ប្រទេសប៉ាគីស្ថានបានជួបប្រទះនឹងភាពច្របូកច្របល់នៃការបោះឆ្នោតនៅថ្ងៃព្រហស្បតិ៍ ខណៈគណបក្សកំពុងកាន់អំណាចដែលផុតអាណត្តិបានប្រកាសអំពី “ការក្លែងបន្លំដោយឥតលាក់លៀម” នៅក្នុងការបោះឆ្នោតហើយបដិសេធលទ្ធផលក្រៅផ្លូវការដែលបង្ហាញពីជ័យជំនះដល់អតីតម្ចាស់ជើងឯកកីឡាគ្រីកឃីតលោក Imran Khan ។
លទ្ធផលនៅតែកំពុងត្រូវបានគេកត់ត្រាកាលពីព្រឹកថ្ងៃព្រហស្បតិ៍ក្នុងរយៈពេលប៉ុន្មានម៉ោងបន្ទាប់ពីអ្នកគាំទ្រលោក Khan បានចេញមកតាមដងផ្លូវដើម្បីអបអរជ័យជំនះនៅក្នុងការបោះឆ្នោតមួយដែលខាងគូប្រជែងនិយាយថា យោធាដ៏មានអំណាចបានធ្វើការលួចបន្លំ។
ប្រព័ន្ធផ្សព្វផ្សាយក្នុងស្រុកបានរាយការណ៍ថា សន្លឹកឆ្នោតតិចជាងពាក់កណ្តាលត្រូវបានគេរាប់ក្នុងរយៈពេលជាង១៣ម៉ោងបន្ទាប់ពីការបោះឆ្នោតត្រូវបិទ។ វាជាការពន្យារពេលមិនធ្លាប់មានពីមុនមកដែលជាហេតុជំរុញឲ្យមានការព្រួយបារម្ភជាទូទៅលើភាពស្របច្បាប់នៃការអនុវត្ត។
ប៉ុន្តែគណៈកម្មាធិការបោះឆ្នោតប៉ាគីស្ថានបានច្រានចោលការចោទប្រកាន់អំពីការក្លែងបន្លំ។
ប្រធានគណៈកម្មាធិការបោះឆ្នោតលោក Sardar Muhammad Raza បាននិយាយនៅថ្ងៃព្រហស្បតិ៍ថា “ការបោះឆ្នោតនេះមានភាពយុត្តិធម៌និងតម្លាភាព១០០ភាគរយ”។ យ៉ាងណាក្តី លោក Raza មិនបាននិយាយទេថាតើនៅពេលណាទើបអាជ្ញាធរបោះឆ្នោតនឹងប្រកាសលទ្ធផល។
កាលពីល្ងាចថ្ងៃពុធ គណបក្ស Pakistan Muslim League-Nawaz (PML-N) ដែលឡើងកាន់អំណាចចាប់តាំងពីឆ្នាំ២០១៣មកនោះបានច្រានចោលលទ្ធផលនេះព្រោះតែ “ការបន្លំទាំងស្រុង”។
មេដឹកនាំគណបក្សលោក Shahbaz Sharif ដែលត្រូវជាប្អូនប្រុសរបស់អតីតនាយករដ្ឋមន្ត្រីជាប់ពន្ធនាគារ Nawaz Sharif បាននិយាយក្នុងសន្និសីទកាសែតមួយថា “អ្វីដែលពួកគេធ្វើថ្ងៃនេះគឺបានជំរុញប្រទេសប៉ាគីស្ថានឲ្យដើរថយក្រោយ៣០ឆ្នាំ។ ប្រជាជននឹងមិនទទួលយកវាទេ”។
បណ្តាញទូរទស្សន៍ក្នុងស្រុកទាំងអស់សុទ្ធតែបានព្យាករណ៍អំពីជ័យជំនះដល់គណបក្ស Pakistan Tehreek-e-Insaf របស់លោក Khan ដោយមកទល់ពេលនេះលទ្ធផលនេះនឹងផ្តល់ឲ្យគាត់យ៉ាងហោចណាស់១០០អាសនៈនៅរដ្ឋសភាដែលជាសភាជាន់ទាប។
សំឡេងភាគច្រើននៃអាសនៈ១៣៧គឺត្រូវការជាចាំបាច់ដើម្បីបង្កើតរដ្ឋាភិបាលមួយ៕ AFP
Source: Kampuchea Thmey Daily
0 Comments