ឯកសារសម្ងាត់ដែលគេផ្តល់ទៅឲ្យអង្គភាពព័ត៌មានសហរដ្ឋអាមេរិកបានបង្ហាញថា FBI ជឿជាក់ថា អតីតទីប្រឹក្សាយុទ្ធនាការម្នាក់របស់លោក Donald Trump គឺបានសហការជាមួយប្រទេសរុស្ស៊ីនៅពេលដែលវាធ្វើការដើម្បីដាក់ឥទ្ធិពលលើការបោះឆ្នោតប្រធានាធិបតីឆ្នាំ២០១៦។
ទោះបីជាយ៉ាងណាក៏ដោយ ប្រធានាធិបតីសហរដ្ឋអាមេរិកបានវាយបកទៅវិញកាលពីថ្ងៃអាទិត្យដោយបង្ហាញថា ការលួចថតសំឡេងរបស់អតីតជំនួយការរបស់គាត់គឺជាផ្នែកមួយនៃការសមគំនិតដោយខុសច្បាប់ដោយសារតែ FBI បានពឹងផ្អែកលើព័ត៌មានដែលផ្តល់ដោយការស្រាវជ្រាវដែលគាំទ្រដោយគណបក្សប្រជាធិបតេយ្យក្នុងគោលបំណងស្វែងរកដីកាមួយ។
យោងតាមឯកសារដែលចេញផ្សាយកាលពីរាត្រីថ្ងៃសៅរ៍ដោយកាសែត The New York Times បានបង្ហាញថា ពាក្យស្នើសុំទៅកាន់តុលាការតាមដានស៊ើបការណ៍បរទេសគឺមានដាក់ឈ្មោះ Carter Page ដែលជាអតីតទីប្រឹក្សាគោលនយោបាយបរទេសរបស់យុទ្ធនាការលោក Trump ។
កាសែតនេះរួមជាមួយកាសែត USA Today និងកាសែតដទៃទៀតគឺបានដាក់ពាក្យសុំសម្រាប់ច្បាប់សេរីភាពព័ត៌មានដើម្បីទទួលបានខ្លឹមសារចាំបាច់ដែលក្រសួងយុត្តិធម៌បានបញ្ចេញប៉ុន្តែព័ត៌មានលម្អិតមួយចំនួនត្រូវបានកែលម្អពាក្យពេចន៍។
កាលពីដំបូងឡើយ FBI បាននិយាយថា “FBI ជឿជាក់ថា លោក Page គឺជាប្រធានបទនៃការជ្រើសរើសយកជាគោលដៅដោយរដ្ឋាភិបាលរុស្ស៊ី។ ជាលទ្ធផល វាបានបង្អាក់និងជះឥទ្ធិពលលើការបោះឆ្នោតប្រធានាធិបតីឆ្នាំ២០១៦ដោយរំលោភច្បាប់ព្រហ្មទណ្ឌរបស់សហរដ្ឋអាមេរិក”។
ឯកសារនេះបានបន្ថែមថា “FBI ជឿជាក់ថា លោក Page បានសហការនិងឃុបឃិតជាមួយរដ្ឋាភិបាលរុស្ស៊ី”។
គួរបញ្ជាក់ថា ការបញ្ចេញឯកសារនេះបានកើតឡើងក្នុងរយៈពេលត្រឹមតែជាងមួយសប្តាហ៍ប៉ុណ្ណោះបន្ទាប់ពីរដ្ឋអាជ្ញាពិសេសលោក Robert Mueller បានចោទប្រកាន់មន្ត្រីស៊ើបការណ៍រុស្ស៊ីចំនួន១២នាក់ដោយចោទប្រកាន់ពួកគេថាបាន Hack យុទ្ធនាការគណបក្សប្រជាធិបតេយ្យរបស់លោកស្រី Hillary Clinton ដើម្បីលួចឯកសារដែលក្រោយមកត្រូវបានផ្សព្វផ្សាយជាសាធារណៈ៕ AFP
Source: Kampuchea Thmey Daily
0 Comments