ាកសាំសុងពណ៌ស។
សមត្ថកិច្ចបានឲ្យដឹងទៀតថា មុនពេលឃាត់ខ្លួនមុខសញ្ញាចែកចាយនិងជួញដូរគ្រឿងញៀនរូបនោះ គឺកម្លាំងសហប៉ុស្តិ៍អធិការនគរបាលខណ្ឌដូនពេញបានចេញល្បាតដើម្បីទប់ស្កាត់រាលបទល្មើសផ្សេងៗដែលនៅក្នុងមូលដ្ឋានខណ្ឌពេលដែលចុះទៅដល់តំបន់ដែលពោធិ៍ពេញដោយការប្រើប្រាស់និងជួញដូរគ្រឿងញៀននៅចំណុចតាន់ប៉ានោះក៏ឃើញជាក់ស្តែងនឹងជនសង្ស័យរូបនោះកំពុងចរាចរគ្រឿងញៀនជាក់ស្តែងនោះក៏ហៅឆែកឆេរឃើញលាក់ទុកថ្នាំញៀនមួយចំនួនក៏នាំមកអធិការដ្ឋាននគរបាលខណ្ឌដូនពេញ ដើម្បីកសាងសំណុំរឿងបញ្ជូនទៅតុលាការចាត់ការតាមនីតិវិធីច្បាប់៕
Source: Kampuchea Thmey Daily
0 Comments