ភ្នំពេញ ៖ បន្ទាប់ពីជំនន់ទឹកភ្លៀងបានស្រក លែងគំរាមកំហែងទំនប់សណ្តរស្ទឹងព្រែកត្នោត ក្នុងភូមិសាស្ត្ររាជធានីភ្នំពេញ និងខេត្តកណ្តាល ត្រូវបាន ក្រសួង ធនធានទឹក បើកយុទ្ធនាការ ជាលក្ខណៈទ្រង់ទ្រាយធំ ជួសជុល ឡើងវិញ គិតមកដល់ពេលនេះ សម្រេចជោគជ័យ១០០ភាគរយហើយ។
ក្រសួងធនធានទឹកបានឲ្យដឹងថា ក្រោយពី ស្ថានភាពទឹកជំនន់ស្ទឹងព្រែកត្នោត បាន និងកំពុងវិលទៅរកស្ថានភាពជាប្រក្រតី វិញ លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម បានបញ្ជាឱ្យបើកយុទ្ធនាការជួសជុលទំនប់សណ្តរស្ទឹងព្រែកត្នោតឡើងវិញជាលក្ខណៈទ្រង់ទ្រាយធំ ដោយបែងចែកជា ០៥ មុខព្រួញ និងប្រើប្រាស់គ្រឿងចក្រជិត ៥០ គ្រឿង ពិសេសផ្តោតទៅលើកន្លែងដែលមានការហូរច្រោះ (រន្ធនាគ)។ គិតមកដល់រសៀលថ្ងៃទី២៥ ខែកក្កដា ឆ្នាំ២០១៨ នេះ ការងារជួសជុលសម្រេចបានជាង៩០% ហើយ។
ក្រសួង បន្តថា គិតមកដល់ ថ្ងៃទី ២៦នេះ យុទ្ធនាការ ជាលក្ខណៈទ្រង់ទ្រាយធំ ជួសជុលទំនប់សណ្តរស្ទឹងព្រែកត្នោតឡើងវិញ បានរួចរាល់ជាស្ថាពរហើយ។ យុទ្ធនាការជួលជុលកែលំអឡើងវិញនូវកន្លែងដែលជួបប្រទះនូវរូងនាគ ត្រូវបានធ្វើឡើងវិញយ៉ាងសកម្ម ជៀសវាងនូវមហន្តរាយដែលអាចកើតមានជាយថាហេតុ។
សូមរំលឹកថា ក្រោយពីមានជំនន់ទឹកភ្លៀង នៅស្ទឹងព្រែកត្នោតនិង ផ្លូវជាតិលេខ៤ កាលពីថ្មីៗកន្លងមកនេះលោក លឹម គានហោ រដ្ឋមន្ត្រី ក្រសួងធនធានទឹកបាន បង្កើតក្រុមការងារ២៤ម៉ោងលើ២៤ម៉ោង ជា៦ក្រុមដើម្បីពិនិត្យនិងតាមដានជួយអន្តរាគមន៍ប្រសិនបើមានការចាំបាច់ ក្រុមទី១៖ ត្រូវប្រចាំការតាមដានលើស្ថានភាពទឹកជំនន់ និងរបាយទឹកភ្លៀងក្នុងភូមិសាស្ត្រស្រុកភ្នំស្រួច, ក្រុមទី២៖ ត្រូវប្រចាំការនៅទ្វារទឹករលាំងជ្រៃ ហើយត្រូវបន្តបើកទ្វារទាំងអស់ទម្លាក់កម្ពស់ទឹកក្នុងស្ទឹងព្រែកត្នោតឲ្យទាប ដើម្បីស្រូបយកទឹកជំនន់ ពីស្ទឹងស្រែខ្លុងបានលឿន, ក្រុមទី៣៖ ដែលកំពុងប្រចាំការនៅទំនប់៧មករា (កំពង់ទួល) ត្រូវបន្តរំដោះទឹកចេញបន្ថែម ដើម្បីកុំឲ្យចាល់ទឹកដែលទម្លាក់ពីកំពង់ស្ពឺទៅ ហើយពេលទឹកពីកំពង់ស្ពឺ ទៅដល់កំពង់ទួល ក្រុមការងារត្រូវចាត់ចែងបែងចែកទឹកនេះជា០២ផ្នែក គឺមួយផ្នែកត្រូវបង្វែរចូលទៅទន្លេបាទី តាមរយៈប្រឡាយលេខ៧៨ និងតាមរយៈស្ទឹងតូច ឯមួយផ្នែកទៀត ត្រូវទម្លាក់តាមព្រែកហូរ ចូលទៅទន្លេបាសាក់។
ក្រុមទី៤ និងក្រុមទី៥ ៖ ត្រូវប្រចាំការតាមដានស្ថានភាពទឹក និងរបាយទឹកភ្លៀង នៅស្ទឹងតាសាល ស្ទឹងឃ្លៀច និងស្ទឹងអូរតូចៗមួយចំនួនទៀត ដែលហូរចូលស្ទឹងព្រែកត្នោត និងក្រុមទី៦៖ (ក្រុមគ្រឿងចក្រធុនធ្ងន់) ត្រូវត្រៀមលក្ខណៈ២៤ម៉ោង លើ២៤ម៉ោង ដើម្បីអន្តរាគមន៍ក្នុងករណីចាំបាច់ ក៏ដូចជាត្រៀមជួសជុលឡើងវិញជាបន្ទាន់ នូវហេដ្ឋារចនាសម្ព័ន្ធធារាសាស្ត្រ ដែលអាចរងការខូចខាតដោយទឹកជំនន់៕
Source: Kampuchea Thmey Daily
0 Comments