រដ្ឋមន្ត្រីការបរទេសអាមេរិកលោក Mike Pompeo បាននិយាយកាលពីថ្ងៃពុធថា ការធ្វើមាតុភូមិនិវត្តន៍នៃអដ្ឋិធាតុរបស់ទាហានអាមេរិកដែលស្លាប់ក្នុងសង្គ្រាមកូរ៉េគួរចាប់ផ្តើមក្នុងពេលឆាប់ៗនេះតាមដំណើរការមួយដែលព្រមព្រៀងដោយលោកប្រធានាធិបតី ដូណាល់ ត្រាំ និងមេដឹកនាំកូរ៉េខាងជើងលោក គីម ជុងអ៊ុន។
លោក Pompeo បាននិយាយក្នុងកិច្ចប្រជុំមួយនៅឯសេតវិមានថា “ខ្ញុំគិតថានៅសប្តាហ៍បន្ទាប់យើងនឹងមានការបញ្ជូនត្រឡប់អដ្ឋិធាតុមកវិញជាលើកដំបូង”។
ការធ្វើមាតុភូមិនិវត្តន៍នៃអដ្ឋិធាតុរបស់ទាហានអាមេរិកដែលបានស្លាប់ក្នុងអំឡុងជម្លោះឆ្នាំ១៩៥០-៥៣គឺជាផ្នែកមួយនៃកិច្ចព្រមព្រៀងជាលាយលក្ខណ៍អក្សរមួយដែលចុះហត្ថលេខាដោយលោកគីមនិងលោកត្រាំអំឡុងជំនួបកំពូលរបស់អ្នកទាំងពីរនៅប្រទេសសិង្ហបុរីកាលពីខែមុន។
ទោះបីជាយ៉ាងណាក៏ដោយ លោក Pompeo មិនបានបញ្ជាក់ទេអំពីរបាយការណ៍របស់ប្រព័ន្ធផ្សព្វផ្សាយដែលថា ការធ្វើមាតុភូមិនិវត្តន៍ជាលើកដំបូងនឹងធ្វើឡើងនៅថ្ងៃទី២៧ខែកក្កដាហើយថាប្រហែល៥០ទៅ៥៥នៃសំណុំអដ្ឋិធាតុនឹងត្រូវបានបញ្ជូនត្រឡប់មកវិញ។
ក្រុមមន្ត្រីយោធាកូរ៉េខាងជើងនិងសហរដ្ឋអាមេរិកបានជួបគ្នាកាលពីថ្ងៃអាទិត្យក្នុងភូមិបទឈប់បាញ់ Panmunjom នៅព្រំដែនអន្តរកូរ៉េដើម្បីពិភាក្សាអំពីការធ្វើមាតុភូមិនិវត្តន៍នេះ។
អ្នកនាំពាក្យក្រសួងការបរទេសលោកស្រី Heather Nauert បាននិយាយថា “ការសន្ទនានៅតែបន្ត។ មានកិច្ចការនៅសល់ជាច្រើនដែលត្រូវធ្វើឲ្យហើយនៅច្រើនកម្រិតខុសៗគ្នា”។
មឈូសជាច្រើនដើម្បីដាក់អដ្ឋិធាតុទាហានអាមេរិកត្រូវបាននាំយកទៅភាគខាងត្បូងនៃព្រំដែនក្នុងរយៈពេលប៉ុន្មានសប្តាហ៍ថ្មីៗនេះ៕ AFP
Source: Kampuchea Thmey Daily
0 Comments